Historyja stryptyziorki i syna rasijskaha aliharcha. Čym cikavy film, jaki atrymaŭ sioleta «Oskara»?
U stužcy źnialisia rasijski akcior, jaki raniej hraŭ kapitana NKVD, i dźvie biełaruski.
Favarytam premii «Oskar» hetaha hoda staŭ film «Anora» amierykanskaha režysiora Šona Bejkiera. Karcina vyjhrała piać naminacyj z šaści — «najlepšy film», «najlepšaja aktrysa» (Majki Medysan), «najlepšy režysior», «najlepšy scenaryj» i «najlepšy mantaž», što dazvoliła Bejkieru paŭtaryć rekord Uołta Dysneja pa kolkaści ŭznaharod, atrymanych za adzin viečar.
Hałoŭnaja hierainia filma — 23-hadovaja stryptyziorka Anora Michiejeva z Bruklina. Jana impulsiŭna vychodzić zamuž za Vaniu Zacharava, syna rasijskaha aliharcha, jakomu niekalki razoŭ akazvaje intymnyja pasłuhi. Paśla niekalkich sustreč i pajezdki ŭ Łas-Viehas, maładyja ludzi tajemna biaruć šlub. Baćki žanicha nie ŭchvalajuć taki niaroŭny sajuz i hatovyja zrabić usio, kab jaho anulavać, što pryvodzić da šerahu dramatyčnych i kamiedyjnych situacyj.
Pa słovach režysiora Šona Bejkiera, na stvareńnie «Anory» jaho natchniła historyja siabra pra rasijska-amierykanskuju paru, jakaja jak tolki ažaniłasia, trapiła ŭ situacyju z vykradańniem — žanicha byccam uziali ŭ zakład dla vypłaty daŭhoŭ.
Bejkier śćviardžaje, što jahonaja meta — raspaviadać «čałaviečyja historyi», jakija buduć mieć univiersalny źmiest. «Anoraj» jon choča dapamahčy źniać styhmu z seks-pracy, bo hetaja śfiera tradycyjna vyklikaje šmat niehatyŭnych stereatypaŭ.
Dla bolšaha razumieńnia hetaj temy režysior naniaŭ tvorčaj kansultantkaj Andreju Verchun — kanadskuju piśmieńnicu i aktrysu, viadomuju svaim miemuarami «Modern Whore» («Sučasnaja šł*cha»), dzie jana raskazvaje pra svoj ułasny dośvied u seks-industryi.
Vykanaŭca hałoŭnaj roli Majki Medysan śpiecyjalna vučyła ruskuju movu, asvojvała bruklinski akcent i naviedvała stryp-kłuby, kab pierakanaŭča ŭvasobić vobraz Ani.
Zdymki prachodzili na realnych łakacyjach u Ńju-Jorku (paŭdniovy Bruklin) i Łas-Viehasie. Režysior navat znajšoŭ sapraŭdny asabniak aliharcha praz pošuk u Google («najbujniejšy asabniak Brajtan-Bič»), dzie zdymaŭ sceny ŭ domie siamji Zacharavych.
U karcinie źniaŭsia ceły šerah rasijskich akcioraŭ. Siarod ich Juryj Barysaŭ, jaki staŭ pieršym rasijskim akcioram, naminavanym na «Oskar», ale premija za najlepšuju mužčynskuju rolu druhoha płana dastałasia inšamu.
Barysaŭ mnohim zapomniŭsia pa rasijskim filmie «Kapitan Vaŭkanohaŭ uciok», dzie syhraŭ hałoŭnuju rolu. Tam raskazvajecca historyja kapitana NKVD, čyj adździeł u poŭnym składzie akazvajecca tam ža, dzie i ich achviary.
U filmie źnialisia i dźvie biełaruski. Adna ź ich — Maryja Žak. Jana skončyła žurfak BDU i akciorskija kursy Steły Adler. Biełaruska syhrała epizadyčnuju rolu chostes Taćciany, piša telehram-kanał «Kavałačak žyćcia».
Druhaja biełaruskaja aktrysa — Maryja Tyčynskaja. Jana vykanała rolu Dašy, adnoj ź dziaŭčat, jakaja tusujecca ź Ivanam (Mark Edelštiejn). Dziaŭčyna žyvie ŭ ZŠA dzieviać hadoŭ i źjaŭlajecca pradprymalnicaj — u jaje jość ułasnaje ahienctva pa brendzinhu, źviartaje ŭvahu kanał «Śviaščenny Biełavud».
Darečy, baćki Juryja Barysava taksama majuć biełaruskija karani.
Šlach da hałoŭnaj kinapremii śvietu «Anora» pačała ŭ minułym hodzie. Jaje premjera adbyłasia na 77-m Kanskim kinafiestyvali, dzie film atrymaŭ hałoŭny pryz — «Załatuju palmavuju halinku».
Film byŭ vysoka acenieny krytykami pa ŭsim śviecie. Tak, na viadomym amierykanskim ahrehatary recenzij Rotten Tomatoes jaho rejtynh składaje 93% (pry siaredniaj adznacy 8,5 z 10). Inšy aŭtarytetny resurs, Metacritic, dzie zvodziacca mierkavańni žurnalistaŭ i raźličvajecca siaredniaja acenka, prysvoiŭ filmu 91 bał sa 100. Na francuzskim sajcie AlloCiné «Anora» atrymała siaredniuju acenku 4,2 z 5 na padstavie 45 recenzij krytykaŭ krainy.
«Anora» trapiła ŭ śpisy «samych prykmietnych filmaŭ hoda» adrazu ŭ niekalkich upłyvovych kinakrytykaŭ, a niekatoryja navat nazvali jaje «novaj kłasikaj niezaležnaha kino».
Razam z tym u častki aŭdytoryi ŭźnikli źmiešanyja pačućci z-za ŭdziełu ŭ prajekcie akcioraŭ z Rasii. Scenaryst Michaił Idaŭ u haziecie The New York Times napisaŭ:
«Choć «Anora» zusim nie vyhladaje čymści nastolki niedarečnym, kab jaje možna było ličyć prarasijskaj ci antyrasijskaj, jaje oskaraŭskija naminacyi, asabliva za najlepšuju mužčynskuju rolu druhoha płana dla Juryja Barysava, u Rasii padajuć jak nacyjanalnuju pieramohu. I heta stavić mianie ŭ vyklučna niajomkaje stanovišča: atrymlivajecca, što, radujučysia pośpiechu filma, ja mižvoli apynajusia ŭ adnoj kampanii z davoli sumnieŭnymi asobami».
Pry biudžecie ŭ šeść miljonaŭ dalaraŭ, u prakacie «Anora» ŭžo sabrała 41 miljon.
Ciapier čytajuć
«Užo tam karoŭ nie zastałosia!»: były načalnik Kačanavaj apłakvaje stan ekanomiki na Połaččynie25
Kamientary