ZŠA damovilisia z Ukrainaj i Rasijaj ab zabaronie atak u Čornym mory
Padčas pieramoŭ u Er-Ryjadzie delehacyja ZŠA damoviłasia z pradstaŭnikami Ukrainy i Rasii spynić ataki na kamiercyjnyja sudny ŭ Čornym mory, vynikaje z paviedamleńniaŭ Biełaha doma.
«Złučanyja Štaty i Ukraina damovilisia zabiaśpiečyć biaśpiečnaje sudnachodstva, vyklučyć prymianieńnie siły i praduchilić vykarystańnie kamiercyjnych sudoŭ u vajennych metach u Čornym mory», — skazana ŭ zajavie Biełaha doma.
Takuju ž damoŭlenaść zaklučyli i padčas pieramoŭ z rasijskim bokam.
Pa słovach Uładzimira Zialenskaha, damoŭlenaść moža pačać dziejničać z 25 sakavika. Zhodna z zajavaj z rasijskaha boku, «režym cišyni» ŭ Čornym mory pačnie dziejničać paśla admieny sankcyj suprać «Rośsielchozbanka» i inšych, što zabiaśpiečvajuć handal.
Zabarona na ŭdary pa abjektach enierhietyki, pa paviedamleńni Kramla, dziejničaje 30 dzion i adličvajecca z 18 sakavika.
Ministr abarony Ukrainy Rustem Umieraŭ dadatkova padkreśliŭ, pierasoŭvańnie Rasijaj svaich vajennych sudoŭ za miežy ŭschodniaj častki Čornaha mora budzie ličycca parušeńniem hetaj damoŭlenaści i budzie razhladacca jak parušeńnie abaviazacielstvaŭ zabiaśpiečyć svabodu sudnachodstva ŭ Čornym mory i pahrozu nacyjanalnaj biaśpieki Ukrainy.
«U takim vypadku, Ukraina budzie mieć poŭnaje prava realizoŭvać prava na samaabaronu», — napisaŭ jon.
Taksama delehacyja ZŠA asobna z Ukrainaj i Rasijaj damoviłasia raspracavać miery dla ŭzajemnaha spynieńnia napadaŭ pa enierhietyčnych abjektach Rasii i Ukrainy.
U Biełym domie adznačyli, što dapamohuć adnavić dostup Rasii da suśvietnaha rynku ekspartu sielskahaspadarčaj pradukcyi i ŭhnajeńniaŭ, źnizić vydatki na marskoje strachavańnie i pašyryć dostup da partoŭ i płaciežnych sistem dla takich apieracyj.
Papiaredni raŭnd pieramoŭ pamiž delehacyjami Ukrainy i ZŠA prajšoŭ 11 sakavika ŭ Džydzie. Pa jaho vynikach Ukraina pahadziłasia na nieadkładnaje časovaje pieramirje — za heta Vašynhton vyrašyŭ adnavić dapamohu i abmien źviestkami vyviedki.
Uładzimir Zialenski zajaviŭ, što spynieńnie ahniu na 30 dzion zapracuje dla ŭsioj linii frontu, kali na heta pahodzicca Rasija.
Kamientary