Jak vyhladaje raskošny spa-kompleks časoŭ Rymskaj Impieryi? FOTY

Archieołahi znajšli i raskapali raskošnyja pryvatnyja łaźni ŭ Pampiejach, jakija byli pachavany pad płastom vułkaničnaha popiełu paśla trahičnaha vyviaržeńnia Viezuvija amal 2000 hadoŭ tamu. Voś jakija pasłuhi prapanoŭvaŭ i jak vyhladaje «staražytny spa-kompleks», jaki pryznačaŭsia vyklučna dla rymskich elit.

Adzin z pakojaŭ staražytnarymskaha łaźnievaha kompleksu, znojdzienaha na raskopkach u Pampiejach. Fota: Archeological Park of Pompeii Press Office Via AP

Pavodle archieołahaŭ, znachodka ŭjaŭlaje saboj raskošny pryvatny spa-kompleks, adzin z samych vialikich i dobra pradumanych budynkaŭ padobnaha typu, viadomych na siońnia. Antyčny kompleks z bankietnaj załaj, termalnymi łaźniami i ŭražalnymi mazaikami, byŭ znojdzieny ŭ centry vialikaha asabniaka, što naležaŭ, vierahodna, pradstaŭniku miascovaj elity, piša vydańnie The Sun.

Kompleks pabudavany bolš za 2000 hadoŭ tamu i moh źmiaščać da 30 haściej. U łaźniach byli praduhledžany try pakoi: kalidaryum (haračy), tepidaryum (ciopły) i fryhidaryum (chałodny basiejn). Paśla kupańnia hości mahli svabodna nakiroŭvacca ŭ bankietnuju zału, upryhožanuju scenami z hrečaskaj mifałohii, dzie ich čakała viačera pry śviečkach.

Takaja płaniroŭka asabniaka z ubudavanymi pryvatnymi łaźniami i ŭpryhožvańniami słužyła instrumientam demanstracyi statusu i bahaćcia pradstaŭnikoŭ rymskich elit. Niekatoryja ź ich taksama imknulisia pieratvaryć svaje damy ŭ hrečaskija pałacy, spartzały i himnazii, pieradaje The Sun sa spasyłkaj na archieołahaŭ.

Adzin z łaźnievych pakojaŭ z mazaičnaj padłohaj. Fota: Archeological Park of Pompeii Press Office Via AP

Centralny dvor kompleksu ź vialikim basiejnam (fryhidaryum). Fota: Archeological Park of Pompeii Press Office Via AP

Adnak raskopki vyjavili i inšaje. Na terytoryi spa-kompleksa znajšli cieły dvuch raboŭ i adnoj šlachietnaj žančyny, jakaja ściskała ŭ rukach kaštoŭnaści i załatyja maniety. Adna z rabyń była znojdziena ŭ kacielnaj, jakaja aciaplała łaźni, dzie, pavodle archieołahaŭ, pracavała ŭ vielmi ciažkich umovach, a padčas vyviaržeńnia Viezuvija pamierła nie ad udušša vułkaničnym popiełam, a ad uździejańnia zvyšharačych hazaŭ.

U takich achviaraŭ u Pampiejach litaralna zakipała kroŭ, a hałovy vybuchali ad pierahrevu.

Kamientary da artykuła