У Латвіі прапанавалі цалкам забараніць тавары з Беларусі
Партыя «Нацыянальнае аб’яднанне» прапануе цалкам забараніць гандаль у Латвіі расійскімі і беларускімі таварамі, піша Rus.Tvnet.
Апазіцыйная партыя Латвіі распрацавала праект рашэння, які прадугледжвае забарону на гандаль таварамі расійскага і беларускага паходжання з 1 ліпеня гэтага года.
Як заявіў дэпутат Яніс Вітэнбергс, у латвійскіх крамах па-ранейшаму можна знайсці розныя тавары, вырабленыя ў Расіі і Беларусі, хаця санкцыі ЕС у дачыненні да гэтых краін дзейнічаюць ужо некалькі гадоў. Адмовіўшыся ад гандлю гэтымі таварамі, Латвія стане прыкладам для іншых краін ЕС і будзе спрыяць больш эфектыўнай рэалізацыі санкцыйнай палітыкі, лічыць дэпутат.
«Нацыянальнае аб’яднанне» адзначае, што вайна Расіі супраць Украіны і яе падтрымка з боку Беларусі стварылі сітуацыю, калі любы гандаль з гэтымі краінамі не толькі амаральны, але і з’яўляецца прамой падтрымкай эканомікі агрэсара.