«Spuskajusia, kab adčynić padjezd»: u «Novaj Baravoj» prablemy z damafonami

Žychary niekatorych kvartałaŭ nieadnarazova źviartalisia ŭ kirujučuju kampaniju «A-100 Kamfort» z hetym pytańniem, adnak prablema nie vyrašanaja. Tochka.by pasprabavała razabracca, čamu tak adbyvajecca i kali damafony pačnuć pracavać u poŭnaj miery.

«Časta spuskajusia ŭniz, kab upuścić ludziej u padjezd»

Anton — žychar kvartała «Višniovy». Pierad kuplaj kvatery ŭ «Novaj Baravoj» u sakaviku 2023 hoda mužčynu zapeŭnivali, što ŭ domie buduć ustalavanyja damafony Tantos. Na hetych pryładach zvanok i videa pieradajucca na manitor, ustalavany ŭ kvatery. Adnak padčas pryjomu žylla ŭ červieni 2024-ha abstalavańnie akazałasia inšym.

«Abiacanyja manitory ŭnutry kvatery nie ŭstalavali, zamiest hetaha ŭ nas ciapier novaja sistema HomeID. Jana całkam zaviazanaja na śpiecyjalnym dadatku. Jaho treba ŭstalavać na svaje hadžety», — raspaviadaje žychar «Novaj Baravoj». Zamiest zvykłaj sistemy davodzicca karystacca smartfonam: tudy tranślujecca videa, i tam ža možna adčynić dźviery.

Anton skardzicca i na zvanki, jakija, pavodle jaho słoŭ, dachodziać tolki ŭ pałovie vypadkaŭ. Asabliva vyrazna prablema prajaŭlajecca ŭ 20:00—21:00, kali najčaściej pryjazdžajuć kurjery.

Žychary sprabavali razabracca z hetym pytańniem — vyklikali śpiecyjalistaŭ, pieraŭstaloŭvali dadatak, ale situacyja nie źmianiłasia.

«Prablema jašče i ŭ tym, što vyjava źjaŭlajecca tolki praz 5—10 siekund. Da hetaha bačyš prosta čorny ekran», — dadaje surazmoŭca. Raspaznavańnie tvaraŭ u damafonach taksama nie pracuje. Adnak, pakolki ŭ pryładach usio ž jość videa, žychary sutykajucca ź situacyjaj, kali damafon pačynaje niepryjemna piščać, z-za taho što nie moža raspaznać tvar čałavieka, jaki pryjšoŭ.

«Usio zvodzicca da taho, što ŭ bolšaści vypadkaŭ mnie prosta davodzicca spuskacca ŭniz, kab zapuścić haściej i kurjeraŭ. Damafon abo nie pracuje, abo čałaviek nie moža pa im dazvanicca ŭ kvateru», — kaža Anton.

«Davodzicca vybirać — adčynić dźviery abo pahavaryć pa telefonie»

Viktoryja žyvie ŭ kvartale «Jaźminavy». U jaje domie taksama ŭstalavany damafon ź niepracoŭnym Face ID, i dźviery joj davodzicca adčyniać z dapamohaj čypa abo koda.

«Uražańnie, byccam hetaja funkcyja była zajaŭlenaja vyklučna jak markietynhavy chod. Pa sutnaści, kab puścić pył u vočy», — skardzicca žycharka «Novaj Baravoj».

Akramia taho, u žycharoŭ novabudoŭlaŭ jość niezadavolenaść i z nahody damafonaŭ u zakrytych dvarach. Tak, naprykład, dzieciam davodzicca davać klučy, kab jany mahli samastojna viarnucca ŭ padjezd. Ale hetymi ž klučami dzieci mohuć adčynić varoty dvara i vyjści ź jaho. Ludzi ličać takuju sistemu niebiaśpiečnaj, tamu žycharam nie chapaje abiacanaha Face ID.

Pad adnym z pastoŭ u akaŭncie A-100 navat razharełasia sprečka na hetuju temu. Jak śćviardžaje surazmoŭca, u niekatorych situacyjach davodzicca vybirać — abo pahavaryć pa telefonie, abo pierapynić razmovu i adčynić dźviery.

«Da taho ž, kali niechta telefanuje ŭ damafon, vyklik prychodzić na ŭsie padklučanyja pryłady ŭsim členam siamji. Heta maksimalna niazručna», — adznačaje Viktoryja.

Pavodle jaje słoŭ, takija damafony — vialikaja ekanomija zabudoŭščyka na kamunikacyjach, bo ŭ kvateru nie treba ciahnuć dadatkovyja draty.

«Na paviersie ŭ nas taksama pastavili maksimalna prymityŭny Bluetooth-zvanok. Na Wildberries jon kaštuje kapiejki. I kali tabie zvoniać z paviercha ŭ kvateru, to ty nie možaš pahladzieć, chto za dźviaryma. Tak być nie pavinna», — ličyć Viktoryja.

«Zastalisia z darahim i niepracujučym abstalavańniem»

Jašče adzin žychar «Jaźminavaha» kvartała, Maksim, śćviardžaje, što nibyta nabyvaŭ kvateru pad sousam «samaje-samaje», ale pytańni ŭźnikajuć navat z takimi bazavymi rečami, jak videadamafon.

«U «A-100 Kamfort» u vusnaj razmovie mnie skazali, što našy damafony pakul nie buduć narmalna pracavać. Usio z-za Zakona «Ab abaronie piersanalnych danych». A na pytańnie, navošta tady było stavić takoje darahoje abstalavańnie, adkazu ja nie atrymaŭ», — raspaviadaje surazmoŭca. Pavodle jaho słoŭ, žychary zastalisia z darahim i nie dziejnym naležnym čynam abstalavańniem.

«Nam jak žycharam vielmi chočacca daviedacca, kali zapracuje funkcyja Face ID. Da taho ž niezrazumieła, čamu zabudoŭščyk stavić u novyja damy videadamafony biez chatniaha ŭnutranaha błoka. Ciapier pryjom vykliku idzie tolki na smartfony i płanšety žycharoŭ», — kaža Maksim.

Prablema adsutnaści błoka, jak śćviardžaje žychar «Novaj Baravoj», u tym, što kali na smartfonie skončycca zaradka abo źniknie internet, to jość vierahodnaść stracić dastaŭku, nie ŭpuścić hościa abo navat chutkuju dapamohu.

Što adkazali ŭ Nacyjanalnym centry pa abaronie piersanalnych danych?

Z pytańniem pra toje, jakija mohuć być pieraškody ŭ pracy damafonnaha abstalavańnia z Face ID, žurnalisty źviarnulisia ŭ Nacyjanalny centr abarony piersanalnych danych.

Va ŭstanovie padkreślili, što ŭstanoŭka i vykarystańnie damafonaŭ z funkcyjaj videazapisu i vykarystańniem technałohii Face ID nie supiarečyć zakanadaŭstvu ab piersanalnych danych. Adnak kali vykarystoŭvajucca technałohii, z dapamohaj jakich ažyćciaŭlajecca identyfikacyja čałavieka pa bijamietryčnych piersanalnych danych — naprykład, pa adbitkach palcaŭ, voku i charakternych rysach tvaru, to ažyćciaŭlajecca apracoŭka śpiecyjalnych piersanalnych danych. A dla hetaha nieabchodna zhoda žycharoŭ.

«Zhodna z artykułam 8 Zakona «Ab abaronie piersanalnych danych», apracoŭka takich źviestak biez zhody subjekta zabaronienaja, za vyklučeńniem vypadkaŭ, praduhledžanych zakonam. U apisanaj situacyi takich vyklučeńniaŭ niama», — adznačyli ŭ centry.

Pry hetym nieabchodna pradastavić alternatyŭnyja sposaby dostupu ŭ budynak tym, chto nie zhodny na apracoŭku svaich bijamietryčnych piersanalnych danych. Naprykład, z dapamohaj elektronnych klučoŭ (čypaŭ) abo kart. Akramia taho, arhanizacyja, jakaja ŭstanaviła damafony ź videazapisam i Face ID, pavinna nie tolki zabiaśpiečyć abaronu piersanalnych danych (arhanizacyjnyja, pravavyja i techničnyja miery), ale i realizavać kompleks mier pa papiaredžańni ryzykaŭ dla pravoŭ i svabod subjektaŭ piersanalnych danych.

Ustanova nakiravała zapyt u kirujučuju arhanizacyju žyłoha kompleksu «Novaja Baravaja» z prośbaj pradastavić nieabchodnyja źviestki pa hetym pytańni.

Što kaža zabudoŭščyk?

U «A-100 Deviełopmient» taksama zapytalisia, jak budzie vyrašacca prablema z damafonami ŭ «Novaj Baravoj».

«My imkniemsia zabiaśpiečyć maksimalny ŭzrovień kamfortu i biaśpieki ŭ našych žyłych kompleksach. Z hetaj metaj na etapie prajektavańnia byli ŭkaranionyja sučasnyja sistemy identyfikacyi asob Face ID», — adkazali ŭ kampanii zabudoŭščyka.

Dla vykarystańnia sistemy Face ID u Biełarusi ad arhanizacyj, jakija pracujuć ź piersanalnymi danymi, patrabujecca vykanańnie šerahu ŭmoŭ.

Tak, kampanija pavinna dakładna vyznačyć, navošta jana apracoŭvaje piersanalnyja danyja. U vypadku z Face ID heta nieabchodna dla zabieśpiačeńnia kantralavanaha dostupu. Akramia taho, treba atrymać zhodu ludziej na vykarystańnie ich fotazdymkaŭ.

Taksama arhanizacyja pavinna raspracavać i ŭkaraniać šerah łakalnych narmatyŭnych aktaŭ. Najbolš składanaja techničnaja zadača — stvareńnie i atestacyja sistemy abarony infarmacyi, jakaja adpaviadaje patrabavańniam rehulatara.

«Razumiejučy, što vykanańnie hetych patrabavańniaŭ moža być składanym dla tavarystvaŭ ułaśnikaŭ, my raspracavali rašeńnie, jakoje dazvalaje im u poŭnaj miery vykonvać zakon. Hetaje rašeńnie ŭklučaje ŭ siabie techničnyja miery, jakija ciapier prachodziać praceduru ŭzhadnieńnia», — padkreśliŭ zabudoŭščyk.

Paśla taho jak usie ŭzhadnieńni buduć zavieršanyja, pačniecca praces atestacyi sistemy abarony infarmacyi. Atrymaŭšy adpaviedny siertyfikat, kampanija zmoža lehalna apracoŭvać bijamietryčnyja danyja žycharoŭ, jakija dali zhodu na vykarystańnie Face ID.

U «A-100 Dieviełopmient» padkreślili, što žychary, jakija nie žadajuć karystacca sistemaj Face ID, zmohuć i nadalej karystacca najaŭnymi identyfikatarami (čypami).

• 0
• 0
• 0
• 0
• 0
• 0
• 1
• 0