Załužny: NATA siońnia nie maje mocy. Piataha artykuła tam niama i nie budzie

«NATA jak vajskovy instytut siońnia nie maje mocy. Abo kali ŭ jaho jość takaja moc, to jana skončycca na praciahu miesiaca», — zajaviŭ na sustrečy sa studentami ŭ Lvovie były hałoŭnakamandujučy USU, a ciapier pasoł Ukrainy ŭ Vialikabrytanii Valeryj Załužny.

Pa słovach Załužnaha, Ukrainu atakujuć 3000 pavietranych celaŭ štomiesiac, i, kab źniščać ich pa standartach NATA, spatrebiłasia b 10 500 zienitnych rakiet, što ŭ vypadku krain NATA niemahčyma ni pa vytvorčaści, ni pa hrošach.

«Rakieta IRIS-T kaštuje 800 tysiač dalaraŭ, Patriot — 10 miljonaŭ dalaraŭ. Skažycie, kali łaska, 10,5 tysiač rakiet pa takich cenach. Pa-pieršaje, kali jany i jość, to zaŭtra jany skončacca. Ich prosta niemahčyma vyrabić. Inakš praź miesiac lubaja kraina ŭpadzie na kaleni i skaža: «My zdajomsia, tamu što my patracili ŭsie hrošy tolki na toje, kab źbić toje, što nad hałavoj lotaje».

NATA efiektyŭny tolki ŭ zmahańni z drobnymi kanfliktami

Pa słovach Załužnaha, «NATA, na žal, słužačy pieravažna palityčnym intaresam členaŭ aljansu», raspracavała daktrynu, jakaja dazvalaje zmahacca z drobnymi kanfliktami, a nie vieści poŭnamaštabnuju vajnu:

«[Daktryna] dazvalaje zmahacca, pierš za ŭsio, z paŭstanckimi hrupami, naprykład, na zachadzie Sachary. Jany mohuć chutka spravicca ź imi. Jany mohuć pravodzić niejkija dziejańni ŭ Cichim akijanie, ale dalej ad bierahoŭ Jemiena, tamu što jany pakazali, jak jany ŭmiejuć vajavać, jany tudy nie iduć».

Pa słovach Załužnaha, krainy aljansu «zahnali svoj vajskova-pramysłovy kompleks u šalonuju, pa našych mierkach, karupcyju».

«Vajskova-pramysłovy kompleks prymušaŭ ich zaklučać kantrakty na 10 hadoŭ napierad na pabudovu avijanoscaŭ, na pabudovu niejkich mifičnych F-35 i hetak dalej, i hetak dalej. To-bok dziaržava vinnaja im hrošy za pavietra, tamu što jany jašče ničoha nie zrabili».

«Jany razumiejuć, što piataha artykuła tam niama i nie budzie»

Pry hetym były hałoŭnakamandujučy USU ŭpeŭnieny, što NATA nikoli nie pojdzie «šlacham, kab niejak zrabić siabie efiektyŭnym», i heta dobra razumiejuć asobnyja krainy:

«Jany razumiejuć, što piataha artykuła (artykuł praduhledžvaje, što napad na adnaho ź siabroŭ Aljansu budzie ličycca napadam na ŭsio NATA) tam niama i nie budzie. Razumieje heta Polšča, kudy pieryjadyčna padajuć našy i rasijskija rakiety. Rumynija ŭvohule ŭsio razumieje, ale maŭčyć».

Pa słovach byłoha hałoŭnakamandujučaha, jamu zvanili z Rumynii i prasili nie paviedamlać pra padzieńnie rasijskich «šachiedaŭ» na terytoryi krainy.

«Časam telefanujuć mnie, kažuć «Maŭčy». Nu, upała dva «šachiedy» ŭ port da vas, čaho vy maŭčycie, a jany: «Maŭčy, ja ciabie prašu». Razumiejecie? A to časam telefanuje i kaža: «Ty navošta ŭklučyŭ hetyja vašy REBy? Jany (rasijskija drony — NN) palacieli da nas. Ja kažu: dyk źbivajcie. U vas sorak F-16 staić».

Jeŭrapiejskaja biaśpieka musić być pierabudavanaja

Załužny vykazvajecca za stvareńnie novaj architektury jeŭrapiejskaj biaśpieki, u jakoj Ukraina była b nie abjektam, a subjektam.

Najbolš pierśpiektyŭnym jon ličyć farmat JEF (Joint Expeditionary Force) — Abjadnanych ekśpiedycyjnych sił — šmatnacyjanalnaje vajskovaje partniorstva Paŭnočnaj Jeŭropy, pryznačanaje dla chutkaha reahavańnia i ekśpiedycyjnych apieracyj.

U jaho skład majuć uvajści Vialikabrytanija, krainy Paŭnočnaj Jeŭropy (Danija, Finlandyja, Isłandyja, Narviehija, Šviecyja), krainy Bałtyi (Estonija, Łatvija, Litva) i Niderłandy. Ale navat tam jość pieraškody, jakija nie dazvolać Ukrainie dałučycca. U pieršuju čarhu, heta pazicyja Vialikabrytanii:

«Prablema ŭ pieršuju čarhu ŭ Vialikabrytanii, tamu što joj nie patrebnyja dadatkovyja prablemy, bo Brytanija nie maje armii. Jość maršały, jość admirały, jość usio. Usie atrymlivajuć zarobki, a vojska niama. Jana jašče nie hatovaja zmahacca. I niezrazumieła, kolki času spatrebicca na stvareńnie hetaha vojska.

Plus u brytanskaj armii jość padvodnyja łodki, jakija majuć śpiecyfičnuju, jeŭrapiejskuju misiju, ad jakoj jany nie mohuć adstupić u ramkach damovy NATA. (…) Biezumoŭna, dypłamatyčnym šlacham my atrymajem adkaz, što Ukraina — heta nie paŭnočna-zachodniaja kraina».

Druhaja prablema, pa słovach Załužnaha, zaklučajecca ŭ pazicyi Polščy, jakaja taksama imkniecca ŭ JEF i «zrobić usio», kab spačatku pryniali jaje.

Pa słovach Załužnaha, architektura biaśpieki NATA «maralna i fizična» sastareła i «chutčej za ŭsio, akramia niejkaj palityčnaj abarony, heta nam (Ukrainie — NN) ničoha nie daść». Varyjant pryciahnieńnia va Ukrainu kantynhientu aljansu jon nazyvaje iluzornym. Tamu biaśpieku treba budavać unutry krainy, i ŭkraincy sami musiać stać svajoj harantyjaj.

«Najlepšyja harantyi biaśpieki zakładzienyja ŭ nas samich», — davodzić były hałoŭnakamandujučy USU.

• 86
• 1
• 1
• 1
• 3
• 2
• 0
• 3