Каардынацыйная Рада прапанавала увесці новую пасаду — упаўнаважанага па правах грамадзян Беларусі. Праваабаронцы не падтрымалі гэта.
Праект стварэння інстытута ўпаўнаважанага па правах грамадзян Беларусі разглядаўся на апошніх слуханнях КР.
Сёння вядучыя беларускія праваабарончыя арганізацыі апублікавалі сваю пазіцыю адносна ініцыятывы. Яны мяркуюць, што такая структура ў сённяшніх умовах будзе неэфектыўнай і не апраўданай.
У дакуменце адзначаецца, што прапанаваны мандат — занадта шырокі і дубліруе дзейнасць ужо існуючых праваабарончых арганізацый, грамадзянскіх ініцыятыў і міжнародных механізмаў. Упаўнаважаны ў нармальнай дзяржаве мае іншыя статус і магчымасці, у тым ліку дзяржаўнае фінансаванне і рэальныя паўнамоцтвы. У выгнанні такіх умоў няма — таму новая структура будзе фармальнай і сімвалічнай, звяртаюць увагу праваабаронцы.
Праваабаронцы таксама крытыкуюць назву («па правах грамадзян Беларусі»), якая супярэчыць міжнародным стандартам, бо інстытут Упаўнаважанага павінен абараняць правы ўсіх людзей, а не толькі грамадзян краіны. Акрамя таго, звароты да такой структуры з тэрыторыі Беларусі могуць быць небяспечнымі для людзей — асабліва калі сам інстытут будзе прызнаны «экстрэмісцкім».
Замест гэтага праваабаронцы прапануюць дэмсілам стварыць асобную пазіцыю, адказную за абарону правоў беларусаў у выгнанні. Такая структура мела б рэальны сэнс і магла б узаемадзейнічаць з замежнымі інстытутамі.
Пад зваротам падпісаліся Беларускі Хельсінкскі Камітэт, «Вясна», Human Constanta, «Прававая ініцыятыва», Беларускі ПЭН і іншыя арганізацыі.
Цяпер чытаюць
Пракурорскі начальнік абурыўся неабгрунтаванымі затрыманнямі беларусаў9
Каментары
[Зрэдагавана]