Žurnalistka Ksienija Łuckina: Nie pamiataju pryjezd u kałoniju, tamu što vyvaliłasia z aŭtazaka i straciła prytomnaść
Žurnalistka Ksienija Łuckina vyjechała ź Biełarusi. Byłaja palitźniavolenaja raskazała «Našaj Nivie», jak ciapier jaje zdaroŭje i što płanuje rabić.
Kab dapamahčy Ksienii ŭładkavacca ŭ zamiežžy, «Bajsoł» adkryŭ zbor — paŭdzielničać možna tut.
Ciapier Ksienija znachodzicca ŭ Vilni ź siamjoj, ale heta nie kančatkovy punkt jaje šlachu. Razam z rodnymi žančyna vyrašaje, dzie lepš astalavacca.
Ksienija vyjšła na volu ŭ žniŭni 2024-ha, ale, raskazvaje jana, upieršyniu adčuła siabie volnaj tolki 3 sakavika — u dzień evakuacyi ź Biełarusi.
«Ciapier ja chaču rabić samaje hałoŭnaje — žyć. Pa mahčymaści pracavać, rabić, dy prosta žyć poŭnym žyćciom. Ja vielmi lublu žyćcio i vielmi lublu svaju prafiesiju. Dla mianie było b cudoŭna, kali b ja mahła rabić niešta praktyčnaje, ale ja pakul nie vielmi razumieju, jak heta mahčyma».
Ksieniju nie pakidajuć dumki pra inšych palitźniavolenych — praz heta jana zachoŭvaje aściarožnaść u vykazvańniach:
«Častka majho serca i majoj dušy zastałasia tam, z tymi žančynami, jakich ja lublu. Ničoha nie budu rabić, kab nie pieraškadžać im žyć, spakojna prachodzić kožny dzień ich žyćcia. Tamu što heta ciažka — stajać čatyry razy na dzień na vulicy i čakać, pakul ciabie pravierać. Heta ciažka — vynosić śnieh, myć vulicy, heta ciažka i pobytava, i maralna. Ničoha nie zrablu, kab nie pahoršyć im žyćcio. Ja vielmi chaču, kab jany vyjšli, heta budzie samy hałoŭny padarunak dla mianie.
Pakul ty tam, ty nie razumieješ, što heta vyprabavańnie. Ty prosta idzieš, žyvieš kožny dzień — maŭlaŭ, siońnia ŭ ciabie žyćcio takoje. A potym vychodziš i tolki miesiacy praz try razumieješ, što tak sabie pryhoda była».
U Ksienii surjoznyja prablemy sa zdaroŭjem — žančyna maje puchlinu hałaŭnoha mozha. Za kratami jaje chvaroba abvastryłasia. Akramia hetaha, Ksienija pieraniesła dvuchbakovuju pnieŭmaniju.
«Pierš za ŭsio, ja nie pamiataju, jak uvohule pryjechała ŭ kałoniju, tamu što vyvaliłasia z aŭtazaka — straciła prytomnaść. Mianie ŭ invalidnym vazku adrazu pryvieźli ŭ balnicu, pieršy tydzień ja znachodziłasia tam.
Niešta zdaryłasia z maim arhanizmam, złamaŭsia. Dumaju, jon prosta tryvaŭ dva hady ŭ SIZA, i praź vializny stres pačali raźvivacca simptomy. Fizičny stan pačaŭ vielmi mocna paharšacca. Letam, pierad vyzvaleńniem, ja mahła ŭžo 2-3 razy na dzień stracić prytomnaść».
Ciapier Ksienija płanuje prajści abśledavańnie, kab vyśvietlić, što adbyvajecca ź jaje zdaroŭjem. Žančynie taksama pryznačyli novyja leki, i jany dajuć dobry efiekt: Ksienija bolš nie stračvaje prytomnaść pa niekalki razoŭ na dzień, jana lepš vyhladaje.
Byłaja źniavolenaja padkreślivaje, što vielmi ŭdziačnaja ŭsim, chto jaje padtrymlivaŭ padčas źniavoleńnia:
«Štodzień tabie tam kažuć, što pra ciabie ŭsie zabylisia i ty nikomu nie patrebnaja, a ty dakładna viedaješ, što heta niapraŭda i pra ciabie nie zabylisia, i ty razumieješ, što ty patrebnaja. Dziakuj vialiki ŭsim i kožnamu, chto byŭ usie hetyja hady sa mnoj i praciahvaje być.
Maje siabry pytalisia ŭ mianie — maŭlaŭ, ci adčuvaješ ty, kali pra ciabie dumajuć. Ščyra — adčuvaješ. Vialiki dziakuj za padtrymku, heta vielmi šmat značyć, i heta nasamreč nieacenna. Tam, za kratami, ty razumieješ, nakolki biełarus biełarusu biełarus. I nakolki heta kryštalny i prazrysty čas, nakolki my ciapier bačym ludziej, jakija kala nas. I, ščyra, dobrych ludziej — pieravažnaja bolšaść».
Da žniŭnia 2020-ha Ksienija Łuckina pracavała na BT. Paśla vybaraŭ jana dałučyłasia da strajku supracoŭnikaŭ kanała, zvolniłasia i ŭvajšła ŭ asnoŭny skład Kaardynacyjnaj rady. Razam ź inšymi byłymi supracoŭnikami dziaržTB Ksienija płanavała stvaryć «alternatyŭnaje telebačańnie» na YouTube.
Žančynu zatrymali 22 śniežnia 2020-ha, praz dva hady jaje asudzili na 8 hadoŭ źniavoleńnia pa artykule 357 Kryminalnaha kodeksu («Zmova ci inšyja dziejańni, učynienyja z metaj zachopu dziaržaŭnaj ułady»). Na voli Ksieniju čakaŭ jaje vaśmihadovy syn.
U žniŭni 2024-ha Ksienija Łuckina vyjšła na volu pa pamiłavańni.
Kab dapamahčy Ksienii ŭładkavacca ŭ zamiežžy, «Bajsoł» adkryŭ zbor — paŭdzielničać možna tut.
«Naša Niva» — bastyjon biełaruščyny
PADTRYMAĆCiapier čytajuć
Stała viadoma, jak zatrymali byłoha kalinoŭca Maksima Ralko2
Kamientary