Pavodle źviestak ahienctva Reuters, rasijskaje HRU inśpiravała vybuchi pasyłak z kaśmietykaj, masažnymi paduškami i seks-cackami na kurjerskich składach u Vialikabrytanii, Hiermanii i Polščy.
«Padroblenaja kaśmietyka, masažnyja paduški i seks-cacki. Samarobnaja vybuchoŭka. Rasijanka pa mianušcy Voin. Kodavaje słova: «Maryja». Heta adny z klučavych elemientaŭ mierkavanaha rasijskaha dyviersijnaha płana, u vyniku jakoha try pasyłki byli ŭzarvanyja na kurjerskich składach u Vialikabrytanii, Hiermanii i Polščy minułym letam. Za hetym staić HRU», — paviedamiŭ Reuters čałaviek, znajomy z chodam rasśledavańnia hetych dyviersij u Polščy.
Pa słovach krynicy, paduški, spakavanyja ŭ pasyłki z kaśmietykaj i seks-cackami, utrymlivali schavanyja samarobnyja zapalnyja pryłady, vyrablenyja z kaktejlu chimičnych rečyvaŭ, uklučajučy vysokareaktyŭny mahnij.
Chimikaty zapalvalisia z dapamohaj papiarednie nastrojenych detanataraŭ z tannych kitajskich hadžetaŭ, jakija vykarystoŭvajucca dla adsočvańnia pradmietaŭ, a efiekt uzmacniaŭsia «ciubikami z kaśmietykaj», jakija vyhladali jak kaśmietyka, ale na samaj spravie ŭtrymlivali hiel ź lohkaŭzharalnych złučeńniaŭ, uklučajučy nitramietan, śćviardžaje krynica.
Kiraŭniki jeŭrapiejskich słužbaŭ biaśpieki apublikavali infarmacyju pra padpały pasyłak u kastryčniku 2024 hoda, nazvaŭšy ich častkaj «hibrydnaj vajny», jakuju viadzie Rasija, kab destabilizavać pracu krain, što padtrymlivajuć Ukrainu. Pa ich słovach, pasyłki, jakija zaharelisia na składach, vyklikaŭšy pažar, ale nie pryčyniŭšy nikomu škody, byli vyprabavalnym varyjantam budučaha rasijskaha płana pa padryvu padobnych pasyłak u pavietry na hruzavych rejsach u ZŠA i Kanadu.
Vybuchi pakietaŭ adbylisia 19, 20 i 21 lipienia minułaha hoda ŭ brytanskim Birminhiemie, Lejpcyhu ŭ Hiermanii i niedaloka ad polskaj stalicy Varšavy. Polskija śledčyja śćviardžajuć, što ŭkrainiec pa imieni Uładzisłaŭ D., jaki žyŭ na poŭdni Polščy, adyhraŭ klučavuju rolu ŭ sprobie dyviersii, dziejničajučy pa instrukcyjach, atrymanych ad kuratara z HRU, jakoha jon viedaŭ tolki pa mianušcy — Voin.
Poŭnaje imia padazravanaha, pavodle źviestak vydańnia, Uładzisłaŭ Dzierkaviec. Pavodle viersii śledstva, 27-hadovy Dzierkaviec adpraviŭsia ŭ Vilniu, dzie spakavaŭ čatyry pakiety, u kožnym ź jakich była paduška, niekalki ciubikaŭ z kaśmietykaj i seks-cacki. Pierad tym jak zapiačatać ich, jon nacisnuŭ dźvie knopki, kab aktyvavać zahadzia nastrojenyja miechanizmy detanacyi.
Pa słovach krynicy, hadžety byli takoha typu, što dazvalali karystalnikam stavić čas dla spracoŭvańnia ad niekalkich siekundaŭ da miesiacaŭ.
Sa słoŭ surazmoŭcy Reuters, 19 lipienia Dzierkaviec pieradaŭ pasyłki ŭ adnym z parkaŭ Vilni mužčynu, jaki vykarystaŭ kodavaje słova «Maryja».
Uładzisłaŭ byŭ aryštavany ŭ Polščy ŭ pačatku žniŭnia i abvinavačany ŭ ździajśnieńni terarystyčnych aktaŭ pa zadańni rasijskaj raźviedki. U nacyjanalnaj prakuratury ahienctvu Reuters paviedamili, što padazravany admaŭlaje ŭsie vystaŭlenyja suprać jaho abvinavačvańni, uklučajučy pracu na zamiežnuju raźviedku.
Polskija prakurory taksama abvinavačvajuć inšaha čałavieka, 44-hadovaha Alaksandra B., u tym, što jon uvachodziŭ u tuju ž jačejku, što i Uładzisłaŭ. Pavodle ich słoŭ, jahonaja zadača zaklučałasia ŭ padrychtoŭcy da vybuchaŭ na hruzavych samalotach, jakija nakiroŭvalisia ŭ Paŭnočnuju Amieryku: jon arhanizoŭvaŭ adpraŭku pasyłak z krasoŭkami i adzieńniem z Varšavy ŭ Vašynhton i Atavu.
Alaksandr byŭ tym padazravanym, jakoha polskija ŭłady sprabavali ekstradavać z Bośnii, dzie jon publična nazvaŭsia Alaksandram Biazrukavym, hramadzianinam Rasii z Rastova-na-Donie. U studzieni na słuchańniach u Sarajevie jon zajaviŭ, što nie ŭdzielničaŭ i nie viedaŭ ni pra jakuju zmovu z metaj napadu na składy abo hruzavyja samaloty. Tym nie mienš, Biazrukaŭ prajhraŭ sud i ŭ lutym byŭ ekstradavany ŭ Polšču. Pa słovach čałavieka, znajomaha z polskim rasśledavańniem, jon admaŭlaje vystaŭlenyja suprać jaho abvinavačvańni.
Kreml adchiliŭ abvinavačvańni, što Rasija datyčnaja da pažaraŭ.
«My ničoha pra heta nie viedajem, — skazaŭ pres-sakratar prezidenta Rasii Dźmitryj Piaskoŭ ahienctvu Reuters. — My nie vyklučajem, što heta prosta čarhovaja fejkavaja navina ci prajava ślapoj rusafobii».
Ciapier čytajuć
«Užo tam karoŭ nie zastałosia!»: były načalnik Kačanavaj apłakvaje stan ekanomiki na Połaččynie5
Kamientary