У Беларусі забаранілі прадаваць два папулярныя брэнды алівак
Дзяржстандарт Беларусі забараніў прадаваць у краіне аліўкі дзвюх вядомых марак — Gusto і Itlv, паведамляецца ў тэлеграм-канале ведамства. Прычына — наяўнасць у іх недапушчальнай харчовай дабаўкі.
Гаворка ідзе пра кансерваваныя пастэрызаваныя аліўкі Gusto, фаршыраваныя ласосем, і непастэрызаваныя аліўкі без костачак Itlv. Вырабляюць іх у Іспаніі.
У абодвух выпадках Дзяржстандарт палічыў, што прадукцыя не адпавядае патрабаванням тэхнічных рэгламентаў Мытнага саюза.
«У выніку праведзеных выпрабаванняў у складзе прадукта выяўленая незаяўленая вытворцам, недапушчальная харчовая дабаўка — кансервант дыяксід серы (Е220)», — гаворыцца ў паведамленнях.
У Gusto гэтага кансерванта знайшлі ў колькасці 39,7±9,1 мг/кг, у Itlv — 80,2±18,4 мг/кг.
Цяпер аліўкі павінны быць выключаныя з продажу.
Чытайце таксама:
У Беларусі забаранілі папулярныя батончыкі «Фрута няня»
У Беларусі забаранілі «Казкі» Пушкіна, выдадзеныя «Умкай»
У Беларусі забаранілі прадаваць пральны парашок айчыннай вытворчасці
Забаранілі продаж расійскай грэчкі, якой толькі «надалі знешні выгляд і асобныя ўласцівасці»