«Baču pomstu za maju pracu». Volha Siamaška adreahavała na rasśledavańnie «NN»
Žurnalistka Volha Siamaška dała publičny adkaz na rasśledavańnie «Našaj Nivy» pra svajho muža Fiodara Harbačova, jaki maje pašpart prykryćcia na imia Viktara Makaviejeva. U «aficyjnaj zajavie ad našaj siamji» jana adchilaje ŭsie vystaŭlenyja abvinavačańni.
Volha Siamaška pierakonvaje, što infarmacyja pra pracu na śpiecsłužby jaje muža — heta pomsta joj.
«Heta pomsta adnaho detektyŭnaha ahienctva za maju prafiesijnuju dziejnaść. Nie mohuć mnie vybačyć «špijona», jakoha nie było i jakoha nie vysyłali. A my hetaha špijona znajšli i apublikavali intervju ź im. I paralelna dakazali, što «detektyvy» tryndziać jak dychajuć», — piša jana.
Pra što havorka? U 2023 hodzie «Bajpoł» apublikavaŭ infarmacyju pra znachodžańnie ŭ Polščy hramadzianina Biełarusi Viačasłava Bystrova. Śćviardžałasia, što hety čałaviek, za plačyma jakoha była proćma adsidak, pracavaŭ u kampanii «Łaryskor». Heta jurydyčnaja asoba była stvoranaja, kab płacić hrošy milicejskim stukačam i inšym aśviedamlalnikam — ich padsadžvali ŭ kamiery, kab jany vypytvali infarmacyju ŭ ludziej.
A voś Volha Siamaška i jaje Radyjo Ŭnet zastupilisia za Bystrova. Jany davodzili, što Alaksandr Azaraŭ i jaho «Bajpoł» uźviali paklop na čałavieka z harotnym losam. «Nie tak daŭno ludzi Azarava zrabili mnie injekcyju, tam byli hiepatyt i inšyja infiekcyi», — takija lehiendy Bystroŭ raskazvaŭ Radyjo Ŭnet. Siamaška vieryła supracoŭniku «Łaryskora» i jaho historyi pra toje, jak ludzi Azarava nibyta prymušali jaho vyrakčysia musulmanskaj viery, jakuju jon pryniaŭ.
Taksama Siamaška ličyć, što hetym rasśledavańniem joj adpomścili za pracu nad žurnalisckim etyčnym kodeksam (jaki, darečy, nie padpisali najbujniejšyja biełaruskija ŚMI — ni «Lusterka», ni «Naša Niva»).
Siamaška asprečvaje, što zaklikała da aŭdytu fondaŭ, jakija raźmiarkoŭvali hrošy paśla Marafonu salidarnaści.
«Ja, naadvarot, kazała, što heta budzie kanflikt intaresaŭ, i dziejnyja žurnalisty dakładna nie pavinny hetym zajmacca», — pierakonvaje jana. I adrazu ž pryznajecca, što ŭziałasia praviarać navat niekalki fondaŭ. U fondzie Razam uciečka nasamreč adbyłasia, a voś u inšym «niešta źlivaŭ nie zaŭvažyła».
Siamaška nie bačyć ničoha dziŭnaha ŭ tym, što jaje muž vałodaje łatyšskaj movaj: «Heta naša chobi, u kožnaj krainie našaha padarožža razmaŭlać na ich movie.
U nas navat raskład jość: chto jakuju movu vyvučaje».
Žurnalistka abviarhaje, što vosieńniu 2024 hoda karotki čas pracavała ŭ prajekcie, supracoŭnikaŭ jakoha paśla jaje zvalnieńnia pryznali ŭdzielnikami ekstremisckaha farmavańnia.
«Datyčna samoha dakumienta: ni pra jakija pašparty prykryćcia nam ničoha nie viadoma. Nie supracoŭničali, nie sastajali, nie źlivali. …
Dokazaŭ niama, adnyja domysły i insinuacyi, reputacyja maja ŭstojlivaja da roznych nakidaŭ», — padsumoŭvaje Volha Siamaška.
Prakurorski načalnik aburyŭsia nieabhruntavanymi zatrymańniami biełarusaŭ8
Kamientary
[Zredahavana]