U Biełarusi pačali pradavać siedan «biznes-kłasu» ad Lada, na jaki sprabavali pierasadzić rasijskich čynoŭnikaŭ. Što za jon i kolki kaštuje
«Simvał imknieńnia da novych viaršyniaŭ» — tak dylery apisvajuć fłahmanskuju madel ad AŭtaVAZa, jakuju pačali pradavać u Biełarusi. A što nasamreč?
«Navinka» rodam z 2015 hoda
Novaja madel Lada pabudavana na bazie Lada Vesta. Hałoŭnaje adroźnieńnie «novaj» madeli ad staroj — daŭžynia. Kuzaŭ u Aura na 250 mm daŭžejšy, čym u Vesta. Adpaviedna, pavialičyłasia i kołavaja baza. Za košt hetaha sałon staŭ bolš prastornym dla zadnich pasažyraŭ.
Ale pa fakcie heta nie niejkaja novaja madel, jak heta namahajucca vydavać, a chutčej prosta łonh-viersija Lada Vesta z bolš bahataj kamplektacyjaj. Samu Lada Vesta vypuskajuć z 2015 hoda.
U techničnym płanie praryvu nie adbyłosia. Pad kapotam u Aura budzie taki ž samy 1,8-litrovy bienzinavy ruchavik mahutnaściu 122 k. s., jaki budzie pracavać u pary z kitajskaj AKPP (varyjataram).
Što pačym?
Ceny na Lada Aura ŭ Biełarusi pačynajucca z 91 900 rubloŭ (kala $28 000) za mašynu ŭ kamplektacyi Premier i 98 900 rubloŭ ($30 300) za kamplektacyju Status. U apošniaj budzie sałon z naturalnaj skury, 17-calevyja dyski zamiest 16-calevych i 10-calevy multymiedyjny ekran zamiest standartnaha.
Dla paraŭnańnia, ceny na Lada Vesta pačynajucca z 45 tysiač rubloŭ ($13 800) za aŭto z 1,6-litrovym matoram i MKPP. A Vesta SW Cross z anałahičnym matoram i AKPP, jak u Aura, možna nabyć za 62 570 rubloŭ ($19 150).
Navošta jano nam treba?
Siarod inšaha, Aura zadumvali jak mašynu dla aŭtaparka rasijskich čynoŭnikaŭ, ale tyja, jak pakazvaje praktyka, nie asabliva saromiejucca krytykavać aŭto. Siarod minusaŭ nazyvali adsutnaść stolikaŭ dla noŭtbuka, a taksama klimat-kantrolu dla zadniaha radu kresłaŭ, praz što jany bajacca spacieć.
Aproč hetaha, mašynu krytykujuć za nadta doŭhija zadnija dźviery, jakija ŭskładniajuć vychad z aŭto na vuzkich parkoŭkach.
Taksama nie vyklučajuć, što Aura moža być cikavaja taksistam, bo amal usie palapšeńni hetaj madeli pryznačanyja mienavita dla pasažyraŭ zadnich kresłaŭ. A voś ujavić sabie, što Aura stanie papularnaj siarod pryvatnych karystalnikaŭ, vielmi składana.
Što jašče možna nabyć u Biełarusi za takija hrošy?
Varta adznačyć, što vybar na našym rynku novych mašyn u apošnija hady prykmietna skaraciŭsia, asabliva kali brać dastupnyja siedany ci chetčbeki. Asnoŭny kankurent Lada na biełaruskim rynku — heta Belgee (Geely). Tak, naprykład, ceny na siedan Belgee S50 z AKPP pačynajucca z 62 400 rubloŭ ($19 100).
U topavaj kamplektacyi Flagship Plus Belgee S50 kaštuje 67 800 rubloŭ, što na 24 100 rubloŭ ($7 400) mienš, čym samaja tannaja Lada Aura.
Pry hetym pa svaich charaktarystykach aŭtamabili davoli padobnyja. Belgee usiaho na 5 santymietraŭ karaciejšyja za Lada. Pa šyryni S50 navat vyhraje ŭ Aura — 1822 mm suprać 1764.
Jak pakazała statystyka prodažaŭ za pieršy miesiac 2025 hoda, na dolu rasijskaj Lada pryjšłosia amal 40% ad ahulnaha abjomu prodažaŭ, što vyvieła jaje na pieršaje miesca. Da hetaha davoli praciahły čas pieršaje miesca stabilna zajmali Geely/Belgee.
Ale vyhladaje, što vyrvacca ŭ lidary ŭ Lada atrymałasia tolki praz toje, što ŭ studzieni nie dziejničała prahrama lhotnaha kredytavańnia dla pakupki Belgee. Tamu całkam vierahodna, što biełaruska-kitajskija aŭto dziakujučy ilhotnamu kredytavańniu nieŭzabavie viernuć sabie lidarskija pazicyi na biełaruskim rynku, i źjaŭleńnie ŭ prodažy daražeznaj Lada Aura dakładna nie zmoža hetamu pieraškodzić.
Ciapier čytajuć
«Užo tam karoŭ nie zastałosia!»: były načalnik Kačanavaj apłakvaje stan ekanomiki na Połaččynie9
Kamientary