Pachmielny sup, žele z žałudoŭ. Što ŭ mieniu źniavolenaha prezidenta Karei?
Mieniu ŭ SIZA Sieuła pazajzdrościć luby jeŭrapiejski restaran azijackaj kuchni.
Jak stała viadoma, 15 studzienia narešcie aryštavali časova adchilenaha ad ułady prezidenta Paŭdniovaj Karei. Karejskija žurnalisty ŭžo raźmiaścili ŭ sacyjalnych sietkach mieniu Sieulskaha centra źniavoleńnia — anałaha našych SIZA, kudy paśla dopytu pavinny dastavić Jun Sok Jola.
Siarod straŭ jość i takija zrazumiełyja dla biełarusa, jak supy s pielmieniami ci kurycaj, tušanaja skumbryja. Akramia hetaha, źniavolenym prapanujuć jajki, arechi, sojevaje małako, johurt i sadavinu.
U toj ža čas šmat i śpiecyfičnych straŭ karejskaj kuchni. Tak, da kožnaha pryjomu ježy dajuć kimčy — vostra prypraŭlenuju kvašanuju harodninu. U pieršuju čarhu heta piekinskaja kapusta, ale ŭ mieniu paznačana i kimčy ź letniaj redźki, a taksama sup (kimčy čynie).
U mieniu i takaja papularnaja paŭdniovakarejskaja strava, jak zakuska ź pieryły — adnahadovaj travianistaj aleistaj raśliny. Listy zamočvajuć u sojevym sousie z dadatkam cukru, časnaku, imbiercu i inšych śpiecyj.
Taksama źniavolenym prapanujuć tokpoki — rysavyja klocki (tok) u vostrym sousie. Časam da ich dadajuć rybu, jajki ci harodninu. Tokpoki — tradycyjnaja vuličnaja ježa ŭ Paŭdniovaj Karei.
Prysutničajuć i stravy z tofu ci tak zvanaha sojevaha syru — papularnaha inhredyjentu ŭ viehanskich i viehietaryjanskich receptach. Źniavolenym prapanujecca sušany tofu i sup ź miakkim tofu.
Jość u mieniu i tradycyjnaja karejskaja «kryvianka» — sunde. Heta faršyravanyja sumieśsiu rysu, viermišeli, harodniny i časam kryvi kiški śvińni ci karovy. Ich smažać, varać ci tušać i padajuć z prypravami.
Siarod supoŭ taksama tradycyjny karejski dvienčžan čyhie, jaki hatujecca na asnovie pasty ź fiermientavanych sojevych baboŭ (dvienčžan). U jaho dadajuć roznuju harodninu, miasa, morapradukty, tofu.
Jość taksama i «pachmielny sup», jaki dobra dapamahaje adnavić vadkaść i elektrality ŭ arhaniźmie i padtrymać ahulny tonus arhanizmu. Jaho skład adroźnivajecca ŭ zaležnaści ad rehijona. Sup moža źmiaščać kimčy, tofu, miasa, prarosłyja sojevyja baby, kitajskuju kapustu, zialonuju cybulu. Buljon zvyčajna hatujecca na jałavičynaj kostcy.
U mieniu taksama čačžanmion — pšaničnaja łokšyna z hustym sousam na asnovie čornaj sojevaj pasty (čačžan).
Siarod straŭ źviartaje na siabie ŭvahu i žele z žałudoŭ ci totcharymuk. Jano hatujecca z žałudovaj muki (totcha) i padajecca z morkvaj, zialonaj cybulaj, časnakom, sojevym sousam, kunžutnym alejem i čyrvonym piercam.
Totcharymuk byŭ adnym z asnoŭnych praduktaŭ charčavańnia ŭ hałodnyja časy Karejskaj vajny (1950—1953). Ciapier ža jon ličycca «zdarovaj ježaj».
Znaŭcy adznačajuć, što ŭ paraŭnańni z raniejšymi časami, kali ježa paŭdniovakarejskich źniavolenych u asnoŭnym składałasia z rysu i fasoli, ciapier u mieniu chapaje straŭ ź miasa — jałavičyna ŭ sojevym sousie (pulhohi), smažanaja śvinina z rysam, sasiski, jość i tušanaja bulba.
Jak bačym, mieniu dastatkova zbałansavanaje, i źniavolenamu prezidentu nie daviadziecca haładać.
Ciapier čytajuć
«Užo tam karoŭ nie zastałosia!»: były načalnik Kačanavaj apłakvaje stan ekanomiki na Połaččynie25
Kamientary