Jak vybrać film ci sieryjał na viečar? Sačycie za hetymi resursami
Byvaje składana razabracca, jakoje kino vartaje prahladu. Raskazvajem pra niekalki płatformaŭ, jakija dapamohuć dać rady hetaj zadačy.
Adrazu ahavorymsia, što ŭ hetaj padborcy buduć anhłamoŭnyja resursy, bo anałahičnych resursaŭ na biełaruskaj movie nie isnuje. Jość, kaniečnie, ruskamoŭnyja resursy, toj ža anłajn-kinateatr «Kinapošuk». Ale nie kožnamu moža być cikava prahryzacca praz rasijskaje kino.
Pačniem z resursu IMDb, što ŭźnik u 1990 hodzie. Adnaho hetaha partała chopić, kab natalić vašu smahu da dobraha kino. Na IMDb isnuje ahromnistaja baza filmaŭ, telešou i sieryjałaŭ — miljony prajektaŭ z trejlerami, karotkim apisańniem siužetu, raskazam pra akcioraŭ, viadoŭcaŭ, pradziusaraŭ, režysioraŭ i inšych, chto prykładaje ruku da stvareńnia kino i prahram.
Nie viedajecie, z čaho pačać? Na IMDb jość topy samych papularnych filmaŭ na siońnia — i pa viersii karystalnikaŭ resursu, i pa vyručcy, jość i topy telešou. Možna pryśviacić čas śpisu z 250 najlepšych filmaŭ za historyju kino pavodle karystalnikaŭ IMDb: ciapier tam u pieršaj trojcy «Ucioki z Šaŭšenka», «Chrosny baćka» i «Ciomny rycar». A možna pahladzieć, što ciapier papularna siarod novych stužak — u trojcy «Naśfieratu», «Znoŭ u spravie» i «Brutalist».
Kali chočacca bolš prafiesijnaha padychodu, možna zajści na śpiecyjalnyja staronki, pryśviečanyja kinaŭznaharodam — ad znakamitych «Oskara» i «Załatoha Hłobusa» da małaviadomych, ale aŭtarytetnych nakštałt uznaharody amierykanskaha kinafiestyvala Sundance. IMDb prapanuje naviny z hetych padziej i, kaniečnie, publikuje pieramožcaŭ, a taksama časam robić svaje padborki konkursnych filmaŭ, na jakija varta źviarnuć uvahu.
Hetyja padborki — razynačka IMDb. Naprykład, ciapier tam možna pačytać pra samyja čakanyja filmy, sieryjały i telešou 2025 hoda pa viersii hledačoŭ, a taksama aznajomicca z padborkaj najlepšych śviežych kino i sieryjałaŭ pa viersii supracoŭnikaŭ vydańnia.
Kab atrymać poŭny funkcyjanał IMDb, varta zavieści na sajcie ŭłasny akaŭnt. U takim vypadku vy zmožacie adznačać na partale prahledžanyja filmy i składać śpis tych, jakija chaciełasia b vam pabačyć, a taksama atrymlivać piersanalizavanyja rekamiendacyi prajektaŭ, na jakija varta źviarnuć uvahu. Pry žadańni možna budzie pisać vodhuki na prajekty i nie tolki.
Kali chočacca bolš niefarmalny padychod da kino, pasprabujcie resurs Rotten Tomatoes. Nazva sajta pierakładajecca jak «hniłyja pamidory», i niaciažka zdahadacca, što stvaralnikaŭ resursu natchniła tradycyja zakidvać drennych artystaŭ hniłymi pamidorami.
Fiška Rotten Tomatoes — heta składanaja sistema rejtynhaŭ, jakoj nie adrazu dasi rady, ale zatoje ź jaje dapamohaj možna acanić prajekt bolš abjektyŭna. Pakažam, jak heta pracuje, na prykładzie filma «Kankłaŭ» (Conclave):
Źviarnicie ŭvahu na dva rejtynhi ŭ pracentach, što pad centralnaj vyjavaj. Pieršy ź ich — tamatamietr, jon zasnavany na mierkavańniach socień kinakrytykaŭ. Kali ŭ filma mienš za 60% stanoŭčych vodhukaŭ, jon ličycca «hniłym» i atrymlivaje admysłovy zialony značok. Jak heta vyhladaje, možna pabačyć na prykładzie stužki Back in Action u pravym nižnim kucie skryna. A kali film atrymlivaje nie mienš za 60% stanoŭčych vodhukaŭ, jaho ličać «śviežym» i prysvojvajuć jamu značok pamidora. 75% i bolš na tamatamietry — pryčyna ŭznaharodzić stužku statusam Certified Fresh, ci «Siertyfikavany śviežy», jak heta i zdaryłasia z «Kankłavam».
Druhi rejtynh — papkornmietr, jon zasnavany na vodhukach zvyčajnych telehledačoŭ. Pierakulenaje zialonaje viadro papkorna — znak, što mienš za 60% hledačoŭ acanili stužku abo telešou na 3,5 bała ci vyšej. Kali takich hledačoŭ nie mienš za 60%, rejtynh budzie paznačany čyrvonym viadrom z papkornam.
Akramia hetaha, na Rotten Tomatoes možna pačytać vodhuki krytykaŭ i prostych hledačoŭ na prajekty — vydańnie navat farmuluje ahulnyja vysnovy pa vodhukach i pieršaj, i druhoj katehoryi kinaamataraŭ. I, kaniečnie, tut jość trejlery i naviny pra filmy i telešou, a taksama infarmacyja pra tych, chto staić za prajektami.
Asobna adznačym, što na Rotten Tomatoes jość svaja kinaŭznaharoda pad nazvaj Rotten Tomatoes Awards. Voś niekatoryja ź sioletnich łaŭreataŭ — najlepšaj stužkaj tut ličać prybytkovuju «Dziuna: Častka druhaja»:
Jašče adna kreatyŭnaja padborka na sajcie — 100 filmaŭ z najhoršym rejtynham na Rotten Tomatoes. Časam u kino spracoŭvaje pryncyp «tak drenna, što navat dobra», i mahčyma, što ŭ hetaj padborcy vy znojdziecie niešta dla siabie.
Ciapier «lidar» rejtynhu — tryler «Balistyka: Eks suprać Sivier» (2002) z Antonia Banderasam. Na druhim miescy chorar «Adzin prapuščany zvanok» (2008), na trecim — chryścijanski apakaliptyčny tryler «Pakinutyja» (2014) ź Nikałasam Kiejdžam.
Narešcie, zazirnicie na Metacritic. Heta nie taki bujny resurs, jak tyja, što my zhadali vyšej: źviarnicie ŭvahu, kali na «Kankłaŭ» było amal 300 vodhukaŭ kinakrytykaŭ na Rotten Tomatoes, na Metacritic ličać vodhuki ŭ dziasiatkach.
Ale Metacritic cikavy tym, što tut jość dadatkovyja katehoryi kantentu: akramia filmaŭ i telešou, vam raskažuć pra muzyku i kampjutarnyja hulni. Jość padborki najlepšych albomaŭ, hulniaŭ, filmaŭ i telešou hoda — karaciej, vam amal nie pakidajuć šansaŭ pajści biez zabavy na viečar.
«Naša Niva» — bastyjon biełaruščyny
PADTRYMAĆCiapier čytajuć
Prakurorski načalnik aburyŭsia nieabhruntavanymi zatrymańniami biełarusaŭ9
Kamientary