U Minsku zapuskajuć servis z chatniaj ježaj, hatavać mohuć usie
Syrniki na śniadanak «jak u mamy», draniki z mačankaj na abied «jak u babuli». Troje ajcišnikaŭ razam zapuskajuć startap shlp.by pa dastaŭcy chatniaj ježy i zaviaršyli testavy pieryjad, piša Devby.io.
Ideja takaja, tłumačyć kafaŭndar Aleś: adnyja biełarusy hatujuć i dastaŭlajuć smačnuju ježu, a inšyja mohuć jaje zamović (Google Play, App Store). Užo možna rabić zamovy, adnak «kuchniaŭ» — tak kamanda nazyvaje tych, chto hatuje na ich płatformie — pakul niašmat, a zony dastaŭki pa rajonach abmiežavanyja.
Ciapier raspracoŭščyki pryciahvajuć «kuchni» i prosiać raskazać pra inicyjatyvu znajomym u Minsku. «Kuchni» pracujuć na siabie, jany sami dastaŭlajuć ježu (biaspłatna) — zamaŭlajučy ŭ ich, možna padtrymać rublom susiedziaŭ.
«Mama zachacieła stać pieršaj «kuchniaj»
Ideja shlp.by uźnikła ŭ Alesia dva hady tamu, kali jon žyŭ u Batumi.
«Ja pracavaŭ mieniedžaram u IT — a heta pastajannyja sazvony: dniom hatavać nie paśpiavaješ, tamu ŭsio zakančvałasia ŭviečary smažanymi pielmieniami ci dastaŭkaj, jak by ja ni namahaŭsia charčavacca narmalna».
Praz hod u Batumi pierajechała mama Alesia. Śpiecyjalnaść, pa jakoj jana pracavała ŭ Minsku, u Hruzii była nie zapatrabavanaja: žančynie prapanoŭvali tolki miesca pasudamyjki. «Z šalonym hrafikam i śmiešnaj zarpłataj: 50 łary (kala 17 dołaraŭ) za 14-hadzinnuju źmienu».
U toj momant razam z druhim kafaŭndaram jany «krucili» roznyja idei startapaŭ — u tym liku i servisa chatniaj ježy. Aleś padzialiŭsia z mamaj. Jana ŭklučyłasia, zachacieła stać pieršaj «kuchniaj». Zamoŭcam pavinien byŭ vystupić sam Aleś.
«Ideja pryvabnaja tym, što jaje možna raspaŭsiudzić na tysiačy inšych mam, tat, babul i dziadul, jakija pracujuć na ciažkich, nizkaapłatnych pracach i, napeŭna, byli b nie suprać hatavać i dastaŭlać ježu ludziam, što žyvuć pobač ź imi».
Mama Alesia spačatku hatavała tolki jamu, ale potym praz abjavy znajšła bolš klijentaŭ, stvaryła telehram-kanał — i niadrenna raskruciłasia.
«Na padstavie insajdaŭ, jakija my atrymlivali, nazirajučy za tym, jak jana pracuje, jak raźvivajecca jaje kanał i raście kolkaść zamoŭ, my dalej pracavali nad kanceptam płatformy.
Naprykład, my doŭha dumali: kiepska, kali «kuchnia» dastaŭlaje sama — heta moža pavialičvać košt zamovy. Ale maja mama dakazała, što my pamylalisia. Jana sama vaziła zamovy klijentam, znajomiłasia, razmaŭlała — i hetyja znosiny pierarastali ŭ siabroŭstva, tak źjaviłasia cełaja ŭtulnaja supołka».
«Znajšli šmat «trupaŭ» startapaŭ, uličyli mnostva čužych pamyłak»
Na kancept pajšło try miesiacy, uzhadvaje Aleś. Było šmat pytańniaŭ:
- Jak arhanizavać dastaŭku? U čym dastaŭlać — u adnarazovych kantejnierach ci šmatrazovych?
- Jak zachavać prymalny prajs dla klijenta, pry hetym kab «kuchnia» mahła narmalna zarablać?
- Ci varta pierakłaści vyznačeńnie cenaŭ na «kuchni» abo płatforma pavinna rabić heta sama?
- Jak vyrašyć prablemu, kali «kuchnia» atrymlivaje 10 roznych zamoŭ — treba niedzie zachoŭvać šmat praduktaŭ, dy i hatavać stolki niazručna?
Aleś nie chavaje: jany «pajšli padhladać u kankurentaŭ — samy žyvy ciapier shef.com».
«Znajšli šmat «trupaŭ» startapaŭ: niekatoryja złamalisia na tym, što ŭ ich byŭ samavyvaz, niechta nie zdoleŭ prabić «krytyčnuju masu karystalnikaŭ» — karaciej, kupa čužych pamyłak. My ich vyvučyli i vyrašyli niekatoryja pytańni pa-svojmu, pačali rabić dyzajn-kancepty i źbirać kamandu».
Usiaho zaraz u startapie 12 čałaviek z ulikam buchhałtara, jurysta i «siabra, jaki ŭkłaŭsia hrašyma». Ale aktyŭna i pastajanna nad prajektam pracuje 6 čałaviek.
«Nie ŭsie pracujuć fułtajm. Usio ž taki amal całkam sami finansujem hety prajekt, tamu vielmi aściarožnyja ź biudžetam», — tłumačyć surazmoŭca.
«Pradukt u nas niaprosty (sami nie čakali). Treba vyrašyć prablemu kurycy i jajka»
«Pieršaja viersija aplikacyi była hatovaja ŭ śniežni 2024 hoda. Sa śniežnia pa sakavik my testavali: nabyvali rekłamu, pryvodzili «kuchni», apytvali, razmaŭlali, znoŭ testavali — za hety čas «kuchni» pryhatavali dla karystalnikaŭ 60 zamoŭ».
Zaraz faza testavańnia ŭžo zavieršanaja, kamanda rychtujecca da vialikaha zapusku.
«Prablema ŭ tym, što nam treba pieraadoleć krytyčnuju masu karystalnikaŭ. Pradukt u nas vielmi niaprosty (sami nie čakali). Treba vyrašyć kłasičnuju prablemu kurycy i jajka: z adnaho boku, da nas prychodziać «kuchni», ale im patrebnyja zamovy; a ź inšaha boku, prychodziać karystalniki — i im patrebnyja «kuchni», jakija vystaŭlali b stravy ŭ mieniu».
Zaraz u kamandy piać «kuchniaŭ», jakija čakajuć vialiki zapusk, kab pačać prapanoŭvać svaje mieniu dla karystalnikaŭ.
«Ale naš płan — sabrać minimum tryccać «kuchniaŭ» u Minsku: tady vybar straŭ budzie bolšym, i karystalniki nie buduć sychodzić».
Aleś ličyć, što z pryciahnieńniem «kuchniaŭ» mohuć dapamahčy i sami karystalniki: jany raskažuć svaim baćkam, rodnym i siabram pra prajekt — a tyja dałučacca, kali zachočuć. Surazmoŭca ŭpeŭnieny, što dla niekatorych — heta šaniec źmianić svajo žyćcio da lepšaha.
«My ŭkłali kala $40 tysiač i biaskoncuju kolkaść pracy»
U prajekt układziena kala 40 tysiač dalaraŭ. Aleś tłumačyć: heta ŭ asnoŭnym zarobki kamandy (samim sabie kofaŭndary, zrazumieła, zarobki nie płaciać) i markietynh padčas testavańnia.
«Ale hałoŭnaje, što my ŭkłali — biaskoncuju kolkaść hadzin pracy. I faŭndary, i kamanda nibyta addali častku siabie prajektu, u spadzievie, što ŭsio atrymajecca, niahledziačy na žudasnuju statystyku «śmierciaŭ» startapaŭ», — kaža surazmoŭca.
Havoračy pra płany, Aleś jašče raz padkreślivaje, što ich hałoŭnaja meta — «prabić miažu «krytyčnaj masy karystalnikaŭ» u Minsku i vyjści na punkt biasstratnaści». Tak jany zmohuć płacić zarobki kamandzie biez pryciahnieńnia źniešnich inviestycyj i raźvivać pradukt u Biełarusi.
«A dalej — jak atrymajecca. Mahčyma, my zmožam pašyrycca i na inšyja rynki, ale tut vielmi šmat jurydyčnych niuansaŭ dla kožnaha kankretnaha rynku».
«Ź jurydyčnaha punktu hledžańnia Biełaruś — adna z samych «zručnych» krain»
Na pytańnie, čamu startap zapuskajecca ŭ Biełarusi, Aleś adznačaje, što ź jurydyčnaha punktu hledžańnia heta adna z samych «zručnych» krain dla ich prajektu.
— «Kuchni» adkryvajuć samazaniataść, i ŭ pieraliku vidaŭ dziejnaści jość «realizacyja spažyŭcam hatovaj kulinarnaj pradukcyi».
My kansultavalisia ź jurystami — i zrazumieli, što heta ŭsio, što im spatrebicca. Adkryć (ci zakryć) samazaniataść — heta kala 10 chvilin anłajn, i raz u miesiac płacić 10% padatku z dachodu — i ŭsio.
Jość jašče adna važnaja pryčyna, kaža surazmoŭca:
«My sami ź Biełarusi — viedajem, jak tut usio ŭładkavana, razumiejem miascovyja miemy i žarty, i z ulikam abmiežavanaha biudžetu hety zapusk adčuvajecca jak bolš prosty z punktu hledžańnia razumieńnia miascovaha markietynhu i blizkaści kulturnaha kodu».
Aleś dadaje, što dla «kuchniaŭ» na płatformie raspracavanyja ŭnutranyja praviły, jakija jany abaviazanyja vykonvać. Instrukcyi patrabujuć ad «kuchni» rabić fota pierad pačatkam hatavańnia, nasić śpiecyjalnyja šapački, mieć asobnyja nažy i doški dla miasa, ryby i inšych praduktaŭ i tamu padobnaje.
«U nas «kuchni» samastojna dastaŭlajuć svaje zamovy pa zručnaj dla ich zonie dastaŭki — hetak ža, jak robić maja mama. Kali jość asabisty kantakt, kali «kuchnia» viedaje čałavieka, jakomu jana prynosić ježu — jana pačynaje hatavać navat lepš, čym dla svajoj ułasnaj siamji. Heta jak kali b prychodzili hości — tolki «kuchnia» sama adnosić ježu haściam.
Maja mama, naprykład, raniej hatavała mnie tak, jak zvyčajna heta robiać mamy ŭ siamji. A kali pačała hatavać dla inšych ludziej, adkaznaść mocna ŭzrasła: źjavilisia i śpiecyjalnaja šapačka dla hatavańnia, i palčatki (kali treba), i fartuch, i asobnyja nažy, i doški dla syroha miasa, i šmat usiaho. Na jaje kuchni zaraz sterylnaść, jak u apieracyjnaj — zdajecca, nie ŭ kožnym restaranie možna ŭbačyć takoje».
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary