У Шакуціна забралі гаротны даўгабуд «Шантэр Хіл» каля Драздоў
Як стала вядома «Нашай Ніве», колішні мільянер Аляксандр Шакуцін страціў не толькі «Амкадор», але і тое, у што ўкладваў усе прыбыткі ад дзейнасці — свой знакаміты даўгабуд на праспекце Пераможцаў.
«Наша Ніва» паведамляла, што ў пачатку 2025 года Аляксандр Лукашэнка нацыяналізаваў шматмільённыя даўгі свайго таварыша Аляксандра Шакуціна — перавёўшы «Амкадор» на баланс БелАЗа.
Чытайце: Лукашэнка нацыяналізаваў «Амкадор». Шакуцін стаў простым беларускім пенсіянерам
Заставаўся няясным лёс «Шантэр Хіла» — гіганцкага, у 140 тысяч квадратаў, комплекса на праспекце Пераможцаў, каля Драздоў.
«Шантэр Хіл». Фота: realt.onliner.by
Для яго ўзвядзення Шакуцін залез у кітайскі крэдыт на 120 мільёнаў даляраў, але так і не здолеў скончыць будаўніцтва, паралельна знякровіўшы і свой асноўны машынабудаўнічы бізнес.
Як цяпер становіцца вядома, будынак «Шантэр Хіла» і зямля пад ім таксама больш не належыць кампаніям Аляксандра Шакуціна.
Хто стаў новым уласнікам і на якіх умовах — пакуль невядома.