Генерал Суравікін у кастрычніку 2022 года прапаноўваў ударыць ядзернай зброяй, каб спыніць украінскі наступ
Размову Суравікіна з начальствам перахапіла амерыканская выведка, піша The New York Times.
Камандуючы расійскай арміяй ва Украіне Сяргей Суравікін у кастрычніку 2022 года прапаноўваў нанесці ўдар тактычнай ядзернай зброяй, каб спыніць наступ украінскай арміі на поўдні.
Размову Суравікіна перахапіла амерыканская выведка. Пра тое, што расійскія вайсковыя абмяркоўвалі ядзерны ўдар, амерыканская прэса паведамляла і раней. Але тады не было вядома, хто менавіта прапаноўваў такі крок адчаю.
Да таго моманту амерыканскія спецслужбы ацэньвалі верагоднасць выкарыстання Расіяй ядзернай зброі ва Украіне ў 5—10 працэнтаў. Пасля перахопу размовы Суравікіна пазіцыя ЦРУ змянілася: там казалі, што, калі расійскі фронт на поўдні абрынецца, верагоднасць складзе ўжо 50 працэнтаў.
УСУ ў жніўні-лістападзе 2022 года актыўна наступалі на Херсонскім напрамку. Цікава, што калі еўрапейскі генералітэт вітаў такое развіццё падзей, то ў Вашынгтоне былі іншыя настроі. Як піша The New York Times, галоўныя дарадцы прэзідэнта Байдэна нервова разважалі, ці не варта наадварот папрасіць украінцаў запаволіць наступ.
Гэтая хвіліна магла стаць для Украіны найлепшай магчымасцю нанесці Расіі пераломны ўдар. Але таксама гэта магла быць найлепшая магчымасць распаліць шырокамаштабную вайну, якой ў Вашынгтоне не хацелі.
Па выніку, у лістападзе УСУ вызвалілі Херсон. У Расіі адступленне з горада назвалі тактычным. Ужо ў студзені 2023 года Пуцін звольніў Суравікіна з пасады камандуючага расійскай арміяй ва Украіне.
Пракурорскі начальнік абурыўся неабгрунтаванымі затрыманнямі беларусаў8
Каментары