Дырэктара symbal.by і арганізатара святкавання 100‑годдзя БНР Паўла Белавуса абвінавацілі ў дзяржаўнай здрадзе. Мінскі гарадскі суд сёння вынес яму прысуд — 13 гадоў зняволення.
Па артыкуле за здраду дзяржаве ён атрымаў самы вялікі тэрмін — 10 гадоў і штраф у памеры 500 базавых велічынь (18,5 тысяч рублёў). Акрамя таго, яго прызналі вінаватым у арганізацыі групавых дзеянняў, якія парушаюць грамадскі парадак, і прысудзілі за гэта 3 гады калоніі. За публічныя заклікі да захопу ўлады-4 гады, за кіраўніцтва экстрэмісцкім фарміраваннем — 4 гады пазбаўлення волі.
У выніку суд прызначыў пакаранне ў выглядзе 13 гадоў пазбаўлення волі, адбываць тэрмін Павел Белавус будзе ў калоніі ўзмоцненага рэжыму.
Паўлу Белавусу было выстаўленае абвінавачанне адразу па некалькіх артыкулах Крымінальнага кодэкса:
— ч. 1 арт. 356 (здрада дзяржаве);
— ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак);
— ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь);
— ч. 1 арт. 361-1 (кіраўніцтва экстрэмісцкім фармаваннем).
Паўла Белавуса затрымалі 15 лістапада 2021 года і першапачаткова давалі адміністрацыйныя суткі, але з Акрэсціна не адпусцілі і распачалі крымінальную справу.
Працэс пачаўся 20 лютага 2023 года, вяла яго суддзя Жанна Брысіна.
Першапачаткова суд быў адкрыты, але дзяржаўны абвінаваўца заявіў хадайніцтва аб разглядзе справы ў закрытым рэжыме «з мэтай прадухілення разгалошвання інфармацыі, размешчанай у крыніцах, прызнаных экстрэмісцкімі».
Як паведамляў на пачатку студзеня былы начальнік упраўлення Следчага камітэта па Мінску Сяргей Паско, у 2011 годзе «абвінавачаны для пошуку аднадумцаў пачаў трансляваць патрэбную яму інфармацыю ў масы».
«Пад выглядам культурна-гістарычнага развіцця ў розных агульнадаступных сацыяльных сетках і на сайтах ён распаўсюджваў ідэі беларускага нацыяналізму, мэтай якіх з'яўлялася змена дзяржаўнай улады ў Беларусі», — казаў у студзені Паско.
Цяпер чытаюць
Чаму ў пачатку 20 стагоддзя эстонцы, літоўцы і латышы стварылі дзяржаву, а беларусы — не? Адказвае Церашковіч9
Каментары