Навукоўцы стварылі «шарсцістую мыш» з прыкметамі маманта. Магчыма, праз некалькі гадоў адродзяць і вымерлага гіганта
Кампанія, якая займаецца адраджэннем зніклых відаў, прадставіла генетычна мадыфікаваных «шарсцістых мышэй», што, паводле яе прадстаўнікоў, з’яўляецца важным этапам на шляху да вяртання мамантаў.
Як піша CNN, амерыканскі стартап Colossal Biosciences заяўляе, што атрыманыя ў лабараторыі з дапамогай геннай інжынерыі пухнатыя грызуны дэманструюць рысы, падобныя да тых, што дапамагалі старажытным продкам сланоў супрацьстаяць холаду.
Згодна з інфармацыяй Colossal Biosciences, у мадыфікаванай мышы з’явіліся характэрныя прыкметы шарсцістага маманта: кучаравыя вусы, валасатая, светлая поўсць, якая вырастае ў тры разы даўжэйшай, чым у звычайных лабараторных мышэй.
Colossal Biosciences — прыватная кампанія з Даласа (ЗША), якая працуе над узнаўленнем мамантаў і іншых зніклых відаў. Яна сцвярджае, што шарсцістая мыш дазволіць праверыць гіпотэзы пра тое, як пэўныя ўчасткі ДНК уплываюць на фізічныя характарыстыкі, якія дапамаглі мамантам, што вымерлі каля 4000 гадоў таму, адаптавацца да халоднага клімату.
Вучоныя Colossal вызначылі 10 генетычных адрозненняў паміж мамантамі і іх найбліжэйшымі сучаснымі сваякамі — азіяцкімі сланамі. Затым яны знайшлі падобныя гены ў лабараторных мышэй і змянілі іх, каб уплываць на колер, даўжыню, таўшчыню і структуру шэрсці, узровень тлушчавых запасаў у арганізме.
У выніку вучоныя адначасова ўнеслі восем генетычных змен у сем генаў мышэй, выкарыстоўваючы перадавыя тэхналогіі рэдагавання ДНК. Пра сваё дасягненне стартап паведаміў у папярэднім навуковым дакладзе, які пакуль не прайшоў рэцэнзаванне.
Некаторыя эксперты лічаць, што эксперымент уражвае з тэхнічнага пункту гледжання, але пакуль не даказвае, што змененыя мышы валодаюць холадаўстойлівасцю, як маманты. Іншыя падкрэсліваюць, што хаця рэдагаванне генаў у мышэй — важны крок, перанесці гэтыя веды на сланоў нашмат складаней, бо пакуль дакладна невядома, якія менавіта ўчасткі геному з'яўляюцца крытычна важнымі для набыцця сланамі характарыстык, неабходных для жыцця за Палярным кругам.
Кампанія Colossal Biosciences была заснавана ў 2021 годзе і ўжо сабрала $435 мільёнаў на праекты па адраджэнні мамантаў, птушкі дода і тасманскага тыгра.
Яе падыход заснаваны на рэдагаванні генаў бліжэйшых жывых сваякоў вымерлых відаў, каб стварыць гібрыдных жывёл, максімальна падобных да зніклых. Colossal заяўляў, што плануе прадставіць першае маманцяня ў 2028 годзе.
Пракурорскі начальнік абурыўся неабгрунтаванымі затрыманнямі беларусаў8
Каментары