Akcyi ZŠA paśla abjaŭleńnia Trampam handlovaj vajny patańnieli amal na $3 tryljony za hadzinu
Rašeńnie Donalda Trampa abkłaści taryfami ŭvieś impart, jaki pastupaje ŭ ZŠA, i ŭvieści asobnyja myty dla najbujniejšych handlovych partnioraŭ Štataŭ abiarnułasia najmacniejšym z časoŭ pandemii abvałam na amierykanskim fondavym rynku, piša The Moscow Times.
Na starcie tarhoŭ u čaćvier indeks S&P500 upaŭ bolš čym na 4%, Nasdaq — na 4,9%, Dow Jones — na 3,7%, a indeks Russell 2000, kudy ŭvachodziać kampanii małoj kapitalizacyi, abvaliŭsia amal na 7%.
Krychu bolš čym za hadzinu tarhoŭ uvachodnyja papiery najbujniejšych amierykanskich kampanij patańnieli na $2 tryljony. A ahulnaja kapitalizacyja rynku ZŠA abrynułasia na $2,7 tryljona — rekordna z 2020 hoda, pavodle padlikaŭ The Wall Street Journal.
Akcyi Apple, zavody jakoj znachodziacca ŭ Kitai, što trapiŭ pad samyja surovyja myty Trampa, abvalilisia na 9,5%. U vyniku kampanija patańnieła na $300 miljardaŭ. Papiery rytejleraŭ Target i Dollar Tree, palicy jakich napoŭnienyja kitajskimi tavarami, abvalilisia bolš čym na 12%. Amazon straciła $165 miljardaŭ kapitalizacyi, Nvidia — $183 miljardy.
Miljardnyja straty panieśli najbujniejšyja donary Trampa: Iłan Mask źbiadnieŭ na $6 miljardaŭ praz abvał akcyj Tesla, a Styvien Švarcman, kiraŭnik inviestfondu Blackstone Group, straciŭ $3 miljardy, piša The New York Times.
Najmacniejšaje za try hady padzieńnie pieražyŭ rynak nafty: fjučarsy na hatunak Brent patańnieli na 7% i apuskalisia nižej za $70 za barel. Indeks Maśbiržy asieŭ na 2,3% i zaviaršyŭ u minusie 12-y dzień zapar, čaho biržavaja statystyka nie bačyła ni razu ŭ sučasnaj historyi Rasii.
Vystupajučy ŭ sieradu ŭviečary ŭ Ružovym sadzie Biełaha doma, Tramp abviaściŭ pra rašeńnie ŭvieści 10-pracentnyja taryfy na bolšaść tavaraŭ, impartavanych u ZŠA, u tym liku dadatkovyja 34-pracentnyja myty dla Kitaja i 20-pracentnyja dla Jeŭrapiejskaha Sajuza.
U vyniku siaredniaja staŭka taryfaŭ ZŠA na ŭvieś impart vyrasła z 2,5% u 2024 hodzie da 22% — uzroŭniu, jaki apošni raz naziraŭsia kala 1910 hoda, skazaŭ Ołu Sanoła, kiraŭnik adździeła ekanamičnych daśledavańniaŭ ZŠA ŭ Fitch Ratings.
«Heta całkam mianiaje praviły hulni nie tolki dla ekanomiki ZŠA, ale i dla suśvietnaj ekanomiki, — skazaŭ Sanoła. — Mnohija krainy, vierahodna, čakaje recesija».
Maštaby taryfaŭ akazalisia značna vyšejšymi, čym čakałasia: pa raźlikach Biełaha doma, jany pryniasuć u amierykanski biudžet $6 tryljonaŭ u najbližejšyja 10 hadoŭ i skarociać deficyt, jaki ŭ 2024 hodzie razrośsia da biesprecedentnych $3 tryljonaŭ, a ŭ 2025-m — bje letašnija rekordy.
Pa sutnaści rašeńnie Trampa — heta najbujniejšaja z kanca 1960-ch padatkovaja reforma, pišuć analityki JP Morgan. Canoj napaŭnieńnia biudžetu, zrešty, mohuć stać recesija ŭ ZŠA, recesija ŭ Jeŭrasajuzie i hłabalnaja stahflacyja, ličyć Devid Roš, strateh Quantum Strategy.
Ułady ES rychtujuć pakiet kontrmieraŭ u adkaz na myty Trampa, zajaviła ŭ čaćvier kiraŭnica Jeŭrakamisii Ursuła fon der Lajen. Kitaj vystupaje «rašuča suprać» uviedzienych ZŠA taryfaŭ i taksama «prymie kontrmiery dla abarony svaich pravoŭ i intaresaŭ», papiaredziła miascovaje Minhandlu.
«Dla Hiermanii heta ekanamičnaja katastrofa». Niamieckija ekanamisty padličyli košt handlovaj vajny z Trampam na čatyry hady
«Jeŭropa hatovaja adkazać». Ursuła fon der Lajen prakamientavała abvieščanuju Trampam handlovuju vajnu
Suprać Biełarusi taryfy Trampa nie ŭviedzienyja
«Dzień vyzvaleńnia Amieryki». Donald Tramp abviaściŭ usiamu śvietu handlovuju vajnu
Ciapier čytajuć
«Užo tam karoŭ nie zastałosia!»: były načalnik Kačanavaj apłakvaje stan ekanomiki na Połaččynie5
Kamientary
“ pa raźlikach Biełaha doma, jany pryniasuć u amierykanski biudžet $6 tryljonaŭ u najbližejšyja 10 hadoŭ i skarociać deficyt, jaki ŭ 2024 hodzie razrośsia da biesprecedentnych $3 tryljonaŭ, a ŭ 2025-m — bje letašnija rekordy.”