Топ-5 прычын, чаму беларусы найчасцей не праходзяць тэхагляд
«Белтэхагляд» апублікаваў статыстыку за сакавік: згодна з ёй, былі выдадзена 187 292 дазволы на допуск транспартных сродкаў да ўдзелу ў дарожным руху. 87,1% «дазволаў» — фізічным асобам.
На электрамабілі выдадзена 1470 дазволаў. 14,5% (30 290) аўтамабіляў, што заязджалі на дыягнастычныя станцыі, тэхагляд не прайшлі. Вось самыя распаўсюджаныя прычыны, чаму аўто не атрымалі «дазвол».
-
Першае месца ў топе няспраўнасцяў займаюць праблемы з тармазной сістэмай. 40,5% адмоваў у паспяховым праходжанні тэхагляду аўтааматары атрымліваюць менавіта з-за гэтага.
-
Дэфекты знешніх светлавых прыбораў — яшчэ адна распаўсюджаная прычына: 24,7% адмоваў.
-
Праблемы з рухавіком — у 6,9% тых, хто не змог прайсці тэхагляд.
-
З-за няспраўнасцяў рулявога кіравання «разварочваюць» 5,9% аўто.
-
5,4%, згодна са статыстыкай, прыпадае на «іншыя праверкі», без канкрэтыкі.
Таксама: 3,8% адмоваў — з-за шкла, прылад для падагрэву і абдзімання лабавога шкла, сонцаахоўных казыркоў. 3,3% аўтамабіляў не прайшлі тэхагляд з-за праблем з хадавой часткай. 2,4% — з-за шын. 2% — з-за няспраўнасцяў кузава.