Labiedźka: Cudu nie budzie — Mielnikava ŭ rukach biełaruskaha režymu

Na dumku Anatola Labiedźki, čas, na žal, nie pracuje na pazityŭny finiš padziejaŭ, jakija razhortvajucca vakoł źniknieńnia Anžaliki Mielnikavaj.

«Čakańni cudu ŭžo prajšli. Tamu, chutčej za ŭsio, treba sychodzić z taho, što Anžalika znachodzicca na terytoryi Biełarusi, u kaardynatach biełaruskaha režymu. I tut prychilnikam pieramien niama spadziavańnia na niejkija dobryja naviny», — adznačyŭ Labiedźka

Maŭčańnie režymu da hetaha času palityk patłumačyŭ tym, što idzie praca, kab Mielnikava pahadziłasia na ahučku peŭnych scenaroŭ, padrychtavanych biełaruskimi śpiecsłužbami. I mahčyma, jana hetamu supraciŭlajecca. U suviazi z hetym i mahła ŭźniknuć takaja paŭza.

Anatol Labiedźka adznačyŭ, što treba razumieć, što zaraz «my znachodzimsia ŭ stanie vajny», a Anžalika Mielnikava nie niejki «šarahovy vajaka». Jaje jon nazvaŭ «palityčnym hienierałam», i heta daje pieravahi dla režymu.

Surazmoŭca «Biełsata» ličyć, što akramia psichałahičnaha vyharańnia, jakoje mnohija atrymali paśla naviny pra źniknieńnie Mielnikavaj, hetaja navina ŭ pieršuju čarhu ŭdaryła pa samoj Kaardynacyjnaj radzie. Bo hetaja struktura znachodzicca jašče ŭ stadyi farmavańnia, jana davoli kvołaja i maje vielmi šmat krytykaŭ.

Anatol Labiedźka źviarnuŭ uvahu na toje, što ciaham 30 hadoŭ biełaruski režym raźvivaŭ «trek zapałochvańnia, strachu» u dačynieńni da svaich apanientaŭ. Adnak, na dumku palityka, na «kiejsie Mielnikavaj» jany pasprabujuć zapuścić inšy trek. 

«Čym važnaja Mielnikava? Mielnikava moža być važnaj dla režymu, kab spynić praces mihracyi biełarusaŭ — aktyŭnych, samadastatkovych. I im zaraz moža być patrebna pakazać jaje — mienavita jak čałavieka, jaki pakajaŭsia, viarnuŭsia ŭ Biełaruś. I, kaniešnie, mnohija mohuć zadumacca: nu, kali Mielnikava viarnułasia na peŭnych umovach, vykanaŭšy peŭnyja niejkija abaviazki, to čamu ja, šarahovy voin, nie mahu heta zrabić?» — adznačaje Anatol Labiedźka. 

Mienavita ŭ hetym, na dumku surazmoŭcy «Biełsata», moža być intryha, bo režym vykarystoŭvaje roznyja instrumienty, jak chirurh skalpieli na apieracyjnym stale. Situacyja ź Mielnikavaj moža stać novym instrumientam, jakoha dahetul nie isnavała i jaki dazvolić režymu spynić vyjezd aktyŭnych biełarusaŭ i zachavać, uratavać reputacyju kamisii pa viartańni hienprakurora Andreja Švieda, jakaja zajmajecca razhladam zvarotaŭ biełarusaŭ, jakija chočuć viarnucca dadomu

Pra źniknieńnie śpikierki Kaardynacyjnaj rady Anžaliki Mielnikavaj stała viadoma ŭviečary 28 sakavika. Suviazi ź joj niama z 25 sakavika. Kiraŭnik Narodnaha antykryzisnaha ŭpraŭleńnia Pavieł Łatuška 29 sakavika raskazaŭ, što były muž Mielnikavaj vyjechaŭ u Biełaruś, a 31 sakavika paviedamiŭ, što mabilny telefon Mielnikavaj z 19 sakavika fiksujecca na terytoryi Biełarusi. Jaje dakładnaje miescaznachodžańnie dasiul nieviadomaje.

• 7
• 1
• 18
• 20
• 2
• 23
• 8
• 0