Украіне прапаноўвалі ў тэрміновым парадку падпісаць дамову аб падзеле сваіх нетраў з прыватнымі амерыканскімі кампаніямі. Дэлегацыю ставілі перад выбарам: ці неадкладнае падпісанне, ці ўкраінскія палітыкі не змогуць сустрэцца з віцэ-прэзідэнтам ЗША Джэй Вэнсам, піша «Еўрапейская праўда».
Журналісты «Еўрапейскай праўды» прааналізавалі ўсё, што вядома пра перамовы паміж украінскай і амерыканскай дэлегацыямі на Мюнхенскай канферэнцыі па бяспецы.
Высветлілася, што амерыканскі бок не проста жадаў «як мага хутчэй» падпісаць дамову аб падзеле ўкраінскіх нетраў, а шантажаваў ёй украінскую дэлегацыю. У Кіеве дакумент пабачылі толькі за два дні да пачатку Мюнхенскай канферэнцыі.
«У міжнародных адносінах такая хуткасць узгаднення дамоў з'яўляецца нерэальнай, а паколькі гаворка ідзе аб эканамічных, міжурадавых дагаворах, то гэта немагчыма нават у тэорыі», — адзначае рэдактар «Еўрапейскай праўды» Сяргей Сідарэнка.
У Мюнхене Украіне сказалі: калі хочаце сустрэцца з Джэй Вэнсам і абмеркаваць з ім умовы міру, то падпісвайце дакумент проста зараз.
У пошуках кампрамісу ўкраінскія палітыкі прапанавалі свае праўкі да дакументу, але, па інфармацыі «ЕП», амерыканская дэлегацыя не гатова была змяняць умовы дамовы аб нетрах. Усе ключавыя змены ЗША скасавала.
Уладзімір Зяленскі па выніку адмовіўся падпісваць дакумент з тымі ўмовамі, якія былі ў ім прапісаныя. Нягледзячы на мінулы шантаж, перамовы з Вэнсам адбыліся.
«Жорсткасць з боку амерыканскіх перагаворшчыкаў, якая межавала з хамствам, знікла, нібы па ўзмаху чароўнай палачкі, і замест гэтага з'явіўся канструктыў», — піша Сідарэнка.
«Еўрапейскай праўдзе» невядомы поўны тэкст дамовы аб нетрах, якую прапаноўвалі ўкраінцам. Ад сваіх суразмоўцаў журналісты атрымалі інфармацыю, што ў дакуменце прапаноўвалі падзяліць украінскія нетры на палову — паміж Украінай як дзяржавай і прыватнымі амерыканскімі кампаніямі.
Па гэтай схеме, Белы дом прапаноўваў стварыць фонд, пад якім будуць працаваць амерыканскія інвестары, якія хочуць здабываць ва Украіне карысныя выкапні і прадаваць іх.
Публічна Дональд Трамп казаў толькі пра здабычу рэдказямельных металаў, але, як піша «ЕП», у тэксце дамовы гаворка была пра ўсе выкапні з Украіны.
Логіка прапанаванага амерыканцамі дакумента была ў тым, што праз прыватных інвестараў у ЗША будзе больш стымулаў забяспечваць бяспеку ва Украіне.
Але ўкраінская дэлегацыя не пабачыла ў дамове ніякіх палажэнняў аб бяспецы для Украіны акрамя самога факту прысутнасці прыватных кампаній.
Гэта Зяленскі і назваў прычынай для адмовы падпісання дакумента. Афіцыйна яны з Вэнсам дамовіліся аб будучай дапрацоўцы дамовы.
Дакумент можна падпісаць у выглядзе мемарандума, адзначае «ЕП». Але калі гэта будзе дамова з абавязкамі для ўкраінскага боку, то яна патрабуе дадатковай ратыфікацыі ў Вярхоўнай Радзе.
Журналісты выказваюць сумнеў, што прапанову аб падзеле нетраў змогуць падтрымаць дэпутаты. Для іх гэта можа бачыцца як «рэінкарнацыя «Росукрэнерга»».
«Зыходзячы з таго, як амерыканцы ціснулі на Украіну, ёсць падставы для высновы, што бізнэс-крыло адміністрацыі Трампа вырашыла скарыстацца ўразлівасцю Украіны і прымусіць яе падпісаць кабальную, загадзя нявыгадную Кіеву дамову аб размеркаванні нетраў — менавіта гэта можа растлумачыць спешку і ўльтыматыўныя патрабаванні. А зразумеўшы, што жаданы сцэнар «не ўзлятае» — яны адступілі», — канстатуе Сяргей Сідарэнка.
«Нам не патрэбныя пасярэднікі, нам патрэбныя саюзнікі». Украінскі дыпламат рэзка выказаўся аб выніках Мюнхенскай канферэнцыі
Пяць высноў з Мюнхенскай канферэнцыі па бяспецы, якая ўвойдзе ў гісторыю
Мюнхенская прамова Вэнса пра новую палітыку ЗША і чаканні ад Еўропы — поўны тэкст
«Будзем адкрытыя: калі не Брусэль, то Масква». Зяленскі ў Мюнхене выступіў як ідэолаг моцнай аб'яднанай Еўропы
Цяпер чытаюць
«Ужо там кароў не засталося!»: былы начальнік Качанавай аплаквае стан эканомікі на Полаччыне19
Каментары