Siadzieńni ŭ samalotach stanuć dvuchpaviarchovymi? Airbus stvaraje inavacyjny dyzajn

Adzin z najbujniejšych suśvietnych vytvorcaŭ samalotaŭ vyvučaje inavacyjny dyzajn dvuchuzroŭnievych siadzieńniaŭ, jaki moža źmianić budučyniu avijapieralotaŭ.

Jak piša CNN Travel, avijacyjny hihant Airbus pačaŭ supracoŭnictva sa startapam Chaise Longue, jaki staŭ viadomym dziakujučy kanceptu niezvyčajnaha dvuchuzroŭnievaha dyzajnu siadzieńniaŭ u samalotach. Spačatku toje byŭ studencki prajekt, ale ciapier, dziakujučy ŭvazie najbujniejšaha vytvorcy avijałajnieraŭ, jon, mahčyma, atrymaje šaniec na realizacyju.

Jak heta pracuje?

Dyzajn Chaise Longue praduhledžvaje vydaleńnie vierchnich bahažnych palic i raźmiaščeńnie druhoha ŭzroŭniu siadzieńniaŭ nad nižnim šeraham. Heta dazvolić aptymizavać prastoru ŭ sałonie samalota i patencyjna pavialičyć kolkaść pasažyraŭ.

Vierchni ŭzrovień prapanuje bolšy vuhał nachiłu kresła i mahčymaść vyprastać nohi, što dazvalaje lepš adpačyvać padčas doŭhich pieralotaŭ.

Prastora dla noh budzie pavialičanaja i dla pasažyraŭ nižniaha ŭzroŭniu, jaki na fota vyhladaje ciesnym. Raspracoŭščyki zapeŭnivajuć, što pasažyry zmohuć atrymać asałodu ad dadatkovaha miesca dla noh, bo taksama zmohuć ich vyciahvać.

CNN Travel prateściravała pieršyja pratatypy dvuchuzroŭnievych siadzieńniaŭ i pryjšła da vysnovy, što nižni ŭzrovień moža vyklikać adčuvańnie kłaŭstrafobii, ale dadatkovaja prastora dla noh moža kampiensavać dla niekatorych pasažyraŭ takuju niazručnaść.

Pieršapačatkova dyzajn byŭ raźličany dla ekanom-kłasa, ale ŭ minułym hodzie startap pradstaviŭ viersiju Chaise Longue dla biznes– i pieršaha kłasaŭ.

Krytyka i adkazy

Ideja dvuchuzroŭnievych siadzieńniaŭ nieadnaznačna ŭsprymajecca ludźmi. Kali pieršyja pratatypy trapili ŭ internet, to vyklikali žarty i krytyku.

Adny naśmichalisia, što nižni šerah pasažyraŭ moža sutyknucca ź niepryjemnymi pachami źvierchu, a inšyja śćviardžali, što heta sproba avijakampanij ucisnuć u sałon jak maha bolš ludziej.

Adnak dyzajnier Alechandra Nuńjes Vinsiente (Alejandro Núñez Vicente), kiraŭnik startapa Chaise Longue, zajaŭlaje, što nie sprabuje całkam zamianić tradycyjnyja miescy ŭ samalotach. Jon padkreślivaje, što jany nikudy nie źniknuć: Chaise Longue moža raźmiaščacca pasiaredzinie sałona, a pa bakach buduć kłasičnyja šerahi siadzieńniaŭ.

Pavialičyć

Nuńjes Vinsiente pryznaje, što avijakampanii mohuć vykarystoŭvać hetuju kancepcyju dla pavieličeńnia dachodaŭ i ekanomii na raschodach, źmiaščajučy bolš pasažyraŭ abo prapanoŭvajučy novyja typy miescaŭ. Adnak, na jaho dumku, heta tolki dadatkovy bonus, a nie asnoŭnaja meta prajekta.

Choć Airbus pakul nie daje padrabiaznych kamientaryjaŭ nakont prajekta, ale fakt taho, što jany vyvučajuć hetuju kancepcyju, pakazvaje, što dvuchuzroŭnievyja siadzieńni mohuć stać realnaściu. Sam Nuńjes Vinsiente adznačaje, što napieradzie jašče doŭhi šlach raspracoŭki. Kali ŭsio składziecca, mahčyma, praź niekalki hadoŭ pasažyry zmohuć sami vybirać — sieści na «bałkon» ci vyprastać nohi na nižnim uzroŭni.

• 6
• 6
• 1
• 13
• 1
• 0
• 0
• 0