«Interjery z Pinterest» i «ceny jak u Vieniecyi». U Hrodnie na miescy źniesienaha histaryčnaha budynka adkryli daraženny bucik-hatel

U Hrodnie na vulicy Vilenskaj, 37 adkryŭsia novy bucik-hatel i restaran The Cult — i adrazu vyklikaŭ nieadnaznačnuju reakcyju praz ceny. Hatel adkryła hrodzienskaja dyzajnierka adzieńnia Iryna Zvanko razam z mužam, piša Hrodna.life.

«Jon vyhladaje, jak ažyŭšaja karcinka z Pinterest», — kaža ŭ tyktoku błohierka Alesia Bakłaha. Jana adznačyła jakasny servis, vialikuju kolkaść žyvych kvietak i niezvyčajnuju meblu. U kožnym numary jość mini-bar, kavamašyna, indyvidualnaja sistema kandycyjanavańnia i «sučasnyja devajsy». Taksama ŭ numarach jość vychady na maleńkija francuzskija bałkony. Błohierka raić u hateli nie tolki adpačyvać, ale i ładzić fotasiesii dy zbory na viasielle.

Hatel Cult. Krynica: TikTok olesiabaklaha

Usiaho ŭ hateli 10 numaroŭ z roznym afarmleńniem płoščaj ad 23 da 44 kvadratnych mietraŭ. Jość numary z pracoŭnymi zonami, prastornymi vannymi pakojami. Na zapyt mohuć prapanavać dziciačyja łožki i kresły. Ceny — 450−700 rubloŭ za noč.

Dla paraŭnańnia, noč u numary apart-hatela «U Hrušy» ź piaci numaroŭ kaštuje 180 rubloŭ, u haścinicy «Słavija» ŭ roznych filijałach — 130−330 rubloŭ, u apart-hateli «Siamaška» ŭ roznyja daty — 270−550 rubloŭ, u «Kronan park hateli» — 500−1050 rubloŭ.

Interjery hatela Cult u Hrodnie. Fota: sajt hatela

Haspadynia: «U Minsku ŭsio stylna, u Hrodnie — štampavana»

Haspadyni hatela Irynie Zvanko ŭ Hrodnie nie chapaje stylnaj ustanovy.

«U Minsku ty zachodziš — i ŭsio takoje stylnaje, pradumanaje, adpracavanaje z dyzajnierami. A ŭ Hrodnie — usio niejkaje jak kłanavanaje», — ličyć jana.

Idei dla svajho hatela Iryna z mužam Alaksandram źbirali padčas padarožžaŭ, u hatelach premium– i midł-siehmienta.

Vendžanaja śmiatana i ledzianaja ryba na vuhlach

Pieršy pavierch hatela zaniaŭ restaran z adkrytaj kuchniaj, dzie možna nazirać za pracesam pryhatavańnia straŭ. U mieniu — šyrokaja vinnaja karta i nietryvijalnyja stravy.

Zakuski kaštujuć ad 25 da 55 rubloŭ. Siarod ich prapanujuć krudo z tunca z manha i čyli (35 rubloŭ), kamčackaha kraba z kapustaj pak-čoj i sousam šampań (55 rubloŭ), tartar ź jałavičyny z musam z parmiezanu i vendžanym žaŭtkom (30 rubloŭ), karpača ź jałavičyny z vendžanaj śmiatanaj, hrybnym musam i čyrvonaj ikroj (35 rubloŭ).

U śpisie sałataŭ (25−37 rubloŭ) — sałata z tomlenaj kačkaj, manha, apielsinam i stračatełaj.

Haračyja stravy kaštujuć 29−45 rubloŭ: ledzianaja ryba na vuhlach z cukini i sousam alfreda, mińjon sa śvininy ź piure ź biełaj fasoli i antonaŭskich jabłykaŭ, faršyravanaja pierapiołka z orzata, stejk ryby z hrybami erynhami i piercavym sousam i inšyja.

Na śniadanki padajuć kruasany z načynkaj, blinčyki i draniki, tosty i syrniki, kašy. Jość i supy (25 rubloŭ), i desierty (20 rubloŭ).

«Ceny dla Vieniecyi»

Choć u restaranie było šmat ludziej, zamovu błohierki prynieśli chutka. Praŭda, prajs «vyšej za siaredni», pryznaje dziaŭčyna. Za ravijoli z krabam, vadu i apielsinavy niektar jana zapłaciła 64 rubli, pry hetym 15 rubloŭ kaštavała vada. Kamientataraŭ heta šakavała, jak urazili i ceny na numary.

U restaranie Cult. Krynica: TikTok olesiabaklaha

«Daju hod hetaj ustanovie, u nas ludzi stolki nie zarablajuć, kab addavać stolki», — upeŭnieny matveyF.

«Na žal, moža tudy i ŭkładziena šmat hrošaj, ale ceny nie adpaviadajuć realnaści, heta ŭsio ž taki Hrodna, a nie Vieniecyja, i toje. navat u Vieniecyi mała chto hatovy płacić takija hrošy za numar», — adznačaje Zoddy.

«Simpatyčnaja ŭstanova, kali b miežy byli adkrytyja, jana była b da miesca…»

«Ceńnik, viadoma, achavy, ale dla turystaŭ ad centra daloka, jany tudy nie chodziać. A tak raźličana na ich u bolšaści, ja dumaju», — ličyć anastasia_kulesh.

Dyzajn interjeraŭ vyklikaŭ roznahałośsi.

«Dyzajn byccam dla ludziej z parušanaj psichikaj» i «śmiešny dyzajn», — napisali pra jaho kamientatary ŭ TikTok.

Byli tyja, kamu spadabałasia:

«Jak pryhoža! Chaču tudy!», — napisała karystalnica llona.ikona.

U instahramie Iryny Zvanko zachoplenych vodhukaŭ značna bolš:

«Stvaryć takoje miesca, daloka nie kožny zmoža, heta prosta rakieta, a numary — heta asobny vid raskošy»;

«Prosta one love, tak pryhoža! Duch zachoplivaje»;

«Dziakuj, što nasyčajecie naš horad takimi pryhožymi abjektami».

Adna z kamientatarak piša, što ŭpieršyniu naviedaje Hrodna dziela hatela.

«Ja ŭpeŭniena, chutka i Mišlen budzie vaš», — ličyć druhaja.

Hatel na miescy histaryčnaha doma

Hatel adkryŭsia na miescy histaryčnaha budynka 1900 hoda pabudovy, viadomaha ŭ Hrodnie jak «Dom Luteka» (dom Jarmołaviča). Dvuchpaviarchovy, atynkavany, vuzki budynak na vysokim cokali, z karnizam i dekaratyŭnym mižpaviarchovym pojasam, vysokim aračnym prajezdam ź pilastrami pradali ŭ 2019 hodzie. Budynak nie mieŭ statusa historyka-kulturnaj kaštoŭnaści.

U pieršapačatkovym prajekcie było adnaŭleńnie doma ŭ tych ža habarytach, płanavali dadać dźvie prybudovy — z boku hałoŭnaha fasada i da dvarovaha, haryšča pierabudavać u mansardny pavierch. Budoŭlu pačali ŭ 2021 hodzie — i pieršapačatkovy dom całkam źnieśli. U vyniku budynak całkam pierabudavali, i jon straciŭ charakternyja rysy.

Dom Luteka ŭ 2019 hodzie (da znosu) i ŭ 2024 hodzie. Krynica: Urban Hrodna

«Na hod maksimum, a źnieśli kaštoŭnaść dziela taho, kab ludzi paspali i pajeli. Sum», — škaduje Viktoryja ŭ kamientarach da rolika pra hatel.

Kamientary da artykuła