Хто той чацвёрты вайсковец ЗША, якога дагэтуль шукаюць?
Гэта шматдзетны бацька Трой Колінз, яму 28 гадоў.
Зніклы без вестак Трой Колінз з другой жонкай і дзецьмі. Фота з сацсетак
Гусенічная выратавальная машына M88 Hercules з чатырма амерыканскімі вайскоўцамі знікла падчас вучэнняў на палігоне ў Падброддзі каля мяжы з Беларуссю 25 сакавіка. Праз дзень тэхніку знайшлі на глыбіні каля пяці метраў у забалочанай мясцовасці. Пасля таго, як раніцай 31 сакавіка патанулую ў балоце на палігоне ў Падброддзі амерыканскую бронемашыну выцягнулі, армія ЗША афіцыйна пацвердзіла смерць траіх вайскоўцаў, яшчэ адзін вайсковец застаецца зніклым без вестак.
Абапіраючыся на допісы сваякоў у сацыяльных сетках, «Нашай Ніве» ўдалося пацвердзіць гібель Эдвіна Франка (Edvin Franco), Хасэ Дуэньеса (Jose Duenez Jr.) і Дантэ Гога Тайтана (Dante Gogo Taitano).
Зніклы Трой Колінз у вайсковай форме. Фота з сацсетак
Зніклы Трой Колінз. Фота з сацсетак
Чацвёртым членам экіпажа выратавальнай машыны, якая затанула ў балоце, быў Трой Кнатсан-Колінз (Troy Knutson-Collins), які жыў у 50-тысячным горадзе Батл-Крык у штаце Мічыган. Трой у шлюбе з Эйрэль, з якой мае дваіх малых дзяцей, хлопчыка і дзяўчынку.
Мяркуючы па адкрытых зборах на дапамогу сям'і Троя, у яго таксама засталіся тры дачкі ад першага шлюбу з Ханнай Мары. Старэйшай дачцэ 9 гадоў, а малодшай 3 гады.
Днём 31 сакавіка былая жонка Ханна апублікавала ў фэйсбуку допіс, у якім паведаміла, што ў Літве знойдзеныя і апазнаныя трое загінулых салдат, але сярод іх няма Троя — ён дагэтуль лічыцца зніклым без вестак.
Трой Колінз з былой жонкай. Фота з сацсетак
Незвычайным супадзеннем у гэтай сітуацыі выглядае затрыманне ў Маладзечне 27-гадовага амерыканца, які нелегальна трапіў у Беларусь з Літвы ў таварным цягніку.
Паводле адкрытых звестак, Трой Колінз нарадзіўся ў кастрычніку 1996 года, на сёння яму 28 гадоў. Узрост вельмі блізкі да ўзросту амерыканца, затрыманага ў Беларусі, але супадзенне не дакладнае.
Чытайце таксама:
Літоўскі генерал расказаў, што магло здарыцца з чацвёртым амерыканскім вайскоўцам, якога шукаюць