«Інтэр'еры з Pinterest» і «цэны як у Венецыі». У Гродне на месцы знесенага гістарычнага будынка адкрылі даражэнны буцік-гатэль

У Гродне на вуліцы Віленскай, 37 адкрыўся новы буцік-гатэль і рэстаран The Cult — і адразу выклікаў неадназначную рэакцыю праз цэны. Гатэль адкрыла гродзенская дызайнерка адзення Ірына Званко разам з мужам, піша Hrodna.life.

«Ён выглядае, як ажыўшая карцінка з Pinterest», — кажа ў тыктоку блогерка Алеся Баклага. Яна адзначыла якасны сэрвіс, вялікую колькасць жывых кветак і незвычайную мэблю. У кожным нумары ёсць міні-бар, кавамашына, індывідуальная сістэма кандыцыянавання і «сучасныя дэвайсы». Таксама ў нумарах ёсць выхады на маленькія французскія балконы. Блогерка раіць у гатэлі не толькі адпачываць, але і ладзіць фотасесіі ды зборы на вяселле.

Гатэль Cult. Крыніца: TikTok olesiabaklaha

Усяго ў гатэлі 10 нумароў з розным афармленнем плошчай ад 23 да 44 квадратных метраў. Ёсць нумары з працоўнымі зонамі, прасторнымі ваннымі пакоямі. На запыт могуць прапанаваць дзіцячыя ложкі і крэслы. Цэны — 450−700 рублёў за ноч.

Для параўнання, ноч у нумары апарт-гатэля «У Грушы» з пяці нумароў каштуе 180 рублёў, у гасцініцы «Славія» ў розных філіялах — 130−330 рублёў, у апарт-гатэлі «Сямашка» ў розныя даты — 270−550 рублёў, у «Кронан парк гатэлі» — 500−1050 рублёў.

Інтэр'еры гатэля Cult у Гродне. Фота: сайт гатэля

Гаспадыня: «У Мінску ўсё стыльна, у Гродне — штампавана»

Гаспадыні гатэля Ірыне Званко ў Гродне не хапае стыльнай установы.

«У Мінску ты заходзіш — і ўсё такое стыльнае, прадуманае, адпрацаванае з дызайнерамі. А ў Гродне — усё нейкае як кланаванае», — лічыць яна.

Ідэі для свайго гатэля Ірына з мужам Аляксандрам збіралі падчас падарожжаў, у гатэлях прэміум– і мідл-сегмента.

Вэнджаная смятана і ледзяная рыба на вуглях

Першы паверх гатэля заняў рэстаран з адкрытай кухняй, дзе можна назіраць за працэсам прыгатавання страў. У меню — шырокая вінная карта і нетрывіяльныя стравы.

Закускі каштуюць ад 25 да 55 рублёў. Сярод іх прапануюць крудо з тунца з манга і чылі (35 рублёў), камчацкага краба з капустай пак-чой і соусам шампань (55 рублёў), тартар з ялавічыны з мусам з пармезану і вэнджаным жаўтком (30 рублёў), карпача з ялавічыны з вэнджанай смятанай, грыбным мусам і чырвонай ікрой (35 рублёў).

У спісе салатаў (25−37 рублёў) — салата з томленай качкай, манга, апельсінам і страчатэлай.

Гарачыя стравы каштуюць 29−45 рублёў: ледзяная рыба на вуглях з цукіні і соусам альфрэда, міньён са свініны з пюрэ з белай фасолі і антонаўскіх яблыкаў, фаршыраваная перапёлка з орзата, стэйк рыбы з грыбамі эрынгамі і перцавым соусам і іншыя.

На сняданкі падаюць круасаны з начынкай, блінчыкі і дранікі, тосты і сырнікі, кашы. Ёсць і супы (25 рублёў), і дэсерты (20 рублёў).

«Цэны для Венецыі»

Хоць у рэстаране было шмат людзей, замову блогеркі прынеслі хутка. Праўда, прайс «вышэй за сярэдні», прызнае дзяўчына. За равіёлі з крабам, ваду і апельсінавы нектар яна заплаціла 64 рублі, пры гэтым 15 рублёў каштавала вада. Каментатараў гэта шакавала, як уразілі і цэны на нумары.

У рэстаране Cult. Крыніца: TikTok olesiabaklaha

«Даю год гэтай установе, у нас людзі столькі не зарабляюць, каб аддаваць столькі», — упэўнены matveyF.

«На жаль, можа туды і ўкладзена шмат грошай, але цэны не адпавядаюць рэальнасці, гэта ўсё ж такі Гродна, а не Венецыя, і тое. нават у Венецыі мала хто гатовы плаціць такія грошы за нумар», — адзначае Zoddy.

«Сімпатычная ўстанова, калі б межы былі адкрытыя, яна была б да месца…»

«Цэннік, вядома, ахавы, але для турыстаў ад цэнтра далёка, яны туды не ходзяць. А так разлічана на іх у большасці, я думаю», — лічыць anastasia_kulesh.

Дызайн інтэр'ераў выклікаў рознагалоссі.

«Дызайн быццам для людзей з парушанай псіхікай» і «смешны дызайн», — напісалі пра яго каментатары ў TikTok.

Былі тыя, каму спадабалася:

«Як прыгожа! Хачу туды!», — напісала карыстальніца llona.ikona.

У інстаграме Ірыны Званко захопленых водгукаў значна больш:

«Стварыць такое месца, далёка не кожны зможа, гэта проста ракета, а нумары — гэта асобны від раскошы»;

«Проста one love, так прыгожа! Дух захоплівае»;

«Дзякуй, што насычаеце наш горад такімі прыгожымі аб’ектамі».

Адна з каментатарак піша, што ўпершыню наведае Гродна дзеля гатэля.

«Я ўпэўнена, хутка і Мішлен будзе ваш», — лічыць другая.

Гатэль на месцы гістарычнага дома

Гатэль адкрыўся на месцы гістарычнага будынка 1900 года пабудовы, вядомага ў Гродне як «Дом Лютэка» (дом Ярмолавіча). Двухпавярховы, атынкаваны, вузкі будынак на высокім цокалі, з карнізам і дэкаратыўным міжпавярховым поясам, высокім арачным праездам з пілястрамі прадалі ў 2019 годзе. Будынак не меў статуса гісторыка-культурнай каштоўнасці.

У першапачатковым праекце было аднаўленне дома ў тых жа габарытах, планавалі дадаць дзве прыбудовы — з боку галоўнага фасада і да дваровага, гарышча перабудаваць у мансардны паверх. Будоўлю пачалі ў 2021 годзе — і першапачатковы дом цалкам знеслі. У выніку будынак цалкам перабудавалі, і ён страціў характэрныя рысы.

Дом Лютэка ў 2019 годзе (да зносу) і ў 2024 годзе. Крыніца: Urban Hrodna

«На год максімум, а знеслі каштоўнасць дзеля таго, каб людзі паспалі і паелі. Сум», — шкадуе Вікторыя ў каментарах да роліка пра гатэль.

Каментары да артыкула