Jak žyvie Aleś Muchin, viadomy znaŭca «Što? Dzie? Kali?»

Niekatoryja viadomyja hulcy ŭ 2022-m pakinuli intelektualny kłub.

Fota ź instahrama Alesia Muchina

Vosieńniu 2020 hoda, kali ŭ Biełarusi praciahvalisia pratesty suprać falsifikacyi vybaraŭ i hvałtu siłavikoŭ, źjaviłasia infarmacyja, što vosieńskija i zimovyja hulni biełaruskaha intelektualnaha kłuba «Što? Dzie? Kali?» nie adbuducca.

Realnaja pryčyna — hulcy nie chacieli zdymacca dla telekanała ANT. Šmat chto sa znaŭcaŭ nie pahadžaŭsia ŭdzielničać u zabaŭlalnaj pieradačy na kanale, jaki skažaje hramadskija realii i stvaraje praŭładny naratyŭ.

Abmiarkoŭvalisia roznyja varyjanty. Adzin ź ich byŭ — znajści inšy kanał dla tranślacyi. Aleś Muchin, jaki ŭ biełaruskim kłubie «Što? Dzie? Kali?» kiraŭnik i viadoŭca, abiacaŭ prysłuchacca da pazicyi hulcoŭ.

Jon, z adnaho boku, abiacaŭ pašukać novy telekanał, ź inšaha — sprabavaŭ usio ž uhavaryć ludziej udzielničaŭ u televizijnych zdymkach dla ANT. Zapeŭnivaŭ: nijakaj palityki padčas vypuskaŭ «Što? Dzie? Kali?» nie budzie.

Muchin padkreślivaŭ, jak važnaja intelektualnaja pieradača dla biełaruskich hledačoŭ: «My ž nie prosta dajom piensijanieram zarablać hrošy, a jašče i niasiom niejkaje śviatło viedaŭ, pakazvajem, što ŭ Biełarusi jość ludzi ź intelektam. Prynamsi ja svajo zadačaj baču mienavita hetaje».

Zhodna z aficyjnaj viersijaj, zdymki intelektualnaj hulni tady admianili praz karanavirus.

Užo ŭ 2022 hodzie Aleś Muchin pravodziŭ hulniu dla biełaruskich prapahandystaŭ. Tady kapitanam byŭ supracoŭnik łukašenkaŭskaha puła Ihar Tur.

Varta adznačyć, što ŭ studzieni 2022 hoda pakinuli hulniu čatyry topavyja ŭdzielniki rasijskaha intelektualnaha kłuba, jašče niekatoryja znaŭcy pastavili svoj udzieł u šou na paŭzu.

Naprykład, uładalnica «Kryštalnaj savy» Darja Sałaviej adznačyła, što dla jaje nieprymalna stvarać kantent dla «zabojcaŭ, ich svajakoŭ i prosta zhodnych ź nieabchodnaściu zabojstva».

Kali ŭ 2021 hodzie z Muchinym hulali Viera Rabkina, Darja Sałaviej, Mikałaj Krapil, Dzianis Łahucin i Stanisłaŭ Miareminski, to ŭ 2022 hodzie na zdymkach rasijskaha «Što? Dzie? Kali?» źjaviŭsia tolki adzin Aleś.

Čym ciapier žyvie Aleś Muchin? Aproč intelektualnaha kłuba (Muchin viadzie na telebačańni biełaruski ŠDK i hulaje ŭ rasijskim kłubie), jon kiruje hrupaj kampanij «Karavan» — heta najbujniejšy pastaŭščyk harbaty i kavy ŭ Biełaruś. Taksama pieryjadyčna pravodzić dla biełaruskaj biznes-supolnaści lekcyi na temu taho, jak kiravać kalektyvam u kryzisnaj situacyi.

Niadaŭna jon raskazaŭ u instahramie, što zhulaŭ svaju šaścidziasiatuju hulniu «Što? Dzie? Kali?»: «Vielmi pryjemna svaim maleńkim jubilejem adkryvać siezon vialikaha jubileju — 50 hadoŭ lubimaj hulni, dy jašče i ŭ takoj kłasnaj kampanii! Jašče i 30 hadoŭ [rasijskaha] Pieršaha kanała hetaj hulnioj adznačyli. Heta było vielmi niezvyčajna i chvalujuča, za kamandu i za siabie… Usim dziakuj za padtrymku, darahija maje, my adčuvali heta praz ekran! «Što? Dzie? Kali?» nazaŭsiody!».

Pakolki hulnia była śviatočnaj, kamandu Muchinu padabrali niezvyčajnuju: ź im za stoł razam sieli zorki, siarod jakich byŭ i biełaruski šoŭmien Vadzim Hałyhin. Nie bieź ciažkaściaŭ, ale ź likam 6:5 kamanda znaŭcaŭ usio-taki pieramahła telehledačoŭ.

Niekalki miesiacaŭ tamu Aleś davaŭ intervju YouTube-kanału adnaho ź biełaruskich aŭtadyleraŭ. Adkazvajučy na pytańnie, dzie jamu bolš za ŭsio padabajecca adpačyvać, Muchin adznačyŭ:

— Na dačy, jakaja mnie dastałasia ad baćkoŭ. U cełym ja vielmi lublu padarožničać pa Biełarusi, mnie padabajucca biełaruskija harady, mnie padabajucca, napeŭna, miascovyja žychary, voś tak pravilna skazać. Ja lublu pryjechać, pasialicca ŭ niejkim hateli i pajści hulać pa horadzie. Ja historyk pa adukacyi, tamu mnie vielmi cikavaja architektura, cerkvy, kaścioły.

Muchin radujecca, što ŭ Biełarusi ciapier napłyŭ turystaŭ z Rasii, i kaža, što dziaržava pavinna raźvivać sietki hatelaŭ.

— Vydatna, što niejak u nas sučasnyja zapraŭki pačali źjaŭlacca, dzie možna i pierakusić, i, prabačcie, narmalna ŭ prybiralniu schadzić, čaho raniej nie było. I ŭ Biełarusi vialikaja budučynia ŭ suviazi z hetym.

Biznesoviec i znaŭca ličyć, što dobry adpačynak nieabchodny dla dobraj pracy, i zaklikaje nie saromiecca hetaha.

— U mianie ŭvieś čas naradžajucca novyja dzieci, tamu ich treba azdaraŭlać. Usie maje adpačynki, jak praviła, heta plažny adpačynak. Pryčym nie abaviazkova, što heta niejkaja supierekzotyka. Ja, naprykład, u Sočy lublu źlatać, pahulać pa nabiarežnaj. My i ŭ Śvietłahorsku Kalininhradskaj vobłaści byvajem, kali tam zdymajecca KVZ.

U bolš dalokich krainach Aleś taksama byvaje — za apošnija niekalki hadoŭ jość zdymki ź Ispanii, Šviejcaryi, Litvy, Łatvii, Dubaja, Turcyi, Tajłanda, Azierbajdžana. Ale ŭ dopisach Aleś nie zabyvaje adznačać, što hanarycca Biełaruśsiu.

Starejšamu synu Alesia ŭžo 28 hadoŭ, jon skončyŭ fakultet mižnarodnych adnosin BDU. Dačce 21 hod, i jana choča zajmacca psichałohijaj. Małodšy syn letaś pajšoŭ u pieršy kłas.

— Ja zaŭsiody svaich dziaciej vuču, što hałoŭny značny resurs žyćcia — heta čas. I ŭ zaležnaści ad taho, jak ty hetym časam rasparadžaješsia, ty bolš ci mienš paśpiachovy ŭ žyćci abo zusim nie paśpiachovy. Dyk voś, čas treba šanavać. U mianie ŭsio pytajucca: «Jak ty tak šmat usiaho paśpiavaješ?». Mabyć, heta prosta efiektyŭny tajm-mieniedžmient, plus razumieńnie taho, što niejkija rečy možna rabić adnačasova.

Muchin pryznajecca, što ciapier jamu brakuje času šmat knih čytać, jak jon pryvyk ź dziacinstva. Tamu jon pierajšoŭ na aŭdyjaknižki, jakija słuchaje ŭ samalocie ci za styrnom mašyny.

— Paviercie, kožnamu z nas zaŭsiody možna i treba znajści čas dla taho, kab prainviestavać u samoha siabie lubimaha, stać bolš prafiesijnym, stać bolš paśpiachovym.

Aleś žartuje, što pieršy raz zrazumieŭ, nakolki viedy patrebnyja ŭ žyćci, kali jaho ŭpieršyniu hadoŭ u 9—10 pacałavała dziaŭčynka i skazała: «Jaki ty razumny!».

Jon bačyć svaju misiju ŭ tym, što dapamahaje vyroščvać pakaleńni intelektuałaŭ.

— U Biełarusi da hetaha času isnuje hramadskaje abjadnańnie Biełaruskaj lihi intelektualnych kamand (ja kaliści stajaŭ la jaho vytokaŭ), nam užo bolš za 20 hadoŭ. My navat uklučanyja ŭ sistemu Ministerstva adukacyi. Viedajecie, u kožnaj škole jość dadatkovyja hurtki, jany ich abaviazany mieć. I voś vielmi časta ŭ škołach adzin z hurtkoŭ — heta jakraz naš hurtok intelektualnych hulniaŭ, kudy prychodziać znaŭcy ŭ tym liku biełaruskaha telekłuba «Što? Dzie? Kali?». My jak pijaniery intelektu prapaviedujem u škołach.

Kamientary da artykuła