«Гэтулькі ўсяго цікавага даведаешся са сшыткаў»: малады настаўнік хіміі стаў папулярным у тыктоку

Андрэй Роскач ужо другі год працуе ў адной са сталічных школ настаўнікам хіміі. Ён прызнаецца, што любіць сваю працу. Кажа, што бацькі марылі, каб сын стаў доктарам, як яго дзядуля. Але хлопец у 11 класе канчаткова зразумеў, што яго пакліканне — стаць настаўнікам. Таму ў педагагічны ўніверсітэт пайшоў для таго, каб рэалізаваць сваю мару.

Тыкток маладога настаўніка сапраўды адрозніваецца пазітыўным настроем. Ён запісвае іранічныя відэа пад трэндавую музыку і жартуе, што адчувае сябе супрацоўнікам «Макдональдса», калі раскладае па латках усё неабходнае для лабараторнай працы.

Хлопец спрабуе развенчваць стэрэатыпы, звязаныя з яго працай:

— Часта чую меркаванне пра настаўнікаў: «Ды божачкі, што там працаваць у школе?! У вас працоўны дзень да гадзіны, вы адвялі свае ўрокі — і пайшлі дахаты адпачываць». Але чамусьці ніхто не ведае і не думае пра тое, што мы маем праверку сшыткаў. Нам трэба таксама рыхтавацца да заняткаў, як і школьнікі рыхтуюцца. Мы пішам планы канспектаў, нейкія раздатачныя матэрыялы, прэзентацыі робім. Гэта займае шмат часу.

@a.roskach

Ну от части он прав!

♬ оригинальный звук - ANDREI ROSKACH

У тыктоку Андрэй распавядае і пра смешныя моманты працы настаўніка. Вось, напрыклад, пра што ён даведаўся, калі правяраў кантрольную працу адзінаццацікласніка:

— Заданне было: «Пералічыце вядомыя вам спосабы атрымання металаў з руд». Вучань адказвае: «Ёсць шахцёры, у іх ёсць кірка і іншыя інструменты. У іх ёсць шахты, куды яны ходзяць здабываць усякія руды». Я лічу, гэта 10 з 10. Люблю сваю працу. Вельмі шмат усяго цікавага даведаешся са сшыткаў.

І строгім настаўнікам Андрэй таксама можа быць. Так, напрыклад, ён прызнаецца, што прынцыпова не дае дадатковыя заданні вучням пры канцы чвэрці, калі тыя просяць аб магчымасці як-небудзь выправіць выніковую адзнаку. Бо лічыць, што няправільна, калі дзіця ўсю чвэрць лынды біла, а на апошнім тыдні раптам вырашыла нешта рабіць. Але прызнаецца, што калі бачыць шчырую зацікаўленасць, то ўсё ж ідзе насустрач у адзінкавых выпадках.

Найбольш папулярны ролік Андрэя набраў больш за мільён праглядаў і каля 80 тысяч лайкаў. У ім настаўнік назірае за вучнем, які не можа правільна выканаць заданне ля дошкі. На заднім фоне чуваць дзіцячы смех і спробы падказаць аднакласніку.

У каментарыях захапляюцца Андрэям і пішуць, што, калі б па ўсіх прадметах былі такія настаўнікі, дык дзеці з задавальненнем хадзілі б у школу. Але не ўсе нават адразу вераць, што гэты малады хлопец — сапраўды настаўнік, а не вучань.

У адным з найбольш залайканых каментарыяў жанчына выказвае павагу за тое, што па відэа бачна: настаўнік не прыгнятае вучняў, якія не баяцца выказаць уласнае меркаванне.

«Я з першых дзён стараюся растлумачыць вучням, што рабіць памылкі — гэта нармальна, выказваць сваё меркаванне — таксама. Не ўсім, вядома, гэта даецца, але я імкнуся такое заахвочваць», — адказаў Андрэй.

• 3
• 0
• 0
• 0
• 0
• 0
• 0
• 0