Не так даўно Аляксандр Лукашэнка прызначыў новага прэм'ер-міністра — ім стаў Аляксандр Турчын. Асабістае жыццё чыноўніка ахутанае таямніцай. З афіцыйных паведамленняў вядома толькі, што ён жанаты і мае дачку. Спартыўнае выданне «Трыбуна» прыгледзелася да сям'і Турчына.
«Тата можа ўсё»
Дар'я Турчына нарадзілася ў 1995 годзе ў Навагрудку. Яе бацьку на той момант было 20 гадоў. Дзяўчынка спачатку вучылася на малой радзіме, а потым перавялася ў Мінскі абласны ліцэй.
Па сканчэнні школы дачка Турчына паступіла ў Мінскі дзяржаўны лінгвістычны ўніверсітэт і падчас навучання актыўна вяла твітар, дзе пісала і пра адукацыю, і пра асабістае, і пра палітыку.
Некалькі разоў яна ўспамінала бацьку Аляксандра Турчына. «Мой тата можа ўсё. Люблю яго», — пісала яна ў сакавіку 2014-га. Літаральна праз тыдзень з'явіўся яшчэ адзін твіт: «Толькі тата, калі бачыць, што я сплю, падыдзе і разбудзіць, каб пераканацца, што я сплю».
Рэпосціла твіты ў падтрымку Расіі
Пра вучобу яна пісала так: «Шэрасць. Бызвыходнасць. Сумна. Гэта ўсё пра ўніверсітэт». А ў іншым допісе скардзілася на складанасць напісання эсэ па-англійску, калі «цяжка нават на рускай мове пару сказаў напісаць».
Вясной 2014-га Расія захапіла Крым, а на Данбасе пачаліся баявыя дзеянні.
З гэтага часу Дар'я актыўна рэпосціць прапагандысцкія суполкі, якія падтрымліваюць Пуціна і Расію. На футбольным чэмпіянаце свету-2014 Турчына збіралася заўзець за Расію.
Актыўна аднаўляўся твітар дзяўчыны да верасня 2015 года.
«Марыла звязаць жыццё з сілавымі структурамі»
У шлюбе Дар'я носіць прозвішча Боднар. Яе абранцам стаў супрацоўнік міністэрства па надзвычайных сітуацыях Ілля Боднар. Хлопец на год маладзейшы за жонку, ён ураджэнец Ганцавічаў Брэсцкай вобласці.
Ілля і Дар'я Боднары. Фота з mchs.gov.by.
Сваю гісторыю кахання Дар'я і Ілля расказалі ў 2022 годзе сайту МНС.
«З дзяцінства я марыла звязаць сваё жыццё з сілавымі структурамі, дапамагаць людзям займацца чымсьці важным і карысным. Але калі паўстала пытанне аб выбары прафесіі, то паслухалася бацькоў і паступіла ў МДЛУ на факультэт англійскай мовы», — казала Турчына.
У публікацыі говорыцца, што пасля вучобы ва ўніверсітэце Дар'я атрымала пасаду інспектара сектара міжнароднага супрацоўніцтва ў Рэспубліканскім атрадзе спецыяльнага прызначэння «Зубр». Там жа працаваў і Ілля Боднар.
«Стасавацца мы пачалі адразу, але першапачаткова размовы былі сяброўскімі. А пасля года знаёмства мы пачалі адносіны ў якасці пары», — працягвала Дар'я.
Падраздзяленне МНС «Зубр» было заснаванае напрыканцы існавання БССР — 15 траўня 1991 года. Асноўная мэта — рэагаванне на прыродныя і тэхнагенныя катастрофы. У склад «Зубра» ўваходзяць хімікі, узрывальнікі, альпіністы, вадалазы, кінолагі і іншыя.
Прадстаўнікі «Зубра» рэгулярна ўдзельнічаюць у выратавальных аперацыях за межамі Беларусі. 27-гадовы Ілля Боднар на сённяшні дзень займае пасаду намесніка начальніка цэнтра пошука-выратавальных работ і пажаратушэння «Зубра».
Здымае на тэлефон
Сваю старонку ў інстаграме Дар'я Боднар закрыла, але журналісты паспелі яе паглядзець. Цяпер сябе яна пазіцыянуе так: «Здымаю на тэлефон, амбасадар кавы, у сторыз паказваю будні».
Пры гэтым адкрытай засталася старонка ў сацыяльнай сетцы threads. У пары ёсць маленькае дзіця. І Дар'я, і Ілля актыўна займаюцца спортам — гэта і прабежкі, і розныя практыкаванні.
Дар'я Боднар. Фота з threads
«Я вырашыла для сябе, што гэты год дысцыпліны, штодзённа ў маім жыцці павінна прысутнічаць фізічная нагрузка. Учора гэта быў паўнавартасны трэнінг, кардыа і хадзьба. Сёння доўгае кардыа, каб аднавіцца пасля ўчорашняга трэнінгу. Лянота, але прымушаю сябе, каб развіць звычку, палюбіць гэта», — пісала дзяўчына ў пачатку 2025 года.
Зяць Турчына гуляе ў аматарскай футбольнай лізе
Пара часта вандруе па Беларусі, ходзіць у розныя кавярні ў Мінску. Здымкаў з замежжа адшукаць не ўдалося. Невядома, ці працягвае дзяўчына працу ў МНС, аднак можна з упэўненасцю казаць, што яна захапілася фатаграфіяй. Ладзіць фотасесіі для ахвочых.
Захапленнем Іллі Боднара з'яўляецца футбол. Ён гуляе ў аматарскай лізе АЛФ за каманду АФК «Варгі». Апошнія два гады пазіцыя Боднара пазначана як «брамнік», але ў 2017 годзе ён пачынаў паўбаронцам.
Ілля і Дар'я Боднары. Фота з mchs.gov.by
Раней ён выступаў за калектывы «Тотэн», «Грабары» і «Фенікс».
У сацыяльнай сетцы «Укантакце» хлопец падпісаны ў асноўным на суполкі бодыбілдэраў і фітаняшак.
Дар'я ніяк не абазначае ў сацыяльных сетках, што яна дачка прэм'ер-міністра Аляксандра Турчына. Няма там фотак з бацькам і ўвогуле згадак пра яго.
Цяпер чытаюць
Пракурорскі начальнік абурыўся неабгрунтаванымі затрыманнямі беларусаў2
Каментары