Галоўнакамандуючы НАТА ў Еўропе на слуханнях у Камітэце па ўзброеных сілах Сената ЗША заявіў, што вайна ва Украіне сур’ёзна змяніла як расійскую, так і ўкраінскую армію: расійская армія дэградуе, а ўкраінская хутка эвалюцыянуе.
Галоўнакамандуючы аб'яднанымі сіламі НАТА ў Еўропе генерал Крыстафер Кавалі на слуханнях у Камітэце па ўзброеных сілах Сената ЗША адказаў на пытанні старшыні камітэта Роджэра Уікера і яго намесніка Джэка Рыда. Размова ішла пра вынікі і перспектывы вайны ва Украіне.
Папярэднія вынікі вайны
«У лютым 2022 года мы і марыць не маглі пра такія страты расійскіх танкаў, праўда?» — спытаў Уікер.
«Не маглі, — пагадзіўся Кавалі. — Я не чакаў, што вайна працягнецца так доўга, і не чакаў, што Украіна так падарве вайсковы патэнцыял Расіі».
Па словах генерала, тэхнічны ўзровень расійскіх спецыялістаў у асобных відах войска сапраўды высокі і эвалюцыянаваў на працягу вайны, але гэта не агульная тэндэнцыя.
«У цэлым якасць расійскіх войскаў, асабліва сухапутных, горшае з цягам вайны», — адзначыў Кавалі.
У процівагу гэтаму, украінская армія, паводле яго ацэнкі, пачынала з «халоднага старту», але вельмі хутка развілася і адаптавалася.
Сенатар Уікер спытаў, ці дапаможа НАТА досвед украінскай вайны ў супрацьстаянні з Расіяй у выпадку магчымага сутыкнення.
«О так, спадар старшыня», — адказаў генерал.
Размова закранула і стан расійскай эканомікі.
«Расійскі ўрад пераключыў абаронную сферу ў турбарэжым. Гэта выклікала вялізны інфляцыйны ціск, асабліва ў грамадзянскім сектары. Улады адказалі вельмі высокімі працэнтнымі стаўкамі, каб стрымаць інфляцыю — і гэта душыць невайсковы сектар эканомікі», — патлумачыў Кавалі.
Паводле яго, расійскі абаронны сектар дэманструе бурны рост, але грамадзянскі — фактычна атрафіраваўся. І вырашыць гэты дысбаланс Расіі будзе вельмі няпроста.
Перспектывы вайны
Што да становішча на фронце, то генерал адзначыў, што, нягледзячы на цяжкасці, украінцы трымаюцца і паказваюць здольнасць да інавацый.
«Украінская армія мае праблемы, але ўсё яшчэ ўтрымлівае значныя тэрыторыі, дае адпор расіянам і актыўна ўкараняе інавацыі на полі бою», — сказаў ён.
Кавалі нагадаў, што Расія яшчэ ў верасні 2024 года збіралася выбіць украінцаў з Курскай вобласці, але тыя дагэтуль трымаюць там плацдарм — і нават зайшлі ў Белгарадскую вобласць.
«За Часаў Яр і Тарэцк ідуць баі ўжо восем месяцаў (за Часаў Яр амаль год — з красавіка 2024-га — НН). У апошнія месяцы расійскі наступ пачаў выдыхацца ў маштабах і захопленых тэрыторыях. Яны падышлі блізка да Пакроўска, але загрузлі там», — адзначыў генерал.
Пры гэтым, паводле яго, у Расіі бракуе і бранятэхнікі, і жывой сілы. Украіна ж заняла добрыя абарончыя пазіцыі і, імаверна, вырашыла частку сваіх праблем з мабілізацыяй.
«Яны пашырылі колькасць мабілізаваных, павялічылі колькасць добраахвотнікаў і правялі добрую працу па перакідванні тылавых падраздзяленняў на фронт», — сказаў Кавалі.
Разам з тым, генерал выказаў скептыцызм наконт таго, што Украіна здольная ў бліжэйшы час правесці буйное наступленне.
«Цяжка прадказаць вялікае наступленне Украіны, калі сядзіш тут цяпер», — сказаў ён.
Таксама Кавалі пацвердзіў, што краіны Еўропы звярнуліся з просьбай аб размяшчэнні на сваёй тэрыторыі гіпергукавога ўзбраення дальняга радыусу дзеяння.
«Ёсць запыт на размяшчэнне адной з гэтых сістэм у Еўропе. Я магу расказаць пра гэта падрабязней на закрытым пасяджэнні», — адзначыў ён.
У гэтым кантэксце ён нагадаў пра выхад ЗША з Дамовы аб ліквідацыі ракет сярэдняй і меншай далёкасці ў 2019 годзе.
«Гэта быў важны крок, і нам варта атрымаць з гэтага максімальную карысць», — заявіў генерал.
Пракурорскі начальнік абурыўся неабгрунтаванымі затрыманнямі беларусаў8
Каментары
кучу медалей нацепил этот лысый , а д**м быть не перестал.
[Зрэдагавана]