«План, як спыніць Пуціна і скончыць вайну». Зяленскі сустрэўся з віцэ-прэзідэнтам ЗША ў Мюнхене
Прэзідэнт Украіны Уладзімір Зяленскі выступіў на адкрытай у пятніцу Мюнхенскай канферэнцыі па бяспецы і сустрэўся з віцэ-прэзідэнтам ЗША Джэй Дзі Вэнсам. Бакі заявілі, што засталіся задаволеныя перамовамі, піша Бі-бі-сі.
«Мы вельмі ўдзячныя за амерыканскую падтрымку ад прэзідэнта Трампа, — заявіў Зяленскі. — У нас сёння адбылася добрая размова. Наша першая сустрэча. Упэўнены, не апошняя. І што нам сапраўды трэба — гэта размаўляць больш, працаваць больш і рыхтаваць план, як спыніць Пуціна і скончыць вайну. Мы сапраўды вельмі хочам міру, але нам патрэбныя рэальныя гарантыі бяспекі, і мы працягнем нашы сустрэчы».
Вэнс таксама назваў размову з украінскай дэлегацыяй плённай. Акрамя яго, у сустрэчы ўдзельнічалі дзяржсакратар ЗША Марка Рубіа і спецпрадстаўнік Дональда Трампа па Украіне Кіт Келаг.
«Ёсць шэраг рэчаў, якімі трэба займацца далей, і фундаментальна наша мэта, як яе акрэсліў прэзідэнт Трамп, — мы хочам, каб вайна скончылася, каб людзей перасталі забіваць, але мы хочам дасягнуць трывалага, доўгатэрміновага міру, а не такога, пры якім Усходняя Еўропа праз некалькі гадоў зноў апынецца ў стане канфлікту», — заявіў віцэ-прэзідэнт ЗША.
Перад сустрэчай з Вэнсам падчас выступлення на канферэнцыі Зяленскі сказаў, што не мае намеру сустракацца ні з кім з прадстаўнікоў Расіі, акрамя расійскага прэзідэнта Уладзіміра Пуціна.
«Я не буду сустракацца з расіянамі, гэта не частка маіх планаў, — сказаў прэзідэнт Украіны. — Я сустрэнуся толькі з адным расіянінам — з Пуціным. Толькі пасля таго, як у нас будзе агульны план з Трампам, Еўропай, і мы сядзем з Пуціным і спынім вайну. Толькі ў гэтым выпадку я гатовы сустрэцца».
Пуцін не выказваў гатоўнасці сустракацца асабіста з Зяленскім і неаднаразова ставіў пад сумнеў яго легітымнасць.
Перад перамовамі з Зяленскім віцэ-прэзідэнт ЗША таксама выступіў на канферэнцыі з прамовай, у якой рэзка раскрытыкаваў еўрапейскія краіны і амаль нічога не сказаў пра вайну ва Украіне.
«Пагроза, якая мяне больш за ўсё турбуе ў дачыненні да Еўропы, — гэта не Расія, не Кітай, не любы іншы знешні чыннік. Мяне турбуе пагроза знутры — адступленне Еўропы ад некаторых з яе найважнейшых каштоўнасцяў, якія яна падзяляе з ЗША», — сказаў ён.
Паводле слоў Вэнса, няма больш надзённага пытання, чым масавая міграцыя, і Еўропа, на яго думку, уступае ў «крызіс, які сама сабе стварыла».
«Калі вы баіцеся ўласнага народа, Амерыка нічым не зможа вам дапамагчы. Вы не можаце заваяваць дэмакратычны мандат, падвяргаючы цэнзуры сваіх апанентаў або саджаючы іх у турму», — заявіў ён.
Міністр абароны Германіі Борыс Пісторыус, які выступаў неўзабаве пасля віцэ-прэзідэнта ЗША, рэзка адхіліў крытыку з боку Вэнса.
«Віцэ-прэзідэнт ЗША толькі што паставіў пад сумнеў дэмакратыю не толькі Германіі, але і Еўропы ў цэлым. Калі я яго правільна разумею, ён параўноўвае стан Еўропы з тым, што пануе ў некаторых аўтарытарных рэжымах… Гэта непрымальна», — сказаў Пісторыус.
Зяленскі: Я не планую сустракацца ні з якімі расіянамі, акрамя Пуціна
Што будзе з Беларуссю пасля размовы Трампа і Пуціна?
«Ты не можаш выйграць дэмакратычныя выбары тым, што кідаеш свайго апанента за краты». Ці адрэагуе на словы Вэнса Лукашэнка?
Зяленскі збіраецца паразмаўляць з Трампам пра Беларусь
Ціханоўская ў Мюнхене: Патрабуем, каб расійскія войскі былі выведзеныя не толькі з Украіны, але і з нашай зямлі
Цяпер чытаюць
«Дзеці са мной». Журналісты дазваніліся да былога мужа Анжалікі Мельнікавай і спыталі, дзе можа быць спікерка КР23
Каментары
Так што варта адкрыта казаць, што гэта не сам Пуцін, а Расія і Расіяне напалі на Украіну і ўкраінцаў.