Стала вядома дакладнае месца нараджэння дзеда Уэйна Грэцкі — і гэта не Гродзеншчына, як лічылася раней
Лічылася, што Цярэнцій Лаўрэнавіч пераехаў у Паўночную Амерыку з Гродзенскай губерні, што паўплывала на ход хакейнай гісторыі. Але наконт губерні, як кажуць, ёсць нюанс.
Дзядуля нападніка НХЛ Уэйна Грэцкі быў выхадцам вёскі Агдэмер тагачаснага Кобрынскага павета Гродзенскай губерні, піша Tochka.by.
Паводле інфармацыі крыніцы з архіўных дакументаў, Цярэнцій Лаўрэнавіч Грэцкі нарадзіўся 10 красавіка 1892 года (паводле старога стылю).
Сёння яго паселішча знаходзіцца ў Драгічынскім раёне Брэсцкай вобласці. Гэта Палессе.
Адпаведны запіс знайшоўся ў метрычнай кнізе Гутаўскай царквы Кобрынскага павета Гродзенскай губерні за 1892 год.
Дзед легендарнага хакеіста нарадзіўся ў сям'і Лаўрэна Сямёнавіча і Анастасіі Іванаўны Грэцкіх. У пачатку XX стагоддзя Цярэнцій Лаўрэнавіч Грэцкі перабраўся ў Канаду праз Чыкага. Ён эміграваў з жонкай Ганнай і сынам Зіновіем. У новым заакіянскім жыцці дзядуля Уэйна пачаў насіць імя Тоні.
Неўзабаве ён развёўся са сваёй жонкай і пазнаёміўся з Марыяй з Цярнопальскай вобласці Украіны. У іх нарадзіўся сын Уолтар, які і стаў бацькам будучай легенды НХЛ.
Уолтар і Цярэнцій (Тоні) Грэцкі ўсяляк падтрымлівалі пачынанні юнага Уэйна і яго захапленне хакеем. З тых часоў спартсмен правёў выдатную кар'еру. Ён выступаў за «Эдмантан», «Лос-Анджэлес Кінгз», «Сэнт-Луіс» і «Рэйнджэрс» у НХЛ.
Уэйн Грэцкі гуляў у НХЛ паміж 1978 і 1999 гг. За 21 год кар'еры ён устанавіў 61 рэкорд лігі.
Найвялікшым дасягненнем з'яўляецца найбольшая колькасць закінутых шайб — 894 у 1487 гульнях.
У 2010 годзе Грэцкі пабываў у Мінску, прыехаўшы на матч зорак КХЛ. Тады яму была арганізавана сустрэча з сястрой Галінай Салдаценкавай.
Цяпер чытаюць
У нявесткі Лукашэнкі новы праект. Прадзюсар — Ганна Лукашэнка, аўтар сцэнарыя — Ганна Сялук1
Каментары