Дзвюм мінчанкам інкрымінавалі здраду дзяржаве за правядзенне сацыялагічнага апытання без дазволу
Следчы камітэт паведаміў пра заканчэнне расследавання па крымінальнай справе аб «здрадзе дзяржаве». Абвінавачаныя, як сцвярджаецца, «на шкоду нацыянальнай бяспецы перадавалі фондам і некамерцыйным арганізацыям, якія дзейнічалі пад патранажам спецыяльных службаў замежных дзяржаў, матэрыялы аб стане спраў у розных сферах жыцця Рэспублікі Беларусь».
Сярод абвінавачаных — 42-гадовы жыхар Мінска, які за грошы нібыта падрыхтаваў даследаванне з «загадзя ілжывымі звесткамі» пра палітыку ўладаў у дачыненні да барацьбы з каранавірусам. Ён нібыта правёў сацыялагічны аналіз праз сваю кампанію, якая не мела адпаведнай акрэдытацыі.
Мужчыну закідаецца, што фактычна ён, маўляў, аналітычнай працы не праводзіў, а
«на падставе асобных звестак, размешчаных у адкрытых крыніцах, падрыхтаваў ангажаваныя і адпаведныя запытам «заказчыка» вынікі, для наступнага іх выкарыстання на шкоду нацыянальнай бяспекі і інтарэсам дзяржавы».
Падобныя закіды скіраваныя і 37-гадовай ды 43-гадовай мінчанкам, якія
«за ўзнагароджанне праводзілі сацыялагічнае даследаванне, якое тычыцца нібыта наяўнасці пераваг сярод грамадзян у развіцці краіны з дапамогай інтэграцыі з краінамі Еўрапейскага Саюза».
Арганізацыя гэтых жанчын таксама не мела акрэдытацыі ад адпаведнай камісіі НАНБ.
«З мэтай дасягнення жаданага выніку жыхаркі сталіцы выкарыстоўвалі для правядзення даследаванняў фокус-групы з ліку асоб, якія маюць, як правіла, загадзя негатыўнае стаўленне да наяўнай у дзяржаве палітычнай сістэмы і канстытуцыйнага ладу. Гэтыя матэрыялы пасля размяшчаліся ў сетцы Інтэрнэт і выкарыстоўваліся недружалюбнымі краінамі для прычынення шкоды Рэспубліцы Беларусь».
Абвінавачанаму мужчыну, апрача таго, закідаецца «распрацоўка і ўкараненне злачыннай схемы падмены працоўных адносін» дзеля таго, каб плаціць менш грошай у якасці сацыяльных выплат. У выніку, як сцвярджаюць следчыя, дзяржаве была нанесеная шкода ў суме больш за 186 тысяч беларускіх рублёў, якая цяпер «пакрытая ў поўным памеры».
Дзеянні абвінавачаных кваліфікаваныя па ч.1 арт. 356 (здрада дзяржаве) і ч. 2 арт. 243-3 (ухіленне ад выплаты страхавых узносаў, што пацягнула прычыненне шкоды ў асабліва буйным памеры) Крымінальнага кодэкса Рэспублікі Беларусь, усе яны знаходзяцца пад вартай.
Крымінальная справа перададзена пракурору для накіравання ў суд.
Цяпер чытаюць
Прапагандысты паказалі шэсць беларусаў, арыштаваных за данаты. Большасць з іх пераводзілі нязначныя сумы4
Каментары
========================
Внимание, а теперь вопрос на логику в области права - если гражданки передавали иностранным фондам заведомо ложные сведения, то в чём здесь измена государству? Тут награждать надо, а не судить. Максимум что тут можно вменить, это мошенничество. Ну или на худой конец дискредитация. Читаешь НН и понимаешь, что у этого сасута нет дна, это дно пробивают каждый день снова и снова. Зазеркалье. Без люстрации тут не обойтись, в Новой Беларуси не должно быть на службе людей, которые стряпали такие липовые дела с такими огромными сроками. Судейский аппарат туда же.