Łukašenka kaža pra «Hłabalnuju bolšaść». Padličyli, kolki krain u AAN hałasujuć adnolkava ź Biełaruśsiu
Łukašenka i jaho prapahandysty śćviardžajuć, što Biełaruś naležyć da «hłabalnaj bolšaści». Adnak padčas apošniaha hałasavańnia za miesca ŭ Radzie Biaśpieki AAN Biełaruś prajhrała bratam-słavianam sa Słavienii 38:153. A to jašče što — byvali i hałasavańni, dzie Biełaruś traplała ŭ hanarovyja 2,6%.
Vyraz «hłabalnaja bolšaść» apošnim časam časta ŭžyvajecca Minskam.
Nieadnarazova jaho ŭžyvaŭ i Alaksandr Łukašenka. «Biełaruś nacelenaja ŭnosić układ va ŭmacavańnie hłabalnaj bolšaści, aktyŭna ŭdzielničajučy ŭ abjadnaŭčych mižnarodnych strukturach: u Arhanizacyi Abjadnanych Nacyj, Ruchu niedałučeńnia, Šanchajskaj arhanizacyi supracoŭnictva, a taksama BRIKS, partniorami jakoj my raźličvajem stać u najbližejšaj pierśpiektyvie», — zajaŭlaŭ jon u žniŭni, vystupajučy na trecim samicie «Hołas Hłabalnaha Poŭdnia».
«Samaarhanizacyja hłabalnaj bolšaści — heta strašny son zachodnich niealibierałaŭ i psieŭdademakrataŭ» — zajaviŭ Łukašenka 31 kastryčnika, vystupajučy na II Minskaj mižnarodnaj kanfierencyi pa jeŭrazijskaj biaśpiecy.
Tuju samuju ŭstanoŭku retranślujuć i prapahandysty.
«Biełaruś na hety momant užo źjaŭlajecca nie prosta astraŭkom biaśpieki, heta pryznany donar miru i stabilnaści ŭ našym rehijonie», — zajaviŭ Vadzim Hihin u kułuarach kanfierencyi pa biaśpiecy.
«Hłabalnaja bolšaść vystupaje adzinym frontam za naviadzieńnie paradku ŭ śviecie. I paradku šmatpalarnaha», — zapeŭniŭ ministr zamiežnych spraŭ Biełarusi Maksim Ryžankoŭ.
Davajcie pabačym, ci sapraŭdy pohlad Biełarusi padzialaje bolšaść krain śvietu — u takim važnym pytańni dla mižnarodnaj biaśpieki, jak vajna va Ukrainie.
Tak, za rezalucyju Hienieralnaj Asamblei AAN ES-11/1 (2 sakavika 2022 hoda) z asudžeńniem ahresii Rasii suprać Ukrainy hałasavała 141 kraina z 193. Suprać było tolki piać — Rasija, Biełaruś, Paŭnočnaja Kareja, Siryja i Erytreja, abo 2,6% ad dziaržaŭ-členaŭ AAN.
Rezalucyju ES-11/2 «Humanitarnyja nastupstvy ahresii suprać Ukrainy» ad 24 sakavika 2022 hoda padtrymała 140 krain. Suprać była taja ž piaciorka.
Bolšaściu ŭ 143 hałasy pry ŭsio toj ža piaciorcy suprać była pryniata rezalucyja ES-11/4 ad 12 kastryčnika 2022 hoda ŭ padtrymku terytaryjalnaj cełasnaści Ukrainy, suaŭtarami jakoj vystupili 44 krainy.
Za toje, kab prypynić členstva Rasii ŭ Radzie AAN pa pravach čałavieka (rezalucyja ES-11/4 ad 7 krasavika 2022 hoda) i pryciahnuć jaje da adkaznaści za lubyja parušeńni mižnarodnaha prava na Ukrainie (rezalucyja ES-11/5 ad 14 listapada 2022 hoda) prahałasavała adpaviedna 93 i 94 krainy. Suprać u pieršym vypadku byli 24, u druhim — 14.
Suaŭtarami rezalucyi ES-11/6 z patrabavańniem nieadkładnaha vyvadu Rasijaj svaich uzbrojenych sił z Ukrainy ŭ jaje mižnarodna pryznanych miežach vystupili 57 krain. Dakumient byŭ pryniaty 23 lutaha 2023 hoda bolšaściu ŭ 141 hołas. Suprać byli siem krain. Da viadomaj piaciorki dałučylisia Mali i Nikarahua, što składaje ŭ sumie 3,89% usich hałasoŭ.
Treba jašče dadać i toj fakt, što «pryznany donar miru i stabilnaści ŭ rehijonie» z 2007 hoda biezvynikova dabivajecca abrańnia ŭ skład niepastajannych členaŭ Rady Biaśpieki AAN. Apošni raz, kali Biełaruś pasprabavała heta zrabić u červieni minułaha hoda, za jaje prahałasavała 38 krain. Za jaje supiernicu ź Jeŭrasajuza, Słavieniju, prahałasavali 153 dziaržavy.
Jak bačym, Biełaruś nie adnosicca da «hłabalnaj bolšaści» navat pa hałoŭnym dla rehijona pytańni — vajny va Ukrainie.
Ciapier čytajuć
Stała viadoma, jak zatrymali byłoha kalinoŭca Maksima Ralko7
Kamientary