Amierykaniec Palakoŭ prabraŭsia na zakryty vostraŭ niebiaśpiečnych abaryhienaŭ u Indyi. Jon sprabavaŭ ułahodzić ich dyjetyčnaj kołaj
U Indyi zatrymali hramadzianina ZŠA Michaiła Palakova: jon sprabavaŭ uvajści ŭ kantakt ź izalavanym plemiem, jakoje ŭ 2018 hodzie zabiła amierykanskaha misijaniera.
Amierykanski turyst ukrainskaha pachodžańnia Michajła Palakoŭ niezakonna prabraŭsia na vostraŭ u Indyi, dzie žyvie niebiaśpiečnaje izalavanaje plemia, jakoje nie kantaktavała ź źniešnim śvietam bolš za 30 hadoŭ.
Na adzinočnaj łodcy 24-hadovy mužčyna dabraŭsia da Paŭnočnaha Sientynielskaha vostrava ŭ Indyjskim akijanie, jaki znachodzicca za 40 kiłamietraŭ ad papularnych plažaŭ. Z saboj jon uziaŭ kamieru GoPro, a taksama padarunki dla miascovaha plemia: dyjetyčnuju kołu i kakos, paviedamlaje The New York Post.
Pa danych śledstva, pajezdka była staranna spłanavana: Palakoŭ vyvučaŭ marskija ŭmovy, prylivy i maršruty z paŭdniovaha plaža, kab dabracca da vostrava. Ułady śćviardžajuć, što heta była nie pieršaja sproba Palakova dabracca da izalavanych plamionaŭ, jakija pražyvajuć na Andamanskich i Nikabarskich astravach.
U studzieni jon, jak paviedamlajecca, niezakonna zdymaŭ pradstaŭnikoŭ addalenaha plemia džarava padčas vizitu na astravy Baratanh.
Akramia taho, u kastryčniku minułaha hoda jon sprabavaŭ pravieści raźviedku Paŭnočnaha Sientynielskaha vostrava, vykarystoŭvajučy nadzimany kajak, ale supracoŭniki haścinicy, dzie jon spyniŭsia, zmahli jaho spynić, zajavili aficyjnyja asoby.
U niadzielu Palakova zatrymała indyjskaja palicyja. Pa zapisu na kamiery, jon dabraŭsia da zapaviednaha vostrava, ale dyjetyčnaja koła jamu nie dapamahła: plemia tak i nie vyjšła na plaž, kab ustupić ź im u kantakt. Trochi pačakaŭšy, turyst pakinuŭ padarunki na vostravie i adpłyŭ.
Palakovu vielmi pašancavała, što jon nie sustreŭ miascovych žycharoŭ. U 2018 hodzie amierykanski misijanier Džon Alen Čau prybyŭ na izalavany vostraŭ, kab naviarnuć miascovaje plemia ŭ chryścijanstva. Adnak abaryhienam hość nie vielmi spadabaŭsia: jany zastrelili misijaniera z łuka. Cieła Čau z vostrava tak i nie evakujavali.
Palicyi Palakoŭ rastłumačyŭ, što zachaplajecca ekstremalnym turyzmam. Pavodle jaho słoŭ, niadaŭna jon padarožničaŭ u Afhanistan, kab pahutaryć z talibami.
Suprać mužčyny ŭzbudzili spravu za praniknieńnie ŭ achoŭnuju terytoryju plemia biez dazvołu. Ziemli, dzie pražyvajuć plamiony, achoŭvajucca ŭ adpaviednaści z Pałažeńniem Andamanskich i Nikabarskich astravoŭ ad 1956 hoda, jakoje zabaraniaje niesankcyjanavanaje praniknieńnie na hetyja terytoryi.
Sientynielcy źjaŭlajucca adnym ź piaci addalenych plamionaŭ, jakija pražyvajuć na astravach, i viadomyja svajoj varožaściu da čužyncaŭ.
Prakurorski načalnik aburyŭsia nieabhruntavanymi zatrymańniami biełarusaŭ9
Kamientary