«Zaŭsiody kuplajem dalary. My ž biełarusy». Ajcišnik raspaviadaje, jak vyhladaje jahony biudžet
«Kolki treba hrošaj, kab spakojna žyć u Biełarusi ź siamjoj, nie admaŭlajučy sabie ŭ bazavych rečach, ale i nie raskidvajučysia? Ja — sieńjor-raspracoŭščyk z abłasnoha centra, pracuju ŭ IT 4 hady i starajusia trymać vydatki pad kantrolem. Raskažu, na što idzie siamiejny biudžet, jak my płanujem traty i čamu navat pry dobrym zarobku važna ŭmieć adkładać», — raskazaŭ Siarhiej dla Devby.io.
«Adrazu adznaču — my žyviom u svajoj kvatery, tamu tracimsia tolki na kvartpłatu i internet. U miesiac vychodzić kala 250 rubloŭ. Ja žyvu z žonkaj, u nas jość dzicia.
Siamiejny biudžet — adčuvalnaja tema. Skažu tolki, što žyviom pa pryncypie «maje hrošy — ahulnyja hrošy, hrošy žonki — jaje asabistyja». Ja nie lezu ŭ jaje vydatki, ale adznaču, što jana ekanomny čałaviek. «Na voka» — jaje asabistyja vydatki kala 600 rubloŭ. My starajemsia adkładać jak maha bolš hrošaj na ciomnyja časy. My ž biełarusy!
A ciapier da vydatkaŭ.
Ježa
Ja lublu hatavać sam — heta mocna adciahvaje ad pracy i dazvalaje krychu adpačyć. To-bok, kali ŭ mianie sazvon ci prosta pierapynak, ja ŭklučaju YouTube na płanšecie i štości narazaju. Kali zvanok składany — YouTube nie ŭklučaju.
Pazaŭčora hatavaŭ płoŭ ź jałavičynaj, siońnia budu krucić roły. Časam, paśla taho jak zavozim dzicia ŭ škołu, zajazdžajem u miascovuju ŭniviersiteckuju stałovuju. Zbałansavanaje charčavańnie — prykładna za 13 rubloŭ z pary:)
U vyniku na pradukty i stałovuju idzie kala 700 rubloŭ u miesiac — dumaju, heta samaja vialikaja pazicyja vydatkaŭ.
Padpiski
Ja z tych «ołdaŭ», chto nie karystajecca padpiskami. U mianie dobry OLED-televizar i jość čas spampoŭvać z torentaŭ ciažkija filmy ŭ maksimalnaj jakaści. Ciapier vychodzić kuča pieravydańniaŭ filmaŭ u 4K, pra jakija ja raniej navat nie čuŭ — hladzim ich masava. A prahledžanyja raniej staryja filmy ŭ dobraj jakaści raskryvajucca zusim pa-novamu.
Heta trochi oftop. Uvohule, ciapier — 0 rubloŭ na padpiski, ale ŭ budučyni, chutčej za ŭsio, aformlu YouTube Premium: rekłamy stała zanadta šmat.
Zabavy
U zał ja nie chadžu, a ŭ žonki na sport — kala 150 rubloŭ. Kožnyja vychadnyja sustrakajemsia ź siabrami. Možam pasiadzieć doma — pahladzieć film, vypić čaho-niebudź, pahulać u nastołki. Byvaje, vychodzim u horad. Dumaju, heta abychodzicca prykładna ŭ 400 rubloŭ u miesiac.
Na vitaminy i BADy idzie jašče 400 rubloŭ u miesiac. Na zaniatki dla dziciaci idzie jašče 400 rubloŭ.
Adzieńnie
Sabie adzieńnie ja nie nabyvaju — u mianie jość nabor, jaki sa mnoj užo niekalki hadoŭ, i hetaha całkam dastatkova. Kali štości i nabyvaju, dyk tolki ŭ padarožžach. Da hetaha času našu krasoŭki, nabytyja ŭ 2019 hodzie. Krasovak u mianie šmat — ja nie askiet, prosta abutak taksama redka mianiaju, jak vidać. Na adzieńnie dla žonki i dziciaci sychodzić kala 150 rubloŭ u miesiac.
Rasterminoŭki
U śniežni 2024 hoda ŭpieršyniu ŭ žyćci ŭziaŭ štości ŭ rasterminoŭku. Patrebien byŭ novy robat-pyłasos, a dalar mocna ros. Dumaŭ, što z-za kursu tak budzie vyhadniej. U vyniku prajhraŭ u hrošach, ale robatam zadavoleny. Płaciež — 350 rubloŭ u miesiac.
Jašče afarmlaŭ kartu «Alfa 100 dzion». Pa joj vychodzić 500 rubloŭ u miesiac, ale hetyja srodki dalej my prosta tracim.
My niadaŭna nabyli davoli darahuju mašynu. Znoŭ ža, chacieli vyjhrać na kursavaj roźnicy. Uziaŭ kartu na 5000 rubloŭ, kab apłacić Kaska i inšyja drobiazi, źviazanyja z kuplaj. Nie atrymałasia — dalar potym upaŭ.
Inšyja vydatki
Nikoli tołkam nie ličyŭ, kolki my tracim u miesiac, chacia časam sprabavaŭ — kab z zarobku kupić jak maha bolš valuty, a astatniaje pakinuć na žyćcio (jak i bolšaść biełarusaŭ).
Zdajecca, tracim kala 400 rubloŭ. U asnoŭnym, hrošy iduć na štości spantannaje: žonka ŭbačyła, spadabałasia, nabyła i h. d. Suma, viadoma, bolšaja, ale ja addaju pieravahu praciahvać siabie padmanvać.
Vialikija vydatki ŭ 2024 hodzie:
Abnaviŭ PK na miažy 2023—2024 hoda — ukłaŭ 2000 u. a., pakul biez novaj videakarty (vieru, što znajdu čas dla hulniaŭ i tady dakuplu).
Novy telefon — 1000 u. a.; mianiać nie płanuju, technikaj nie zachaplajusia.
Apieracyja svajaku — 800 u. a.
Dźvie pajezdki ŭ adpačynak za hod — kala 5000 jeŭra (u 2024 hodzie vyjšła navat bolš).
Nabyŭ žoncy mašynu — 37 000 u. a.
U vyniku
Kali adkinuć usio «ekstra» i pakinuć tolki rucinu — ježu, kamunałku, zdaroŭje, vydatki na dzicia, adzieńnie, zabavy i ciapierašnija rasterminoŭki— na siamju z troch čałaviek my tracim kala 3450 rubloŭ u miesiac.
My abodva ŭśviedamlajem, što dla raspracoŭščykaŭ heta ŭsio moža chutka skončycca. Daviadziecca šukać novuju prafiesiju. Kali pašancuje — atrymajecca chutka, a kali nie, to, kab nie apynucca na dnie, treba zahadzia adkładać.
Skazaŭ čałaviek, jaki ŭkłaŭ 37 tysiač dalaraŭ u mašynu — ale heta sapraŭdy było toje, čaho daŭno chacieła žonka.
Zaraz my žyviom zvyčajnym žyćciom, nie raskidvajučysia hrašyma (prynamsi, na moj pohlad) i starajučysia maksimalna adkładać.