У Беларусі сёлета плануюць запусціць вытворчасць вакцыны ад раку. Калі ўсё атрымаецца
Аднак вакцынай гэты прэпарат называецца толькі ўмоўна, насамрэч гэта складаная генетычная канструкцыя для лячэння злаякасных пухлін.
Вытворчасць вакцыны ад раку «Еленаген» разлічваюць пачаць у ў 2024 годзе. Пра гэта заявіў намеснік дырэктара па навуковай рабоце РНПЦ анкалогіі і медыцынскай радыялогіі, прафесар, акадэмік НАН Беларусі Сяргей Красны падчас прэс-канферэнцыі, піша Tochka.by.
Вакцынай гэты прэпарат называецца толькі ўмоўна, насамрэч гэта складаная генетычная канструкцыя для лячэння злаякасных пухлін. Таму і так цяжка наладзіць выпуск прэпарата.
«Гэта такая кальцавая малекула. …Па-першае, складана сфармаваць саму гэтую канструкцыю, па-другое, прыбраць усе прымешкі, якія там з'яўляюцца, — так званыя эндатаксіны. Гэта вельмі складана, у Расіі такое не змаглі зрабіць. Спадзяемся, што ў Беларусі ўсё ж такі атрымаецца», — распавёў прафесар.
Але пакуль лекі скончыліся, а даследаванні прыпыненыя — навукоўцы чакаюць, калі будзе наладжаная вытворчасць.
Прэпарат распрацаваў амерыканскі малекулярны біёлаг Алекс Шнайдэр, яшчэ да пандэміі ў Беларусі праводзіліся клінічныя даследаванні.
Правяралі «Еленаген» на пяці лакалізацыях пухліны, якія праз нейкі час лячэння аказваліся устойлівымі да ўсіх вядомых методык і прэпаратаў. Даследавалі трыплетнегатыўны рак малочнай залозы, метастатычны рак страўніка і падстраўнікавай залозы, хіміярэзістэнтны рак яечнікаў і гармонарэзістэнтны рак прадсталёвай залозы.
Па раку страўніка ніякага прагрэсу не выяўлена: ДНК-вакцына аказалася тут неэфектыўнай. Абмежаваная эфектыўнасць — пры раку падстраўнікавай залозы, даследаванні былі часова прыпыненыя.
А вось самыя шматабяцальныя вынікі былі атрыманы ў пацыентаў з хіміярэзыстэнтным ракам яечнікаў. Беларускія анколагі вынікі называюць унікальнымі: сярэдні час да прагрэсавання захворвання павялічыўся ў 2,5 разу, а ў 40% пацыентак адзначаны працяглы перыяд без прагрэсавання — на працягу трох апошніх гадоў.
Добрыя вынікі былі і пры раку малочнай і прадсталёвай залоз, але там яшчэ трэба будзе правесці даследчую працу.
Вакцына — гэта ўмоўная назва для такіх прэпаратаў, па сутнасці, яны не аказваюць прафілактычнага эфекту, а дапамагаюць у лячэнні ўжо наяўных захворванняў і робяць пухліну зноў ўразлівай для лекаў, якія перасталі дапамагаць.
Цяпер чытаюць
Пракурорскі начальнік абурыўся неабгрунтаванымі затрыманнямі беларусаў9
Каментары