«Мы не з’яўляемся ўрадам свету», — сказаў Рубіа журналістам у Бруселі.
ЗША больш не будуць несці асноўны цяжар аказання гуманітарнай дапамогі ў свеце, заявіў у пятніцу дзяржаўны сакратар Марка Рубіа. Дзяржсакратар заклікаў іншыя багатыя краіны планеты ўзяць на сябе большую адказнасць пасля разбуральнага землятрусу ў М’янме, піша LRT.
«Мы не з’яўляемся ўрадам свету. Мы будзем прадастаўляць гуманітарную дапамогу, як і ўсе астатнія, і будзем рабіць гэта так добра, як зможам», — сказаў Рубіа журналістам у Бруселі.— «Але ў нас таксама ёсць і іншыя патрэбы, якія мы павінны ўлічваць».
Прэзідэнт Дональд Трамп у першы дзень свайго знаходжання на пасадзе кіраўніка амерыканскай дзяржавы загадаў прыпыніць усю знешнюю дапамогу ЗША на 90 дзён. Гэтае рашэнне, а таксама наступныя за ім указы аб спыненні працы мноства праграм Агенцтва ЗША па міжнародным развіцці (USAID), выклікалі хаос у глабальных гуманітарных аперацыях.
USAID фактычна было расфармавана, паколькі Трамп і мільярдэр Ілан Маск працягваюць рэалізацыю беспрэцэдэнтных мер па скарачэнні федэральнага ўрада ЗША: значная частка супрацоўнікаў агенцтва была адпраўлена ў адпачынак або звольнена, а многія гранты — адменены.
Рубіа заявіў, што несправядліва чакаць, што Амерыка будзе працягваць забяспечваць 60—70% усёй гуманітарнай дапамогі ў свеце, калі існуе мноства іншых багатых краін, якія павінны ўнесці свой уклад. Ён асабліва ўзгадаў Кітай і Індыю.
«Мы — самая багатая краіна ў свеце, але нашы рэсурсы не бязмежныя. У нас велізарны нацыянальны доўг, у нас ёсць і іншыя прыярытэты. Пара перагледзець наш падыход. Мы не адмаўляемся ад дапамогі, але ў нас ёсць і іншыя задачы,» — заявіў Рубіа.
Землятрус магнітудай 7,7, які адбыўся мінулай пятніцай, стаў адным з самых магутных у М’янме за апошнія сто гадоў. Ён закрануў рэгіён з насельніцтвам 28 мільёнаў чалавек, знішчыў бальніцы, разбурыў цэлыя паселішчы і пакінуў тысячы людзей без ежы, вады і даху над галавой.
Колькасць ахвяр землятрусу перавысіла 3300 чалавек, больш за 4500 атрымалі раненні, а звыш 200 чалавек лічацца зніклымі без вестак, заявіла ваенная хунта, што захапіла ўладу ў М’янме.
Злучаныя Штаты, якія раней з’яўляліся найбуйнейшым гуманітарным донарам у свеце, прапанавалі ў якасці дапамогі адносна сціплую суму ў $2 мільёны. Вашынгтон таксама абвясціў пра намер накіраваць трох экспертаў для ацэнкі шкоды, аднак іх прыбыццё затрымліваецца з-за праблем з атрыманнем віз ад ваеннага рэжыму М’янмы. Раней ЗША рэгулярна накіроўвалі кваліфікаваных ратавальнікаў у пацярпелыя рэгіёны, аператыўна аказваючы дапамогу пасля цунамі, землятрусаў і іншых бедстваў.
Рубіа адхіліў абвінавачванні ў маруднай рэакцыі Вашынгтона, сцвярджаючы, што сітуацыя ўскладненая самім характарам рэжыму ў М’янме.
«М’янма — не самае простае месца для працы. Ваенная хунта не любіць ЗША і замінае нам працаваць у краіне так, як мы хацелі б,» — патлумачыў ён.
Пракурорскі начальнік абурыўся неабгрунтаванымі затрыманнямі беларусаў8
Каментары
І безумоўна, гэтую ініцыятыву перахопіць Кітай. А з пад яго жалезнай рукі павярнуць яе ўжо не атрымаецца.
Геніяльна!