Як гандлёвая вайна Трампа можа адбіцца на сусветнай эканоміцы і Беларусі? І якая выгада з гэтага амерыканцам?
Ужо з 5 красавіка 2025 года ЗША ўводзяць універсальныя пошліны у 10% на ўсе імпартныя тавары. Дадаткова з 9 красавіка могуць пачаць дзейнічаць павышаныя тарыфы для пэўных краін, уключаючы ЕС і Кітай. «Наша Ніва» спытала ў эканаміста, да чаго можа прывесці амерыканская гандлёвая вайна.
Тыдзень на падумаць
Увядзенне агульнага мыта ў 10%, якая мусіць запрацаваць ужо з гэтай суботы, наўрад ці можа моцна паўплываць на сусветную эканоміку, чаго не скажаш пра тарыфы, якія могуць пачаць дзейнічаць ужо з 9 красавіка, калі названым краінам не ўдасца дамовіцца з амерыканскім прэзідэнтам.
Так, напрыклад, Дональд Трамп сваім указам увёў тарыф 34% супраць Кітая, 20% супраць Еўрасаюза, 24% супраць Японіі і 26% супраць Індыі.
Акадэмічны дырэктар BEROC Леў Львоўскі лічыць, што эканамічная вайна, абвешчаная Трампам, не акажа прамога ўплыву на Беларусь. Але наша эканоміка можа пазней адчуць на сабе ўскосны эфект ад новых тарыфаў.
«Высокія тарыфы заўсёды шкодзяць усім эканомікам»
«На Беларусь гэтыя дадатковыя тарыфы нават не накладзены. Верагодна, у адміністрацыі палічылі, што калі краіна пад санкцыямі, то гэтыя тарыфы не патрэбныя.
Што да астатняга свету, дык можна сказаць, што высокія тарыфы заўсёды шкодзяць усім эканомікам — і тым, на якія яны накладаюцца, і тым, хто іх уводзіць», — тлумачыць эксперт.
Самі па сабе загараджальныя тарыфы Львоўскі называе грубым інструментам, які адначасова з’яўляецца падаткам на спажыванне і субсідыяй для ўнутраных вытворцаў.
«Калі мы ўмоўныя аўтамабілі абкладаем тарыфам у 20%, то атрымаецца, што імпартныя машыны падаражаюць. Але і мясцовыя вытворцы не будуць трымаць старыя цэны, бо змогуць дазволіць сабе іх павысіць — пакупнікам проста не будзе куды дзецца», — прыводзіць прыклад Львоўскі.
Эксперт адзначае, што любую задачу, якая стаіць перад урадам, можна вырашыць з дапамогай больш вузкіх інструментаў.
«Калі стаіць задача падтрымаць унутраных вытворцаў — можна проста даць ім субсідыі. Калі задача — скараціць продаж аўтамабіляў, можна абкласці падаткам іх куплю.
Калі падаецца, што маюцца праблемы з дысбалансам у міжнародным гандлі — іх вырашаюць праз змену валютнага курсу.
А тарыфы — гэта ў любым выпадку дрэнна, бо якую б задачу ні ставілі, яе можна вырашыць больш прамым інструментам».
Важна, чым адкажуць іншыя краіны
На думку Львоўскага, для больш сур'ёзнай і дакладнай ацэнкі ўплыву новых тарыфаў з боку ЗША на сусветную эканоміку трэба дачакацца дадатковых уводных. У прыватнасці, важна зразумець, ці будуць уведзеныя меры ў адказ з боку ключавых гандлёвых партнёраў ЗША, асабліва Кітая.
«Ад таго, што мы не самі сабе шыем вопратку і не самі вырошчваем ежу, а робім тое, у чым найбольш эфектыўныя, узнікае тая эфектыўнасць сусветнай эканомікі, дзякуючы якой людзі могуць добра жыць.
Адпаведна, чым менш будзе падзелу працы і міжнароднага гандлю, тым ніжэйшай будзе эканамічная эфектыўнасць і рост сусветнай эканомікі», — адзначае эксперт.
Пры гэтым Львоўскі лічыць, што гандлёвая вайна ЗША не абавязкова прывядзе да падзення сусветнай эканомікі.
«Хутчэй адбудзецца запаволенне тэмпаў росту, але якім яно будзе — сказаць складана, у першую чаргу з-за таго, што мы не ведаем, якія будуць наступныя крокі ў адказ».
Што новыя тарыфы прынясуць самім Штатам?
Што тычыцца саміх Штатаў, то, на думку Львоўскага, ніякага калапсу там не будзе, але і карысці ад тарыфаў таксама чакаць не варта.
«Нельга сказаць, што эканоміка ЗША пойдзе на дно. Штаты насамрэч не надта залежныя ад імпарту — у адрозненне, скажам, ад Беларусі. Калі паглядзець на долю імпарту ў іх ВУП, яны імпартуюць не так шмат адносна памеру сваёй эканомікі.
Таксама важна адзначыць, што Штаты не ўключылі самыя балючыя для сябе тарыфы — гэта тарыфы на прамежкавыя тавары, такія як сталь, нафтапрадукты, драўніну і г.д.»
Львоўскі лічыць, што ЗША ў такім выпадку чакае павышаная інфляцыя і запаволенне росту эканомікі.
Паводле эканаміста, наймацнейшы негатыўны эфект ад тарыфаў адчуюць тыя краіны, што моцна залежаць ад гандлю з Штатамі.
«Гэта найперш датычыць Канады і Мексікі. Калі разглядаць пару ЕС/ЗША, то тут цяжка сказаць, чыя эканоміка пацерпіць больш — хутчэй за ўсё, эфект будзе сіметрычным», — мяркуе эксперт.
Вяртаючыся да Беларусі, Львоўскі адзначае, што калі адбудзецца запаволенне сусветнай эканомікі, значыць, знізіцца попыт на ўсё, у тым ліку і на важныя для нас нафтапрадукты, што можа стаць для нас мінусам.
«Але гэта ўсё роўна будзе эфект другога шэрагу, бо Беларусь не з’яўляецца сур’ёзным гандлёвым партнёрам ЗША. Таму мы зможам адчуць гэтае ўздзеянне толькі праз іншыя краіны», — тлумачыць эканаміст.
Адказваючы на пытанне, які профіт могуць атрымаць звычайныя жыхары ЗША, Львоўскі адзначае, што Трамп робіць многія рэчы, якія з эканамічнага пункту гледжання цалкам ірацыянальныя.
«Але яго выбаршчыкам гэта падабаецца — аднак гэта ўжо пытанні не эканомікі, бо ніякіх плюсоў ад увядзення тарыфаў не будзе».
Цяпер чытаюць
Прапагандысты паказалі шэсць беларусаў, арыштаваных за данаты. Большасць з іх пераводзілі нязначныя сумы4
Каментары
Ну дык раслумачце нам, простым чытачам логіку паводзінаў Трампа і яго эканамічнага кабінету. Упэўнены, там спецыялісты ня горшыя за Львоўскага. Але нас, як заўсёды, нейкай бздурай кормяць, што ўсё што не робіцца- усё кепска. Так не бывае, разумееце. Калі назваліся СМІ, дык рабіце сваю працу прафесійна.
Акрамя фінансавых эканамічных і зразумела $ ніякіх магчымасцей у Штатаў ні засталось .Нажаль ..наступные выбары " за акіянам" нам яшчэ будуць цікавы .
Пасля ..першы раз я трымал 1$ у руках і гаманцэ як " абярэг" у 1985 годзе
Мабыць як " сувенір" ці напамін аб былом таксама пабачу)))