Sacyjołah pra anłajn-ankietu ad Turčyna: Ničym nie adroźnivajecca ad apytańnia na sajcie «Našaj Nivy»

Ekśpiert adrazu adznačaje, što ŭ farmuliroŭcy pytańniaŭ šmat pamyłak, jakich być nie pavinna, kali my kažam pra niejkaje surjoznaje daśledavańnie.

— Naprykład, jany pytajucca: «Jakija kirunki žyllovaj palityki Vy ličycie pryjarytetnymi?». I niama adkazu kštałtu «ja nie liču, što žyllovaja palityka — heta niešta pryjarytetnaje». Ci pytańnie «jakija miery daduć mahčymaść pavysić efiektyŭnaść ahrapramysłovaha kompleksu?», dzie prosiać vybrać ad 1 da 4 adkazaŭ. A što, kali respandent dumaje, što ŭsie hetyja varyjanty dazvolać pavysić?

Filip Bikanaŭ adznačaje, što prafiesijanały nikoli b nie prapuścili takija niedakładnaści. Pa jaho mierkavańni, nichto asabliva nie staraŭsia, składajučy ankietu.

Pavialičyć

Ale nie vielmi karektna sfarmulavanyja pytańni — heta daloka nie hałoŭnaja prablema daśledavańnia. Hałoŭnaja prablema — vybarka.

— Kab daśledavańnie pakazała, što sapraŭdy miarkujuć biełarusy, treba, kab vybarka była imaviernasnaja. To-bok šaniec trapić u hetuju vybarku pavinien być pryblizna adnolkavy ŭ kožnaha biełarusa. Ale ž zrazumieła, što heta nie tak.

Ekśpiert nie maje iluzij na temu taho, chto ž prymie ŭdzieł u dziaržaŭnym apytańni.

— Ja nie viedaju, jak jany buduć hetuju spasyłku raspaŭsiudžvać. Ale niešta mnie padkazvaje, što zahad spuściać u pracoŭnyja kalektyvy i prymusiać rabočych i biudžetnikaŭ niešta zapoŭnić.

Atrymlivajecca, što ludzi, jakija nie zaniatyja ŭ dziaržaŭnym siektary ekanomiki i nie hladziać dziaržaŭnaje telebačańnie (ci prapuścili hetuju abviestku) nikoli nie daviedajucca, što idzie apytańnie i jość mahčymaść vykazacca.

— Heta ničym nie adroźnivajecca ad taho, kali b «Naša Niva» na svaim sajcie apublikavała niejkaje apytańnie. Bo ludzi, jakija nie čytajuć «Našu Nivu», nie majuć mažlivaści patrapić u vybarku. Rabić vysnovy pra biełaruskaje hramadstva ŭ takoj situacyi niapravilna mietadałahična.

Tamu ŭ praŭładnym apytańni vybarka budzie skošanaja ŭ bok ludziej, jakija pracujuć na dziaržaŭnych pradpryjemstvach, dzie ideołahi adkazna staviacca da svajoj pracy.

— Jašče adna prablema: kab dziaržava atrymała ščyryja adkazy, ludzi musiać mieć niejki davier da jaje i razumieć, što paśla tych ščyrych adkazaŭ da ich nichto nie pryjdzie. Ciapier uzrovień paranoi ŭ biełaruskim hramadstvie dastatkova vysoki — što ŭ ludziej, jakija suprać režymu, što i ŭ tych, chto ź liku «aby čaho nie zdaryłasia». Tamu imavierna, što adkazać na pytańni ryzyknuć tyja, chto padtrymlivaje dziaržaŭnuju palityku. A takija adkazy analizuj ci nie analizuj, ale heta nie reprezientuje mierkavańnie ŭsich biełarusaŭ. Vyniki apytańnia možna budzie pakazać Łukašenku, Turčynu — kamu zaŭhodna. I hetyja ludzi zmohuć zrabić vysnovu: «Voś napramak, u jakim my musim ruchacca, taki». Ale heta napramak padabajecca tolki zhadanaj raniej hrupie ludziej, a nie ŭsioj Biełarusi. Heta nie sacyjałohija.

Nahadajem: da 16 krasavika biełarusy mohuć prajści apytańnie na partale Mierkavańnie.bieł. U im zmohuć uziać udzieł usie achvotnyja. Biełarusam zamiežža paŭdzielničać składaniej, mahčyma, daviadziecca šukać biełaruski IP-adras.

• 6
• 0
• 1
• 5
• 0
• 0
• 0
• 0