Estonski kinołah raskazaŭ, jak jaho sabaka šukaŭ źnikłaha amierykanskaha sałdata na palihonie ŭ Padbrodździ i vydatna spraviŭsia
Sabaka pa mianušcy Majk upieršyniu lacieŭ na vajskovym viertalocie i adpracavaŭ jak na sušy, tak i na vadzie.
Estonski kinołah Rysta Kotkas raspavioŭ pra ŭdzieł svajoj kamandy ŭ pošukach źnikłaha amierykanskaha sałdata padčas vučeńniaŭ u Litvie. U efiry pieradačy Terevisioon jon adznačyŭ, što słužbovy sabaka pa mianušcy Majk z honaram spraviŭsia z pastaŭlenaj zadačaj, pierakazvaje LRT.
«U pačatku tydnia my atrymali paviedamleńnie, što našym litoŭskim kaleham patrebna dapamoha ŭ pošuku źnikłaha vajskoŭca ZŠA. Heta byŭ pieršy vopyt palotu na vajennym viertalocie dla našych sabak, u tym liku dla Majka — čatyrochhadovaha sabaki biez papiaredniaha dośviedu takich pieramiaščeńniaŭ. Ale palot prajšoŭ spakojna: sabaki nie skuholili, nie brachali — stresu amal nie było», — raspavioŭ Kotkas.
Majk pracavaŭ nie tolki na sušy, ale i na vadzie. Pavodle kinołaha, pošuki na vadzie patrabujuć asablivaj arhanizacyi, usio padparadkoŭvajecca patrebam sabaki: «U hety momant, naprykład, ekskavatary nie mohuć pracavać pobač, kab nie pieraškadžać».
Druhi sabaka z kamandy, Tyjt, znachodziŭsia ŭ reziervie. Abodva sabaki prajšli padrychtoŭku dla pošuku jak žyvych, tak i zahinułych ludziej. «Majk byŭ asnoŭnym u hetym zadańni. Jon poŭny enierhii i nie razumieje, čamu zaraz ničoha nie adbyvajecca. Navat u studyi jon skuholić — jamu chočacca pracavać», — kaža Kotkas.
Słužbovy sabaka nie tolki dakładna vykanaŭ zadaču, ale i, pavodle haspadara, adčuŭ zadavalnieńnie ad svajoj pracy. «Dla jaho heta byŭ asabisty pośpiech — jon zrazumieŭ, što spraviŭsia», — padsumavaŭ kinołah.
Husieničnaja vyratavalnaja mašyna M88 Hercules z čatyrma amierykanskimi vajskoŭcami źnikła padčas vučeńniaŭ na palihonie ŭ Padbrodździ kala miažy ź Biełaruśsiu 25 sakavika. Praź dzień techniku znajšli na hłybini kala piaci mietraŭ u zabałočanaj miascovaści.
Ranicaj 31 sakavika patanułuju ŭ bałocie amierykanskuju broniemašynu vyciahnuli, prakuratura pačała dasudovaje rasśledavańnie pa fakcie hibieli vajskoŭcaŭ, jakija znachodzilisia ŭ joj. Ale śpiarša znojdzienych vajskoŭcaŭ było tolki troje, a čaćviorty pa-raniejšamu ličyŭsia źnikłym bieź viestak. 1 krasavika znajšli i jaho.
Ciapier čytajuć
«Dzieci sa mnoj». Žurnalisty dazvanilisia da byłoha muža Anžaliki Mielnikavaj i spytali, dzie moža być śpikierka KR4
Kamientary
[Zredahavana]