Vieniesuełka ź Biełarusi vyjhrała kulinarnaje šou «Bitva šefaŭ» u Maskvie

Vieniesuełka ź Biełarusi Kajła Pinieda atrymała pieramohu ŭ kulinarnym šou «Bitva šefaŭ» u Maskvie, spadabaŭšysia abodvum viadomym šef-kucharam — jaho viadoŭcam Kanstancinu Iŭlevu i Renatu Ahzamavu, piša «Kamsamołka».

Žurnalistka Kajła Pinieda dziesiać hadoŭ tamu pierajechała ŭ Biełaruś ź Vieniesueły, sustreŭšy svajho muža-bieraściejca. U svaim błohu dziaŭčyna raspaviadaje pra žyćcio ŭ Biełarusi, a taksama pra znajomstva z całkam novaj dla siabie kuchniaj. Mienavita luboŭ da kulinaryi pryviała jaje na kulinarnaje šou «Bitva šefaŭ» na rasijskim kanale «Piatnica».

Pieramoha na «Bitvie šefaŭ»

Biełaruskaja vieniesuełka zmahałasia ŭ 19-m vypusku 4-ha siezona papularnaha teleprajekta. Na «Bitvie šefaŭ» Kajła pradstaviła Kanstancinu Iŭlevu i Renatu Ahzamavu arepu — kukuruznyja aładki z načyńniem ź jałavičyny, syru i sousu «Vasakaka». Dziaŭčyna patłumačyła, što ŭ Vieniesuele heta strava tradycyjna padajecca na śniadanak.

Iŭleŭ pryznaŭsia, što sous jamu «nie zajšoŭ», bo heta nie jaho hust, ale sama kukuruznaja bułačka vielmi spadabałasia.

— Ja skažu vam «tak», bo heta smačna, — adznačyŭ Kanstancin.

Druhomu šefu, Renatu Ahzamavu, vielmi spadabałasia miasa.

Padčas hatavańnia fłańjarda Iŭleŭ adznačyŭ minus u tym, što hruša nie była ačyščana ad skurki, ale samo ciesta jon ličyć vielmi aryhinalnym. Šef Ahzamaŭ, daviedaŭšysia pra vykarystańnie romu, pažartavaŭ, što biełaruskuju ŭdzielnicu treba było pakidać u svajoj kamandzie.

Dziakujučy stanoŭčym acenkam abodvuch šefaŭ Kajła prajšła ŭ druhi etap. U im šefy pamianialisia kamandami, kab dać zadańnie i acanić stravy supiernikaŭ. Udzielniki pavinny byli paŭtaryć stravy, jakija jany kaštavali z zaviazanymi vačyma.

Kamanda Renata Ahzamava hatavała hrybny sup-kapučyna ad Iŭleva, a inšaj kamandzie dastalisia kieksy finanśje — mini-desiert ź mindalnaj muki, papularny ŭ Francyi.

Kajła vybrała kamandu Iŭleva, ale paabiacała druhomu šefu, što asobna pryhatuje dla jaho arepu.

Pavialičyć

U finale ŭdzielniki rychtavali aŭtarskuju stravu z… kaŭbasy. Atrymaŭšy zadańnie, Kajła źbiantežyłasia.

— Boža, što možna zrabić z kaŭbasy? U nas u Vieniesuele kaŭbasa nie papularnaja — tolki sasiski ci toje, što možna pryhatavać na hryli, — pryznałasia jana.

Na hatavańnie było 40 chvilin. Kajła vyrašyła zrabić salanku — pieršy sup, jaki jana pryhatavała ŭ Biełarusi.

— U vieniesuelskaj kuchni niama ničoha padobnaha da salanki. My zvyčajna hatujem supy ź jałavičyny abo rebraŭ i dadajem śviežuju kukuruzu, — padzialiłasia jana.

U svajoj salancy Kajła absmažyła cybulu i kaŭbaski, dadajučy tamatavuju pastu i salonyja ahurki.

— Pakolki žyvu ŭ Biełarusi, ja dadała bulbu — samy hałoŭny pradukt. Paśla dadaju vadu ŭ bulon i čakaju, pakul usie inhredyjenty «aženiacca» i pojduć u miadovy miesiac, — pažartavała jana.

Finalnaje vyprabavańnie — ślapaja dehustacyja. Šefy nie viedali, čyju stravu kaštujuć.

Kanstancin Iŭleŭ padkreśliŭ, što salanka Kajły dobra adpaviadaje techničnamu zadańniu, ale zaŭvažyŭ niedachop:

— O, nie! Heta nie salanka, tut navat bulba jość! Nie, nu smačna, ale bulba tut zusim lišniaja, — pažartavaŭ jon.

Ahzamaŭ ža adznačyŭ:

— Niezaležna ad taho, chto heta pryhatavaŭ, udzielnik — małajčyna.

— A moža ŭdzielnica prosta nie viedała, što ŭ rasijskuju salanku bulbu nie kładuć? — pačaŭ zdahadvacca Iŭleŭ.

Pavialičyć

U vyniku sudździ paličyli, što strava adpaviadaje zadańniu.

— Heta maja biełaruskaja salanka, ale «pa-vieniesuelsku» i z ruskaj dušoj, — skazała Kajła.

Pa vynikach konkursu pieramožcaj «Bitvy šefaŭ» stała Kajła Pinieda.

— Heta dla mianie samaja lepšaja pieramoha! I tym bolš pryjemna, što heta tolki druhi raz u maim žyćci, kali ja hatavała salanku, — pryznałasia jana.

• 8
• 1
• 1
• 1
• 0
• 0
• 0
• 0