Як жыве Алесь Мухін, вядомы знаўца «Што? Дзе? Калі?»

Восенню 2020 года, калі ў Беларусі працягваліся пратэсты супраць фальсіфікацыі выбараў і гвалту сілавікоў, з’явілася інфармацыя, што восеньскія і зімовыя гульні беларускага інтэлектуальнага клуба «Што? Дзе? Калі?» не адбудуцца.

Рэальная прычына — гульцы не хацелі здымацца для тэлеканала АНТ. Шмат хто са знаўцаў не пагаджаўся ўдзельнічаць у забаўляльнай перадачы на канале, які скажае грамадскія рэаліі і стварае праўладны наратыў.

Абмяркоўваліся розныя варыянты. Адзін з іх быў — знайсці іншы канал для трансляцыі. Алесь Мухін, які ў беларускім клубе «Што? Дзе? Калі?» кіраўнік і вядоўца, абяцаў прыслухацца да пазіцыі гульцоў.

Ён, з аднаго боку, абяцаў пашукаць новы тэлеканал, з іншага — спрабаваў усё ж угаварыць людзей удзельнічаў у тэлевізійных здымках для АНТ. Запэўніваў: ніякай палітыкі падчас выпускаў «Што? Дзе? Калі?» не будзе.

Мухін падкрэсліваў, як важная інтэлектуальная перадача для беларускіх гледачоў: «Мы ж не проста даём пенсіянерам зарабляць грошы, а яшчэ і нясём нейкае святло ведаў, паказваем, што ў Беларусі ёсць людзі з інтэлектам. Прынамсі я сваё задачай бачу менавіта гэтае».

Згодна з афіцыйнай версіяй, здымкі інтэлектуальнай гульні тады адмянілі праз каранавірус.

Ужо ў 2022 годзе Алесь Мухін праводзіў гульню для беларускіх прапагандыстаў. Тады капітанам быў супрацоўнік лукашэнкаўскага пула Ігар Тур.

Варта адзначыць, што ў студзені 2022 года пакінулі гульню чатыры топавыя ўдзельнікі расійскага інтэлектуальнага клуба, яшчэ некаторыя знаўцы паставілі свой удзел у шоу на паўзу.

Напрыклад, уладальніца «Крыштальнай савы» Дар'я Салавей адзначыла, што для яе непрымальна ствараць кантэнт для «забойцаў, іх сваякоў і проста згодных з неабходнасцю забойства».

Калі ў 2021 годзе з Мухіным гулялі Вера Рабкіна, Дар'я Салавей, Мікалай Крапіль, Дзяніс Лагуцін і Станіслаў Мярэмінскі, то ў 2022 годзе на здымках расійскага «Што? Дзе? Калі?» з'явіўся толькі адзін Алесь.

Павялічыць

Чым цяпер жыве Алесь Мухін? Апроч інтэлектуальнага клуба (Мухін вядзе на тэлебачанні беларускі ШДК і гуляе ў расійскім клубе), ён кіруе групай кампаній «Караван» — гэта найбуйнейшы пастаўшчык гарбаты і кавы ў Беларусь. Таксама перыядычна праводзіць для беларускай бізнэс-супольнасці лекцыі на тэму таго, як кіраваць калектывам у крызіснай сітуацыі.

Нядаўна ён расказаў у інстаграме, што згуляў сваю шасцідзясятую гульню «Што? Дзе? Калі?»: «Вельмі прыемна сваім маленькім юбілеем адкрываць сезон вялікага юбілею — 50 гадоў любімай гульні, ды яшчэ і ў такой класнай кампаніі! Яшчэ і 30 гадоў [расійскага] Першага канала гэтай гульнёй адзначылі. Гэта было вельмі незвычайна і хвалююча, за каманду і за сябе… Усім дзякуй за падтрымку, дарагія мае, мы адчувалі гэта праз экран! «Што? Дзе? Калі?» назаўсёды!».

Паколькі гульня была святочнай, каманду Мухіну падабралі незвычайную: з ім за стол разам селі зоркі, сярод якіх быў і беларускі шоўмен Вадзім Галыгін. Не без цяжкасцяў, але з лікам 6:5 каманда знаўцаў усё-такі перамагла тэлегледачоў.

Павялічыць

Некалькі месяцаў таму Алесь даваў інтэрв’ю YouTube-каналу аднаго з беларускіх аўтадылераў. Адказваючы на пытанне, дзе яму больш за ўсё падабаецца адпачываць, Мухін адзначыў:

— На дачы, якая мне дасталася ад бацькоў. У цэлым я вельмі люблю падарожнічаць па Беларусі, мне падабаюцца беларускія гарады, мне падабаюцца, напэўна, мясцовыя жыхары, вось так правільна сказаць. Я люблю прыехаць, пасяліцца ў нейкім гатэлі і пайсці гуляць па горадзе. Я гісторык па адукацыі, таму мне вельмі цікавая архітэктура, цэрквы, касцёлы.

Мухін радуецца, што ў Беларусі цяпер наплыў турыстаў з Расіі, і кажа, што дзяржава павінна развіваць сеткі гатэляў.

— Выдатна, што неяк у нас сучасныя запраўкі пачалі з'яўляцца, дзе можна і перакусіць, і, прабачце, нармальна ў прыбіральню схадзіць, чаго раней не было. І ў Беларусі вялікая будучыня ў сувязі з гэтым.

Бізнэсовец і знаўца лічыць, што добры адпачынак неабходны для добрай працы, і заклікае не саромецца гэтага.

— У мяне ўвесь час нараджаюцца новыя дзеці, таму іх трэба аздараўляць. Усе мае адпачынкі, як правіла, гэта пляжны адпачынак. Прычым не абавязкова, што гэта нейкая суперэкзотыка. Я, напрыклад, у Сочы люблю злятаць, пагуляць па набярэжнай. Мы і ў Светлагорску Калінінградскай вобласці бываем, калі там здымаецца КВЗ.

Павялічыць

У больш далёкіх краінах Алесь таксама бывае — за апошнія некалькі гадоў ёсць здымкі з Іспаніі, Швейцарыі, Літвы, Латвіі, Дубая, Турцыі, Тайланда, Азербайджана. Але ў допісах Алесь не забывае адзначаць, што ганарыцца Беларуссю.

Старэйшаму сыну Алеся ўжо 28 гадоў, ён скончыў факультэт міжнародных адносін БДУ. Дачцэ 21 год, і яна хоча займацца псіхалогіяй. Малодшы сын летась пайшоў у першы клас.

— Я заўсёды сваіх дзяцей вучу, што галоўны значны рэсурс жыцця — гэта час. І ў залежнасці ад таго, як ты гэтым часам распараджаешся, ты больш ці менш паспяховы ў жыцці або зусім не паспяховы. Дык вось, час трэба шанаваць. У мяне ўсё пытаюцца: «Як ты так шмат усяго паспяваеш?». Мабыць, гэта проста эфектыўны тайм-менеджмент, плюс разуменне таго, што нейкія рэчы можна рабіць адначасова.

Мухін прызнаецца, што цяпер яму бракуе часу шмат кніг чытаць, як ён прывык з дзяцінства. Таму ён перайшоў на аўдыякніжкі, якія слухае ў самалёце ці за стырном машыны.

— Паверце, кожнаму з нас заўсёды можна і трэба знайсці час для таго, каб праінвеставаць у самога сябе любімага, стаць больш прафесійным, стаць больш паспяховым.

Павялічыць

Алесь жартуе, што першы раз зразумеў, наколькі веды патрэбныя ў жыцці, калі яго ўпершыню гадоў у 9—10 пацалавала дзяўчынка і сказала: «Які ты разумны!».

Ён бачыць сваю місію ў тым, што дапамагае вырошчваць пакаленні інтэлектуалаў.

— У Беларусі да гэтага часу існуе грамадскае аб'яднанне Беларускай лігі інтэлектуальных каманд (я калісьці стаяў ля яго вытокаў), нам ужо больш за 20 гадоў. Мы нават уключаныя ў сістэму Міністэрства адукацыі. Ведаеце, у кожнай школе ёсць дадатковыя гурткі, яны іх абавязаны мець. І вось вельмі часта ў школах адзін з гурткоў — гэта якраз наш гурток інтэлектуальных гульняў, куды прыходзяць знаўцы ў тым ліку беларускага тэлеклуба «Што? Дзе? Калі?». Мы як піянеры інтэлекту прапаведуем у школах.

• 1
• 7
• 2
• 42
• 1
• 0
• 7
• 0