Z 26 pa 30 sakavika ŭ Varšavie projdzie Tydzień z Volnymi kupałaŭcami, padčas jakoha možna budzie pabačyć niekalki znakavych śpiektaklaŭ, piša «Budźma».
«Padzieja, jakuju my ŭpieršyniu zładzim u sakaviku, majecca stać kulminacyjaj hetaha teatralnaha siezonu», — napisana ŭ sacsietkach Volnych kupałaŭcaŭ.
«Hety tydzień, staŭsia mahčymym, častkova dziakujučy narodnaj padtrymcy — srodkam, jakija my atrymali praz mahčymaść biełarusaŭ u Polščy nakiravać svaje 1,5% padatkaŭ peŭnaj arhanizacyi. Dziakujem, siabry! Vy zrabili niemahčymaje mahčymym», — adznačajuć kupałaŭcy.
26 sakavika
Moj Hleb
Monaśpiektakl Zoi Biełachvościk ab stanaŭleńni Nacyjanalnaha teatra imia Janki Kupały z 1920 hoda. Heta ščyry apovied pra asabisty žyćciovy šlach, pra historyju teatralnaj dynastyi, pra padziei ŭ Biełarusi, jakija žorstka adbivalisia na losie Kupałaŭskaha teatra i kupałaŭcaŭ. Heta praŭdzivaja historyja, napisanaja žyćciom. Scenar, jaki davodzicca pražyvać pa-sapraŭdnamu, sumlenna i z honaram.
U rolach: Zoja Biełachvościk
Režysior: Alaksandr Harcujeŭ
Śpiektakl idzie na biełaruskaj movie z polskimi subtytrami.
27 i 28 sakavika
Husi-ludzi-lebiedzi
Śpiektakl-antyŭtopija stvorany pavodle adnoj z častkach viadomaha ramanu Alhierda Bachareviča «Sabaki Eŭropy». Heta zmročnaje bačańnie budučyni, fantasmaharyčny pohlad u budučyniu Biełarusi. Z hetaha śpiektakla vymaloŭvajecca niaradasnaja karcina: tatalnaja dehradacyja, krach kultury, marali i technałohij, i hučyć skrazny matyŭ biełaruskaj biesprytulnaści i biazdomnaści ŭ śviecie.
«Być biełarusam — heta nie mieć svajho miesca ŭ śviecie. Abo inakš: być biełarusam — heta ŭsiudy adčuvać siabie čužym, inšym. Mahčyma, što i Čužanicaj, i Inšym. Ci tak možna žyć? Dy tak pa-sutnaści my i žyviem…»
U rolach: Alaksandr Kazieła, Zoja Biełachvościk, Mikałaj Stońka, Aleh Harbuz, Siarhiej Čub, Ihar Sihoŭ, Alaksandr Harcujeŭ, Valancina Harcujeva, Kaciaryna Javorskaja, Alakasandr Zielanko, Michaś Zuj, Andrej Drobyš, Eryk Arłoŭ-Šymkus.
Režysior: Alaksandr Harcujeŭ
Śpiektakl idzie na biełaruskaj movie z polskimi subtytrami.
29 sakavika
Ekstremisty
Hety śpiektakl pra ludziej, jakija adnojčy vyjšli na vulicy, uzbrojenyja barabanami, hitarami i bubnami, machali ściahami i śpiavali pra pieramieny, što nijak nie adbuducca. Za heta na svajoj radzimie jany byli abvieščany EKSTREMISTAMI. Za kamientar, za łajk, za ŭźniaty ściah! Za toje, što čytali zabaronienyja naviny! Za toje, što vychodzili na vulicu ŭ niadzielu! Za toje, što nie chacieli vajny z susiedniaj krainaj! Pieśnia była ich supracivam. Muzyka stała ich złačynstvam.
U rolach: Zoja Biełachvościk, Kaciaryna Javorskaja, Alaksandr Zielanko, Siarhiej Čub
Režysior: Alaksandr Harcujeŭ
Kampazitar: Alaksandr Zielanieŭski
U śpiektakli taksama hučyć muzyka hurta Irdorath.
Śpiektakl idzie na biełaruskaj movie z polskimi subtytrami.
30 sakavika
Zekamieron
«Zekamieron» — dakumientalny raman, jaki składajecca sa sta navieł, što apisvajuć žyćcio i stasunki źniavolenych i ich achoŭnikaŭ u adnym ź biełaruskich SIZA. Maksim Znak pisaŭ hetuju knihu ź vieraśnia 2020 pa śniežań 2021 hodu, budučy viaźniem adnaho ź ich.
Śpiektakl «Zekamieron» źviazaŭ šerah apaviadańniaŭ sa zbornika Maksima Znaka ŭ adzinuju dzieju. Heta historyja pra toje, što adbyvajecca za kratami ŭ Biełarusi, u jakich umovach žyvuć palitviaźni, jak pačuvajecca čałaviek u turmie, jakija ludzi jaho atačajuć, jak adbyvajecca kamunikacyja pamiž usimi hetymi ludźmi, jak heta ŭpłyvaje na kožnaha ź ich, i, narešcie, jak palitviaźniu ŭdajecca zastavacca čałaviekam. Muzyka i pieśni na słovy Maksima stali bazavym złučalnym elemientam.
U rolach: Aleh Harbuz, Uładzimir Puhač, Siarhiej Čub.
Režysior: Vojcech Urbański
Śpiektakl idzie na biełaruskaj movie z polskimi subtytrami.
Miesca: Scena Przodownik Teatru Dramatycznego, Olesińska 21.
Nabyć kvitki na śpiektakli možna pa spasyłcy.
Ciapier čytajuć
«Užo tam karoŭ nie zastałosia!»: były načalnik Kačanavaj apłakvaje stan ekanomiki na Połaččynie5
Kamientary